سلاموطندارنینگ ۲۰ نفر یاش (۱۳ اوغیل و ییتی قیز) بیل آلیب بارگن صحبتلری شونی کورستهدی کی، بو یاشلر ایش و تعلیم ویزهسینی آلیش مقصدیده ایش و تعلیم بوییچه مصلحت بیروچی ادارهلر گه مراجعت قیلیب، پول تولهگنلر؛ بیراق اولر گه هیچ قندهی ایش یا کی تعلیم خذمتلری کورسهتیلمهگن.
بو یاشلرنینگ ایتیشیچه، ایشگه جایلشتیریش و تیزکار بورسیه آلیش وعدهلری بیلن اولر اوشبو کمپنیهلر گه ۵۰۰ افغانیدن ۱۵۰۰ دالر گچه پول تولهگن. شولردن سکیز نفری ایشگه جایلهشیش اوچون، سکیز نفری تعلیم ویزهسی آلیش اوچون و تورت نفری ایسه هر ایکی مقصدده بیر وقتنینگ اوزیده مراجعت قیلگن.
اولرگه کوره، رویخطدن اوتگنلریدن کیین نتیجه کوتگن، اما فقط بیتتهسی ایتالیا تحصیلی بورسیهسینی آلالمهگنیدن کیین قانونی یول بیلن پولینی قیتریب آلگن. قالگن ییتی نفری پولنی قیتریش اوچون ادارهلر گه ینه مراجعت قیلگن، بیراق ادارهلر جسمانی موجود بولمهگن. بیش نفرینینگ ایتیشیچه، ادارهلر اولردن قیته رویخطدن اوتیش و ینه پول تولشنی طلب قیلگن، سکیز نفری ایسه وقت اوتیش بیلن امیدینی یوقاتیب، هیچ قندهی چارهلر کورمهگن.
بو یاشلر اوزلرینی ایش و تعلیم بوییچه مصلحت بیروچی کمپنیهلر فریبگرلیگینینگ قربانی دیب بیلیشهدی. اولرنینگ بعضیلری بیشته کمپنیه نامینی کیلتیرگن، اولرنینگ ایتیشیچه، شو کمپنیهلر اولرنی الدهگن؛ بورسیه ایران، رهپویان دانش، آسترالیا، زود وظیفه و صدرای شهر ناملریده بولگن.
۲۶ یاشر و عامه کتابخانه مسئولی عبدالهادی مدبرنینگ ایتیشیچه، او تعلیمنی دوام ایتتیریش مقصدیده، ایران بورسیه ادارهسیده رویخطدن اوتگن و اداره مسئولی اونگه ۱۴ مینگ افغانی عوضیگه بیر آی ایچیده تعلیم ویزهسینی آلیش وعدهسینی بیرگن. بیراق بیر ییل اوتیب هم او هیچ قندهی نتیجه آلمهگن و بو جریاننی قیته تیکشیرمهگن.
او شوندهی دییدی: «مین اداره گه باردیم، اولر ایتدی، بیر آی ایچیده ویزهنگیزنی آلهسیز، اول تورت مینگ افغانی تولهیسیز، کیین ایسه حجتلرینگیز بیلیم یورت تامانیدن تصدیقلنگچ، ۱۰ مینگ افغانی تولهیسیز، شونده ایش باشلنهدی و ویزهنگیز کیلهدی. بیر نیچه وقت اوتدی، مین اولگی تورت مینگ افغانینی تولهدیم، بیر هفته اوتیب اولر قونغیراق قیلیب، حجتلرینگیز تصدیقلندی ایندی ۱۰ مینگ افغانی تولنگ دییدیلر. مین ۱۰ مینگ افغانینی هم تولهدیم. اولر بیر آی ایچیده دیب وعده بیرگن ایدی، بیراق شو ایش تخمیناً بیر ییلگه چوزیلدی.»
کابل یشاوچیسی ۲۰ یاشر هدیقه، ایش تاپیش مقصدیده نامینی انیقلمهگن ایشگه جایلشتیریش ادارهسیگه ۵۰۰ افغانی تولهدی. چیت ایل تشکیلاتلرینینگ بیریده قبول بولیمیده ایشلش اوچون. بیراق کوپلب وعدهلر گه قرهمی، هیچ قندهی جواب آلمهگن و بیرآز وقت اوتیب، اداره هم اوز جاییدن یوقالگنینی بیلدیرهدی.
اونگه کوره: «اولر میندن ۵۰۰ افغانی آلدی، مینگه بیر فورم بیریب، اویده تولدیرینگ، پاسپورت و صورتلرینگیزنی کیلتیرینگ دییدیلر. کیین ایتدیلر سیز گه ایمل کیلهدی، بیراق نه ایمل، نه قونغیراق کیلدی. کیین بیر آز وقت اوتیب، مین اوشه بلاک گه باردیم، لیکن اداره یوق ایدی. شو بلاک گه باشقه جایده اداره کیتدی دیب ایتدیلر.»
