مملکت شمالیده ۱۲-عقرب یوز بیرگن زلزلهدن اوچ هفته اوتماقده. اوشبو زلزله نتیجهسیده افغانستاننینگ ترانزیتی قتناو یوللریدن بیری بولمیش تنگی تاشقرغان هم زیانلردن امان قالمهگن. دایم یولاوچیلرنینگ شور-شاوقینی و تاغلر آرهسیدهگی تیریلگن دکانلردن قیزیقیش بیلن اهالینینگ سودا آلیشی، بو جایگه چیرایلی بیر سیمانی یرهتگن ایدی؛ بیراق حاضر اوتمیش گه قرهگنده آرامراق و قورقیلهدیگن بیر جای کبی کوریلهدی.
تنگی تاشقرغان دهگی دکاندارلردن قطارینینگ سلاموطندار گه ایتیشلریچه، زلزله طفیلی تاغ سیلجیشی و یولاوچیلردن قطارینینگ اولگنیدن کیین، دم آلیش، چایش ایچیش و ایستهلیک صورت آلیش اوچون موترلرینی توختهتیب، بو ییرگه کیلهدیگن یولاوچیلر قریب یریم گه کمهیگن.
تنگی تاشقرغان ده ۱۰ ییلدن بیری دکاندارلیک قیلهدیگن ضیاءالله، یوز بیرگن زلزلهده ییتیشگن زیانلر توغریسیده گپلهشیب و ایتیشیچه: «قریب ۱۳ دکان بوزیلگن و هر بیر دکان گه قریب اوچ-تورت یوز مینگ افغانی زیان ییتیشگن. شونینگدیک ساتیلیش سونگی اوچ هفتهده ۴۰-۵۰ فایز کمهیگن.»
اونینگ اورغولشیچه، حاضرگچه تاغنینگ اوست قسملریده اساسی ایش باشلنمهی و تاشلرنینگ قیته توکیلیشی، اهالینینگ خواطری نی کوپهیتیرگن.
شونینگدیک دکاندارلردن باشقه بیری محمدنظرنینگ ایتیشیچه، دکانلر ترمیم بولیب و ایشلر قیته باشلنگن، بیراق اهالینینگ قورقیشی سبب، آلیش-بیریش بازاری کمهیگن.
اونینگ کوپهیتیریشیچه: «اهالی و یولاوچیلر قورقهدیلر. اوتمیشده یولاوچیلر موترلرینی توختهتیب و دم آلهر ایدیلر. حاضر هم تاغدن تاشلر توکیلهدی. حکومتدن بو توغریده توجه قیلیشی و زیان ییتیشهدیگن بولیملرنینگ قیته توزهتیشینی ایستهیمیز.»
باشقه بیر تاماندن، بو یولدن اوتهدیگن یولاوچیلردن بیری عبدالباسطنینگ ایتیشیچه، شمال-کابل یولی بیکتلریدن بیری بولگن تنگی تاشقرغان، زلزلهدن کیین بیر قورقوو گه اَیلنگن. اونگه کوره، اصلی خوف حل بولگنی بیلن، لیکن زیان ییتیشگن بولیملرنینگ اساسی شکلده ترمیم بولیشی کیرهک. «اهالی قورقیب قالگن. تاغلردن تاش توشیش موضوعسی وقتدن بار ایدی، لیکن حاضر ایسه بو توغریده حساسیت کوپهیگن. بو ترانزینی مهم یول دیر. شمالنی کابل گه باغلهیدی. دولتنینگ توجه قیلیشی کیرهک.»
شوندهی بیرحالده، سمنگان ولایتی خُلم تومنی اورینباسری زینالله بخاری، دکاندارلر و یولاوچیلر خواطرلرینی تصدیقلب، بیراق ایتیشیچه، تاش توکیلیشی قیینچیلیگی فواید عامه ریاستی آرقهلی حل بولگن و اوشبو یول اوتیب-قیتیش اوچون تینچ دیر.
اونینگ کوپهیتیریشیچه: «حاضر سرکلر پاک بولگن. باش کونلرده تاشلر توکیلهر ایدی. حاضر اولکهداشلریمیز راحت بیر شکلده موترلرینی توخته آلهدیلر؛ هیچ قیینچیلیک یوق.»
ایتیش کیرهک که، تنگی تاشقرغان مملکت شمالیدهگی اینگ مهم ترانزیتی قتناو یوللریدن بیری بولیب، دایم یولاوچیلرنینگ دم آلهدیگن بیکت صفتیده تانیلهر ایدی، بیراق یوز بیرگن زلزلهدن اوچ هفته اوتگنیدن کیین بو یول، یولاوچیلرنینگ راحتلیک بیلن قیته کیلهدیگنلری کونلرنی، کوتیب تورگن.
