سلام‌وطندارنینگ افغانستان ۱۰ ولایتیده ۲۶ عیال بیلن اوتکزگن صحبتی اساسیده، اوشبو ۲۶ عیال‌دن ۲۳ نفری اسلام قایل بولگن دستلبکی حقوق‌دن محروم دیر. بو عیاللر ارا ۱۴ نفری اویلی و باشقه توقیز نفری بویداق دیر. اولر گه کوره، تورموش اورتاق‌نی تنلش، قرار قبول قیلیش، حقوق و مستقل حیات کبی شخصی ایرکین‌لیک، کییم کییش حقوقی‌دن محروم دیر.
اویلی بولگن ۱۴ عیال گه کوره، عایله‌‌لری اولرنی جبردن تورموش گه چیقرگن. تخارلیک ۳۰ یاشر مریم‌نینگ ایتیشیچه، اراده‌سی گه قرشی و عایله‌سی‌نینگ خواهشی بیلن جبری تورموش گه چیققن و آته‌سی تورموش اورتاق‌نی تنلش حقینی اوندن آلگن. «اراده‌م گه قرشی تورموش گه چیقدیم؛ کوپ کیچیک اېدیم عایله‌م مینی کېکسه بیر کیشی گه تورموش گه چیقردیلر. اصلا تورموش گه چیقیش گه اراده‌م یوق اېدی؛ بیراق آته‌م تورموش گه چیقیشیمنی اېستر اېدی.»
هرات یشاوچیسی ۲۵ یاشر رئوفه‌نینگ ایتیشیچه، اونگه تورموش اورتاغینی تنلش حقی بیریلمه‌گن و آته-آنه‌سی اونی جبردن تورموش گه چیقرگنلر. «تورموش گه چیققنیمدن ایکّی ییل اوتماقده؛ بیر باله‌م بار؛ مین اصلا ایریم‌نی کورگنیم یوق اېدی اونی آته-آنه‌م تنله‌گنلر. عایله‌م‌نینگ تنلاوی و باسیملری طفیلی قبول قیلیش گه مجبور بولدیم.»
قندوزلیک ۲۲ یاشر مهریه، آته و ایناغه‌لری اونگه قرار قبول قیلیش صلاحتینی بیرمه‌یدی و حاضر ناچارلیک بیلن حیات کیچیریب کېلماقده‌لیگینی معلوم قیله‌دی. «عایله‌م قرار قبول قیله‌دی؛ مین کیم بیلن گپیریش قرارینی اولر آله‌دی، قنده‌ی کییم کیسم و حتا قنده‌ی یول یوریسم. حیات‌ده هېچ نرسه‌ده صلاحیتیم یوق و هېچ بیر قرار آلالمه‌ی من؛ چونکه بوتون قرارلرنی آته و ایناغه‌لریم آله‌دیلر.»
کابل یشاوچیسی ۴۰ یاشر حمیده گه کوره، تورموش اورتاغی مهرینی تولش اوچون مالی توانی بولسه‌ده؛ بیراق جامعه‌ده‌گی عنعنه‌لر طفیلی تورموش قورگنیدن ۱۹ ییل اوتگنی بیلن ایری‌دن مهر حقینی آلالمه‌گن. اونینگ ایتیشیچه: «اوقیمیشلی من؛ بوتون عایله اعضالریم هم اوقیمیشلی دیر؛ تورموش قوریش پیتیده ایریم مهریم‌نی تولش اوچون عایله‌م شرط قویدیلر؛ بیراق مالی توانی بولسه‌ده باشقه‌لردن قورقیب ایریم مهریم‌نی همان تولمه‌گن.»
بیزلرنینگ فیسبوک صحیفه‌میزگه باش اورینگ!
کابل یشاوچیسی ۳۴ یاشر تمنا، تورموش اورتاغی‌نینگ عایله‌سی تامانیدن مستقل حیاتی بولیش حقی اوندن آلینگنینی معلوم قیله‌دی. «اسلام بیز گه مستقل حیات کیچیریش حقینی بیرگن؛ بیراق بو حق ایریم‌نینگ عایله‌سی تامانیدن آلینگن. تورموش اورتاغیم‌نینگ بیش ایناغه‌سی بار؛ هر بیریمیزنینگ تورموش قورگنیمیزدن کوپ وقت اوتماقده؛ لېکن حاضرگه قدر بیر ییرده کوپ قیینچلیک بیلن حیات کیچیریب کېلماقده‌میز.»
دین عالملریدن بیرقطاری‌نینگ ایتیشلریچه، اسلام دینی عیال و ایرکک‌نی بیر «ارق»دن دیب، انسان و اسلام نقطه‌ی-نظریدن دستلبکی حقوق‌ده عیاللر و ایرکک‌لرنینگ حقی تېنگ دیر.