لوگرلیک ۲۳ یاشر دانشیار، اجتماعی ترماقلردهگی ساخته ایشگه جایلشتیریش صحیفهلرینینگ قربانی بولگن. اونینگ ایتیشیچه، بیلیم یورتنی تماملهگچ ایش ایزلهیاتگن و فیسبوک آرقهلی بیر ایشگه جایلشتیریش تشکیلاتی و اولرنینگ ادارهسیگه مراجعت قیلگن، بیراق رد جوابی آلگن. کیین اوشه کمپنیه اوندن ینه رویخطدن اوتیشنی و ینه پول تولشنی طلب قیلگن.
او شوندهی دییدی: «معیاری شکلده ثبتنام قیلیب ۵۰۰ افغانی آلهمیز و سیز یوزدن-یوز قبول بولیشینگیز ممکن دییدیلر، ینه هم قبول بولیشده همکارلیک قیلهمیز و وظیفه گه قبول بولگونچه همکارلیککه دوام بیرهمیز دیب ایتدیلر شونینگ اوچون ۵۰۰ افغانی آلهمیز.»
دایکندیلیک ۲۷ یاشر محمدرسول، ایش و تحصیل بولیمیده قربان بولگنلردن و هنوزگچه هیچ نتیجه آلمهگنلردن بیری. او شوندهی دییدی: «اصلا دولت ادارهلرگه مراجعت قیلمهدیم، البته نتیجه بیرمهگندن سونگ مراجعت قیلدیم بیراق هیچ نرسه بولمهدی.»
۲۰ نفر یاشدن فقط بیتتهسی حقوقی یول بیلن مراجعت قیلیب، خوفسیزلیک کوچلری بیلن همکارلیکده فریبگرلیک قیلگن شخصنی قانون آلدیده جوابگرلیککه تارتیش گه و پوللرینینگ بیر قسمینی قیتریب آلیشگه موفق بولگن.
بیلیم یورت اوقیتووچیسی ۲۸ یاشر مضمیر، ایتالیا تحصیلی بورسیه قربانلریدن بیری، آیلر کوتیشدن سونگ ایراندن افغانستان گه قیتگن و تیگیشلی ادارهلر گه مراجعت قیلیب کمپنیه مسئولینی انیقلهگن و مسئلهنی کابل خوفسیزلیک حوزهلریدن بیریگه شکایت قیلگنینی بیلدیرهدی.
او شوندهی دییدی: «اولرنینگ وعدهلری امید بخش ایدی. ایشنینگ اورتهسیده ایسه توشوندیم کی، اولر فقط تخمین و آمدنی سینب کوریش ایکن – نتیجه چیقسه یخشی، چیقمسه هم بیزدن پولنی آلگن. بیر هفتهدن کیین، اولرنینگ رهبرینی تاپدیم. مینگه قولیلیک یرهتگن نرسه شو کی، رهبرنی تاپیب، کابل خوفسیزلیک حوزهلریدن بیریگه عریضه بیردیم. کیین مینی ینه اوشه ییگیت آلدیگه یوباریشدی. خوفسیزلیک حوزه ییگیتنی ینه چقیریب باشلیغنی البته آلدیمیز گه آلیب کیل، تاپیب کیل، دیب ایتدی. شوندن سونگ اونی ینه چقیریشدی. یخشی هم کی، پولیمنینگ بیر قسمینی قیتریب آلدیم، آزگینه قسمینی ایسه اوزیم کیچیب یوباردیم.»
شو بیلن بیرگه، تعلیم و ایش بوییچه مصلحت خذمتلری بیلن شغلنوچی ۷ ته کمپنیه سلاموطندار بیلن صحبتده اوزلرینینگ مقصدی یاشلر اوچون قانونی خذمتلر کورسهتیش ایکنینی ایتیشدی و مراجعت قیلوچیلر اولرنینگ خذمتلریدن تولیق ممنون ایکنینی بیلدیریشدی. صحبتده آسیا دانش مصلحت کمپنیهسی، دانش راحت، اکبر آنلاین خذمتلری، یاران نور سیاحلیک و زیارت کمپنیهسی، منگل تعلیم کمپنیهسی، کابل اسکالرشیب و اساس کمپنیهسی مسئوللری اشتراک ایتدی.
کابللیک ۲۹ یاشر احسانالله آیدین، «خذمات آنلاین اکبر» کمپنیه مسئولی، اولرنینگ ادارهسیگه مراجعت قیلگنلرنینگ تعلیم بورسیهلری و ایش یونهلیش بوییچه ۹۵ فایزی خذمتلردن ممنون ایکنینی بیلدیرهدی.
