مملکت نینگ برچه ولایت‌لریده خبرچیلر و میدیا ایشلاوچیلری گه بیر تور چیکلاو یرهتیلمهگن بولسه ده، بیراق فاریاب کبی اوزاق ولایت‌لرده کوچلی‌راق چیکلاو یره‌تیلگن و مذکور ولایت ده عیال خبرچی‌لری گه قریب ایکی ییل دن بویان، عادی فعالیت قیلیش ایزینی بیریلمه‌گن.
فاریاب ده‌گی عیال خبرچیلردن بیرقطاری، ایش‌سیزلیک و یره‌تیلگن چیکلاولردن خواطر بیلدیریب ایتیشلریچه، اوتگن ایکی ییل ده کوپ سانده خبرچیلر اینیقسه مذکور ولایت ده عیال خبرچیلر ایش‌سیز بولگن. اولر گه کوره، اطلاعات گه قوله تاپمه آلمسلیک و عیال خبرچیلر گه یره‌تیلگن چیکلاولر، اولرنی قیینچیلیک بیلن روپه‌ره قیلگن.
اسلام امیرلیگی حاکمیتیدن کیین فاریاب ده بیرینچی بولیب فعالیتی توخته‌گن «همدم نشریه»سی مدیر مسئولی مونسه همدم نینگ ایتیشیچه، اوشبو نشریه میلادی ۲۰۱۵_ییلی خاتین قیزلر نینگ ظرفیتینی آشیریش مقصدیده تشکیل ایتیلگن و برنامه‌لریدن کوپینچه‌سینی فرهنگی، اجتماعی، حقوقی، معلوماتی و تعلیمی موضوع‌لر تشکیل بیرر ایدی. خانم همدم گه کوره، مذکور میدیا نینگ فعالیتی جریانیده هیچ بیر نهاد تامانیدن حمایت بولمه‌گن و برچه خرجتی شخصی پول بیلن تأمینلنگن؛ بیراق مملکت ده سیاسی سونگی اوزگریش و اقتصادی قیینچیلیک باعث اوشبو نشریه فعالیتی توخته‌گن. همدم نینگ کوپه‌یتیریشیچه: «همدم نشریه‌سی تأسیس ایتیلیشیدن حاضرگچه خارجی و داخلی هیچ بیر نهاد تامانیدن حمایت بولمه‌گن؛ چونکه همدم خصوصی بیر مرجع بولیب و هردایم شخصی پول بیلن چاپ بولگن.»
بیزلرنینگ فیسبوک صحیفه‌میزگه باش اورینگ!
افغانستان ده اوتگن ایکی دهه‌ده یره‌تیلگن نسبی ایرکین‌لیک و فرصت‌لر، مملکت‌ده کوپینچه میدیالر ایجاد بولیشی و عیاللر خبرچیلر سانی کوپه‌یشی گه سبب بولگن ایدی؛ بیراق جمهوریت توزومی نینگ قولشی‌دن کیین، اوشبو فرصت‌لردن برچه‌سی اورته‌دن کیتیب و عیال خبرچیلردن کوپینچه‌سی، میدیا فعالیت‌لریدن حذف بولگن.
باشقه بیر تامان‌دن، فاریاب ده محلی میدیا‌لردن بیریده تعلیمی برنامه‌لر نطاقی و خبرچی عیال‌لردن بیری مهم‌انگیز عفت کریمی نینگ ایتیشیچه، اسلام امیرلیگی نینگ قدرت گه ایریشگنی و خبرچیلر گه چیکلاولر یره‌تیلگنی‌دن کیین، ایش‌سیز بولگن. اونینگ سلام‌وطندار گه ایتیشیچه، عیال خبرچیلر برابریده یره‌تیلگن چیکلاولردن کیین، روحی قیینچیلیکلر گه چیلنگن دیر.
خانم عفت کریمی نینگ کوپه‌یتیریشیچه: «اسلام امیرلیگی نینگ قدرت گه ایریشگنیدن کیین، قیینچیلیکلر یولیمیز برابریده قرار تاپدی، بیرینچیده علاقه‌سیز بولدیک. چونکه هیچ کیم سوره‌مه‌یدی که بو رقم فعالیتینگ بار می یا-ده فعالیتی‌میز گه ارزش بیریلسه.»
ینگی حکومت نینگ قدرت گه ایریشگنیدن کیین، خبرچی عیاللر کوپ قطاری میدیا‌لردن حذف بولگن، اولردن قطاری افغانستان دن تشقی مملکتلر گه مهاجرت قیلگن و مملکت‌ده قالگن بیر قطاری ایسه کوپینچه مالی و روحی قیینچیلیکلر گه چیلینگن.