دین عالمی عطاءالحق انس‌نینگ ایتیشیچه: «عیاللر و ایرکک‌لر بیر ارق‌دن دیر و اسلام قدریتی اساسیده تېنگ دیر و فرق‌لری یوق؛ حیات، اوقیش حقی، تورموش اورتاق‌نی تنلش، مستقل حیاتی بولیش و باشقه اونلب حقوق‌ده ایرکک‌لر کبی عیاللرنینگ حقی بار.»
دین عالملریدن باشقه بیری حبیب‌الله حسام گه کوره: «اسلام قدریتی اساسیده، اسلام‌ده عیال و ایرکک‌نینگ حقوقی تېنگ دیر، تکالیف، اساسی حقوق و شرعی مکلفیت‌لر و قرآن‌کریم‌ده عیال و ایرکک‌نینگ بیر خیل حقوقی بار و هېچ فرق‌لری یوق نه اساسی حقوق‌ده و نه هم دنیا و آخرت کونی‌ده.»
حقوق‌دانلردن باشقه بیرقطاری، حقوق و اسلام قاعده‌لری نقطه‌ی-نظریدن عیال و ایرکک‌لرنینگ حقوقینی تېنگ بیلیب و عایله‌لر فرزندلری‌نینگ شخصی مستقل‌لیگیگه حرمت قایل بولیش‌لری گه تأکید اېته‌دیلر.
بیزلرنینگ «ایکس» ترماغی ده هم تعقیب قیلینگ!
حقوق‌دان نورآقا شعیب‌نینگ ایتیشیچه: «اسلام مقدس دینی و افغانستان قاعده‌لری تورلی حقوق جمله‌دن ساغلیق، شخصی مسئله‌لرده قرار قبول قیلیش، تقدیرنی تعیین‌لش‌ده قرار آلیش و هکذالرده تنلش و قرار قبول قیلیش حقوقی گه ایگه دیر.»
عیال حقوقی فعاللریدن بیرقطاری، افغانستانده عیال و ایرکک‌لرنینگ حقوقی تېنگ بولمه‌گنیدن خواطر بیلدیریب و اجتماعی نابرابرلیک‌نی عایله‌وی قیینچیلیک عنوان قیله‌دیلر.
عیال حقوقی فعالی حسنا رئوفی گه کوره: «بیز هردایم جامعه و عایله‌ده عیاللر کم‌سیتیلیشی‌دن تشویش‌ده میز. جامعه‌ده عیال حقوقی رعایت بولمسلیک‌دن آلدین، عایله‌ده رعایت اېتیلیشی کېره‌ک.»
برچه‌سی بیلن، سرپرست حکومت امرمعروف و نهی منکر وزیرلیگی مسئوللری، عایله‌لرده عیاللرنینگ انسانی و اسلامی حقوقی رعایت بولمسلیگینی تصدیقلب ایتیشلریچه، بو وزیرلیک اوتگن اوچ ییل‌ده عیاللر گه قرشی اون مینگلب عایله‌وی زوره‌وانلیکّه توسیق بولگنلر.
سرپرست حکومت امرمعروف ونهی منکر وزیرلیگی سۉزلاوچیسی سیف‌الاسلام خیبر سلام‌وطندار گه ایتیشیچه: «افسوس بیلن اسلام تامانیدن عیاللر گه بیریلگن حق، عایله‌لرده آگاهی‌لیک سطحی پس‌لیگی اوچون بیریلمه‌گن و امرمعروف وزیرلیگی سۉنگی اوچ ییل‌ده اون مینگلب عایله‌وی زوره‌وانلیک و یالغیز بیش مینگ ۵۰۰ جبری تورموش گه چیقریش گه مانع بولگن. اسلام تامانیدن عیاللر گه بیریلگن حق رعایت اېتیلیشی یگانه غایه‌میز دیر.»
عین‌حالده، بیرلشگن ملتلر تشکیلاتی امنیت کینگشی‌نینگ ییغیلیش‌لریده بیرقطار مملکتلرنینگ وکیللری، افغانستانده عیاللر احوالی، عیاللرنینگ کم‌سیتیلیشی‌دن تشویش بیلدیریب و افغانستان سرپرست حکومتی‌دن عیاللرنینگ حقوقینی یخشی تأمینلش‌نی سوره‌گن بیرحالده، عیاللر جامعه و عایله‌ده کم‌سیتیلیب و مستقل حیات‌لری بولمه‌گنیدن نالیماقده‌لر.