او شوندهی دییدی: «مجازلرنینگ اکثریتی راضی بولگن – ۹۵ فایزدن آرتیغی. البته، ناراضی مجازلر هم اوچرهیدی، تخمیناً ۵ فایزی ناراضی بولیشی ممکن. برچه ایش اورینلری یا کی تعلیم بورسیهلری رسمی سایتلر آرقهلی اعلان قیلینهدی و بیز حجتلرنی تیارلش همده رویخطدن اوتکزیشده مجازلر گه خذمت کورستهمیز.»
تعلیم بوییچه مصلحتچی مرتضا فلاح، تعلیم بورسیهلری ساحهسیدهگی اینگ کتته معما یاشلرنینگ بورسیه جریانی و شرطلریدن بیخبر ایکنینی ایتهدی. اونگه کوره: «بیزنینگ اساسی معمامیز – آدملر یا کی یاشلرنینگ تعلیم بورسیهلری حقیده ییترلی معلومات گه ایگه ایمسلیگی دیر. افسوس کی، کوپلب یاشلر تعلیم ویزهسینی قولگه کیریتگچ، اوقیشنی تشلب یوبارهدی یا کی اوقیشنی دوام ایتتیرمهیدی.»
باشقه تاماندن، حقوق شناسلر، اولگی حکومتنینگ جنایت قانونی همده فقهی متنلر گه اساسلنیب، آدملرنی الدهش، فریبگرلیک قیلیش و اولرنینگ بیلیمسیزلیگیدن سوء استعمال قیلگن شخصلر جنایتچی حسابلنیشینی معلوم قیلهدیلر.
حقوق شناس مدثر ممتاز شوندهی دییدی: «اولگی جنایت و فقهی متنلر گه کوره، بوندهی شخصلر الداوچی، فریبگر حسابلنهدی. بو شخصلرنینگ جزاسی بیرینچی نوبتده آدملردن آلینگن پولنی قیتیریشدن عبارت بولیب، بو مبلغ اولردن آلینیب جبرلنگن شخص گه بیریلهدی. ایکینچیدن بو شخصلر گه تعزیر جزاسی قوللنهدی – ایش حجمی گه قرهب تعزیری قماق جزاسی بیریلهدی و اولرنینگ فعالیت اوچون جوازی بیکار قیلینهدی.»
شو بیلن بیرگه، ایش و اجتماعی ایشلر وزیرلیگی سوزلاوچیسی سمیعالله ابراهیمی سلاموطندار بیلن صحبتده ایتیشیچه، بو وزیرلیک ایش امکانیتلری ساحهسیده فعالیت یوریتوچی کمپنیهلرنینگ جوازینی نظارت قیلهدی، بیراق بعضی سیاحلیک و زیارت کمپنیهلری خارجده ایش یا کی تعلیم ویزهلری بوییچه ریکلام شکلیده خذمتلر کورستماقده و اولر بو وزیرلیکدن جواز آلمهگن.
اونینگ کوپهیتیریشیچه: «بونینگ اوستیگه، بعضی سیاحلیک و زیارت کمپنیهلری خارجده ایش یا کی تعلیم ویزهسی بوییچه ریکلام شکلیده خذمت کورستماقده، بیراق بو کمپنیهلر جوازنی ایش و اجتماعی ایشلر وزیرلیگیدن آلمهگن. عکسینچه، وزیرلیکدن جواز آلگن کمپنیهلر منتظم روشده نظارت و تیکشیریلهدی، شونده اولرنینگ فعالیتی قانونی قالهدی و معما یوزه گه کیلسه، قانونی یوللر آرقهلی کوریب چیقیلهدی.»
اوشبو کمپنیهلرنینگ جوازی صادر قیلینیش جریانی و قانونی تیکشیریلیشی بارهسیده اخبارات و مدنیت، عدلیه و ایچکی ایشلر وزیرلیکلرینینگ فکر-ملاحظهلرینی اورگهنیشنی ایستهدیک؛ بیراق کیتمه-کیت سعی-حرکت بیلن موفقه بولمهدیک. شونینگدیک، همکسبلریمیز اخبارات و مدنیت وزیرلیگیگه ایشگه جایلشتیریش ادارهلری و تعلیم بورسیهلرینینگ نظارت صلاحیتینی تیکشیریش اوچون مراجعت قیلگنده، مسئول شخصلر بو مسئله اولرنینگ وکالت دایرهسیگه کیرمسلیگینی بیلدیردی.
بو گزارش تیارلنگونیگه قدر قوشیمچه علاقه اورنهتیش و انیقلیک کیریتیش بوییچه اورینیشلر هم نتیجه بیرمهدی. تأکیدلش جایز کی، اوشبو یاشلر اوزلرینینگ تعلیم و ایش ساحهسیدهگی خواطر و معمالرینی ایتهیاتگن بیر پیتده، ییترلیچه نظارتنینگ یوقلیگی، یاشلرنینگ ایش جوازی و کمپنیهلرنینگ قانونیلیگینی اعتبارسیز قالدیریشی ایش و تعلیم ساحهسیدهگی ساخته فریبگرلیکلرنینگ کینگهیشیگه زمین یرهتیشی ممکن.
