فاریاب ولایتی نینگ قطار تومن‌لریدن آواره بولیب میمنه شهریده کیلگن عایله‌لردن بیرقطاری، اعتراضی بیر ییغین آرقه‌لی، حکومت‌دن منطقه‌لری نینگ خوفسیزلیگی‌نی تامین‌لشینی سوره‌گن‌لر.
اوشبو اعتراضچی‌لر حکومت نینگ دقتسیزلیگیدن تنقید قیلیب ایتیش‌لریچه، یمان وضعیت‌ده قرار تاپگن‌لر و ساووق کیچه‌لرنی مسجدلر و تخریب بولگن جای‌لرگه اوتکزه‌دی‌لر.
محمدالله و خدیجه قیصار تومنیدن آواره بولیب میمنه شهریگه کیلگنلر. اولرنینگ ایتیش‌لریچه، حیات‌ده قالیش‌نی ایستمه‌یدیلر و قیرگه باریش‌لرینی هم بیلمه‌یدیلر.
اعتراضچی‌لرنینگ ایتیش‌لریچه، باش‌پناه‌لری یوق و حکومت هیچ‌قنده‌ی یاردم بیرمه‌گن. اولرنینگ کوپه‌یتیریشیچه، بیرقطار عایله‌لر مجبوریت‌دن کدای‌گرلیک قیله‌دی.
عین‌حالده، فاریاب حاکمی نقیب‌الله فایق نینگ آواره‌لر وضعیتیدن خواطر بیلدیریب ایتیشیچه، مرکزی حکومت تامانیدن یاردم صورت تاپمه‌گن حالده، فاجعه یوز بیریشی ممکن.
جناب فایق نینگ کوپه‌یتیریشیچه، سونگی اوروش‌لر سبب، آواره بولگن‌لرنینگ سانی کوپه‌یگن و اوروش‌لرنی بیر بولیمی حکومت تامانیدن باشلنگن و حاضرده حکومت تامانیدن البسه و آذیق-آقات یاردم بیریلمه‌گن صورتده، کوپ قطار باله‌لر و عیاللرنی تلف بولیشی ممکن.
فاریاب حاکمی نینگ ایتیشیچه، حادثه‌لرگه قرشی کوره‌ش وزیرلیگی‌نی آواره بولگن‌لرگه یاردم بیریشی اوچون مسوولیتی بار، بیراق حاضرگه‌قدر بو وزارت آدرسیدن هیچ‌قنده‌ی یاردم صورت تاپمه‌گن.
ایتیلیشچه، فاریاب ولایتی نینگ بیرقطار تومن‌لریده اوروش‌نی دوامی بار و کون اوتیش بیلن آواره بولگن‌لرنینگ سانی کوپه‌یب بارماقده.
