فاریاب ده‌گی عسل اری‌چیلری دن قطاری نینگ ایتیشلریچه، اوشبو ولایت ده زنبوردارلیک فارمی کوپه‌یگن بولسه ده، بیراق فاریاب ایکینچیلیک، سوغاریش و چاروه‌چیلیک ریاستی، زنبوردارلرنی مسلکی‌لشتیریش و ظرفیت‌لرینی کوچلنتیریش خصوصیده حاضرگچه همکارلیک قیلمه‌گن.
فاریاب ده بیش ییل دن بویان زنبوردارلیک قیلیب کیلگن عبدالله حمیدی نینگ ایتیشیچه، اوشبو ییل قیش موسومی ده هوا ساووق‌لیگی و «واروا» کنه‌سی کوپه‌یشی باعث، اوشبو ولایت ده ۱۳۰ صندیغ عسل اری‌لری تلف بولگن.
اونگه کوره: «دولت و ایکینچیلیک ریاستی حاضرگچه فاریاب ده زنبوردارلر گه یاردم بیرمه‌گن، اوزیمیز تلاش قیلیب بو صناعت نی اورگندیک، فاریاب ده بو صناعت یخشی نتیجه بیرگن، هوا ساووق‌لیگی و کسل‌لیک باعث ۱۳۰ صندیغ اری‌سی تلف بولگن.»
بیزلرنینگ فیسبوک صحیفه‌میزگه باش اورینگ!
فاریاب ده عسل اری‌چیلری دن باشقه بیری حفیظ‌الله مالک، اوشبو ولایت ده زنبوردارلیک صناعتی رواجله‌نیشی گه اشاره قیلیب ایتیشیچه، فاریاب ایکینچیلیک ریاستی زنبوردارلر بیلن هیچ همکارلیک قیلمه‌گن.
عسل اری‌چیلریدن حفیظ‌الله مالک نینگ ایتیشیچه: «دارو یوق‌لیگی باعث کوپ قیینچیلیک بیلن روپه‌ره میز، اوشبو ولایت ده دارو تاپیلمه‌یدی، دارو اوچون هرات یا کابل باریش گه مجبور میز، ایکینچیلیک ریاستی بیز گه زنبور تربیه‌لشنی اورگه‌تیشی کیره‌ک، هیچ بولمسه قیینچیلیگیمیز حلی اوچون دارو کیلتیریشینی ایسته‌یمیز.»
عین‌حالده، فاریاب ایکینچیلیک، سوغاریش و چاروه‌چیلیک ریاستی نینگ فارم‌دارلر مدیری سیدمحمدظاهر، مذکور ولایت ده عسل اری‌چیلری نینگ قیینچیلیکلرینی قبول قیلیب ایتیشیچه، امکانیت‌لری گه قره‌ب عسل اری‌چیلری بیلن همکارلیک قیلگن و اولر نینگ مسلکی‌لشتیریش مقصدیده سعی‌وحرکت قیلماقده‌لر.
اونگه کوره، فاریاب ایکینچلیک ریاستی ده زنبوردارلیک ۱۵ فارم ثبت دیر، کوپراق میمنه شهری، پشتون‌کوت و خواجه‌سبزپوش تومن‌لریده فعالیت قیلماقده‌لر.
بیزلرنینگ توییترده هم تعقیب قیلینگ!
فاریاب ایکینچیلیک، سوغاریش و چاروه‌چیلیک ریاستی نینگ فارم‌دارلر مدیری نینگ کوپه‌یتیریشیچه: «ساووق‌لرده ۱۳۲ صندیغ اری‌لری تلف بولدی، فاریاب ده بو صناعت رواجلنماقده، یشاوچیلر زنبور اوچون بیز گه مراجعت قیلیشه‌دی.»
فاریاب ده‌گی زنبوردارلر گه کوره، عسل اری‌لری اوشبو ولایت نینگ تاغ گل‌لریدن آوقات‌لنیشی باعث، فاریاب عسلی باشقه ولایت‌لر جمله دن تخار، بدخشان و ننگرهار ولایت‌لری نینگ ایشلب چیقرگن عسل‌لری گه نسبتن صفتلی دیر.