فاریاب ده خبرچیلردن باشقه بیری اصلیه احمدزی نینگ ایتیشیچه، اوتگن ایکی ییل‌ده عیاللر گه یره‌تیلگن چیکلاولر، ایشی نی قولدن بیریشی گه سبب بولیب و روحی قیینچیلیککه چیلینگن. اونگه کوره، اوتگن ایکی ییل جریانیده خبرچی عیاللر فاریاب ده خبرچیلر گه تیگیشلی بولگن جلسه‌لر و دولتی ییغین‌لردن هیچ بیریگه دعوت بولمه‌گنلر.
شونینگدیک فاریاب ده‌گی خبرچی عیال‌لردن باشقه بیری شگوفه سعادت، عیال خبرچیلر وضعیتی‌دن ناامید‌لیک بیلدیریب و ایتیشیچه، میدیالرده عیاللر فعالیتی گه یره‌تیلگن چیکلاولر سبب، اولر خبری ییغین‌لر گه شرکت قیله آلمه‌یدیلر و شونینگدیک عیال خبرچیلرگه معلومات گه قول تاپیش خصوصیده هم ایرکک‌لر کبی همکارلیک بولمه‌یدی. «فاریاب ده عیال خبرچیلر برابریده چیکلاولر کوپه‌یگن. حاضرگچه هیچ قنده‌ی جسله‌لر و خبری ییغین‌لر گه شرکت قیله آلمه‌گنمیز و بو وضعیت فاریاب ده عیال خبرچیلر خواطری نی نیچه برابر قیلگن.»
خانم سعادت حکومت و خبرچیلردن حمایت قیلووچی نهاد‌لردن افغانستان ده عیال خبرچیلر ایش وضعیتی گه توجه قیلیب و اولر نینگ میدیا فعالیت‌لریدن حذف بولیش‌لری گه رخصت بیریلمه‌سلیگی نی ایسته‌گنلر.
فاریاب ده خبرچیلر ملی بیرلشمه رئیسی قطب‌الدین کوهی اوشبو ولایت‌ده خبرچی عیاللر فعالیتی خصوصیده یره‌تیلگن چیکلاو‌لرنی تصدیق‌لب ایتیشیچه، اسلام امیرلیگی نینگ قدرت گه ایریشگنیدن کیین، قریب ۳۵ خبرچی عیال اوشبو ولایت میدیا‌لریده ایش قیله‌ر ایکن؛ بیراق حاضر ایسه، یالغیز بیش خبرچی فعالیت قیله‌دی. اونینگ کوپه‌یتیریشیچه، فاریاب معلومات و مدنیت رئیسی و حاکمی بیلن بولگن ییغین‌لرده، نیچه مرته اوشبو موضوع نی ایتگن دیر؛ بیراق حاضرگچه، اوشبو قیینچیلیک حلی اوچون هیچ قنده‌ی سعی و حرکت صورت تاپمه‌گن.
بیزلرنینگ توییترده هم تعقیب قیلینگ!
جناب کوهی نینگ ایتیشیچه، فاریاب ده قریب برچه میدیالر یاپیلیب و خبرچیلر ایش‌سیز بولگن که، انه شوو سبب فاریاب‌دن خبرچیلردن قطاری باشقه ولایت‌لر گه مهاجرت قیلگن. او فاریاب ده خبرچی عیاللر وضعیتی‌دن خواطر بیلدیریب و ایتیشیچه: «ساحه‌ده ایشله‌یدیگن و تورلی‌خیل میدیالر بیلن همکار بولگن عیال خبرچیلردن قطاری، اوی‌ده اولتیرگن. اولر ایشلری نی قولدن بیریب و درآمد‌لری یوقلیگی سبب، روحی قیینچیلیکلر گه چلینگنلر.»
شونده‌ی بیرحالده، فاریاب معلومات و مدنیت ریاستی نینگ معلومات بولیمی آمری غلام‌محمد کریمی عیال خبرچیلر برابریده یره‌تیلگن چیکلاولر حل قیلیشی اوچون سعی و حرکت‌‌دن خبر بیریب و ایتیشیچه، تیزلیککه عیال خبرچیلر برابریده یره‌تیلگن چیکلاولر حل بولیب و عیاللر خبرچیلر شرعی قاعده-قانون اساسیده ایشلری گه دوام بیریش‌لری ممکن. اونینگ ایتیشیچه: «افغانستان اسلام امیرلیگی عیاللر مصونیتی و اولر نینگ میدیالرده ایشله‌یشلری اوچون بیر قطار طرزالعمل‌لرنی وضع قیلیش ایسته‌یدی. حاضرگچه اوشبو طرزالعمل‌لر و ایش شیوه‌سی نی بیلدیرمه‌گن.»
اسلام امیرلیگی نینگ قدرت گه ایریشگنیدن کیین، تعلیم، تحصیل و عیاللر ایشی برابریده چیکلاولر کوپه‌یب و اوشبو چیکلاولر نینگ عمل گه آشیریلیشی، عیال خبرچیلردن کوپینچه‌سی نی ایش‌سیز قیلیب و روحی کسل‌لیک‌لر گه چلینتیرگن.
