هرات ساغلیک مسئوللری نینگ ایتیشلریچه، اوشبو ولایت نینگ اوقووچیلریدن ۴۰ – ۵۰ فایزی کرونا ویروس گه چلینگن.
هرات ولایت عامه ساغلیک ریاست سوزلاوچیسی محمدرفیق شیرزی نینگ سلاموطندارگه ایتیشیچه، بو ولایت ساغلیک ریاستی تامانیدن یولگه قوییلگن تیکشیرووگه کوره، اوشبو ولایت اوقووچیلری نینگ ۴۰ – ۵۰ فایزی کرونا ویروس گه چلینگن.
شیرزی جنابلری نینگ کوپهیتیریشیچه، ساغلیک ریاستی تصادفی شکلده ۳۵۰ قیز و ایرکک اوقووچی نی تیکشیرگن و نتیجهده ۱۵۳ اوقوچی نینگ کرونا تستی ایجابی چیققن. لیکن کرونا ویروس گه یولیققن اوقووچیلر نینگ ساغلیک وضعیتی یخشی دیر.
بیراق هرات ساغلیک ریاست سوزلاوچیسی، اوقووچیلردن کوپینچهسی کرونا ویروس گه یولیققنی نی خواطرلنتروچی دیب و سونگی ایکی هفتهده کرونا ویروس گه چلینگنلر رقمی کوپهیگن دیدی.
شیرزی جنابلری نینگ ایتیشیچه، کرونا ویروسی نینگ ایکینچی تولقینی حاضرگچه هرات ولایتیده باشلنمهگن و مذکور کیشیلر کرونا ویروس نینگ بیرینچی تولقینی گه یولیققن.
اونینگ کوپهیتیریشیچه، اوتگن ۲۴ ساعت جریانیده کرونا ویروس گه شبههلی ۷۰ کیشیدن ۱۶ تهسی نینگ نتیجهسی ایجابی انیقلنگن.
شیرزی گه کوره، هر کون هرات ولایتیده ۵۰۰ – ۷۰۰ کیشی کرونا ویروس خصوصیده اوزینی تیکشیرهدی و کرونا گه چلینگن ۷۲ کیشیدن ۱۹ تهسی نینگ ساغلیک وضعیتی یمان دیر.
بوندن آلدین فراه ولایت ساغلیک ریاست مسئوللری، کسلخانه گه داورلهنیش اوچون انتقال بیریلگن ۵ یاشدن قویی بالهلرنینگ ۳۰ فایزی ده کرونا ویروس نینگ نشانهلری کوریلگنی نی ایتگن ایدی.
فراه ولایت ساغلیک ریاست سرپرستی مهتابالدین نورزی نینگ سلام وطندارگه ایتیشیچه، دولتی و خصوصی کسلخانه لرگه دارولنیش اوچون کیلهدیگن هر ۱۰ بالهدن ۳ تهسیده کرونا ویروسی نینگ علامتی بار.