هوا ساووقلیگینی یوزینینگ قیزیللیگی و ییللر بویلب چیدهگن حیات قیینچیلیکلرینی ساچیگه توشگن آقلر و بوکیلگن قامتیدن بیلیش ممکن. او، تیترهگن قوللری بیلن دسترخوانیدهگی نان اونگه باغلیق بولگن ایچکی و تاووقلریگه قوروق اوتنی سیپماقده.
قندوز ولایتی قلعهیذال تومنینینگ «بیش کیپه» قیشلاغیدهگی ۶۵ یاشر بیبیگل، هر کونی قویاش چیقیشی بیلن نیچه ایچکی و تاووق سقلنگن، حویلیسینینگ بیر چیککهسیدهگی مالخانهگه بارهدی. کوپ یاش یشهب و اونچهلیک کوچ-قوتی قالمهگنی چاروهچیلیکنی اونگه قیینلشتیرگن بولسهده، لیکن ۹ کیشیلیک عایلهسینینگ دستلبکی نیازلرینی تامینلش اوچون اوچ ییلدن بویان مجبورلیک بیلن بو ایشگه باشلهگنینی بیان قیلهدی. «عایله اقتصادی مسئولیتی مینی بوینیمگه. ایچکی و تاووق سقلهیمن. اوچ ته ایچکیم بار، شونینگدیک ۳۰ ته تاووغیم بار ایدی که حاضر ۱۲ تهسی قالگن. اوچ ییلدن بیری چاروهچیلیک بیلن حیاتنی اوتکزهمن.»
بیبیگل، کیچه و کوندوزیدن کوپینچهسینی چاروهلر ییرینی تازهلش، اولرگه سامان، سوو و دانه تیارلش همده سوتلرینی ساغیش بیلن اوتکزهدی و کونده تورت-بیش ساعت چاروهچیلیک ایشلری بیلن شغللنهدی که بو ایش، یاز موسومیده هوانینگ ایسیق بولیشی بیلن کوپراق وقتینی آلهدی. «کیچهوکوندوز چاروهچیلیک ایشلری بیلن شغللنهمن. اولرنینگ ییرینی تازهلهیمن، سوو و دانهلرینی تیارلهیمن. شونینگدیک سوتینی ساغهمن. کونده ۴-۵ ساعت بو ایشلر بیلن شغللنهمن. بیراق یاز موسومیده بو ایشلر کوپ وقت آلهدی.»
او، دایم تیزهلری آغریشیدن اذیت چیکیشینی بیان قیلیب و ایتیشیچه، حاضر ایشلش و چاروه باقیش اوچون اونچهلیک کوچی قالمهگن لیکن حیات، بو قیینچیلیکلرنینگ چیدهشگه مجبور قیلگن. «چاروه باقیش کوپ قیین دیر، لیکن بو ایشنی قیلمسم آچ قالهر ایدیک. یاشیم کوپ بولسهده ایشسیزلیک و کمبغللیکدن بو ایشگه یوز کیلتیردم. اوشبو یولدن کیچه و کوندوزیمیزنینگ نانینی تاپهمیز. قیینچیلیکلر کوپ دیر. کیکسهمین و بو یاشده ایشلماق هم بولمهیدی. تیزهلریم آغریدی، بیراق مجبورلیک دیر.»
چاروهچیلیک بیبیگل اوچون یالغیز کوندهلیک ایشلرینینگ بیر قسمی ایمس؛ بلکیم عایلهسینینگ اصلی درآمد منبعسی حسابلنهدی. اونگه کوره، ییلده چاروهچیلیک و تاووقچیلیک آرقهلی ۳۰ مینگدن ۵۰ مینگ افغانیگچه درآمد قولگه کیلتیرهدی و بو آز درآمد بیلن عایلهسینینگ کوندهلیک صرف-خرهجتلرینی تامینلهیدی. «ییلده چاروهچیلیک و تاووقچیلیک آرقهلی ۳۰ مینگدن ۵۰ مینگ افغانیگچه درآمد قولگه کیلتیرهمن. برچه صرف-خرهجتلر بو یولدن دیر. باش ییللرده یخشی ایدی، بیراق حاضر اهالی کمبغللیک سبب سوت و قتیق ساتیب آلمهیدی. آلگنلریده هم کوپ ارزان، بیر گیلاس سوتنی ۳ افغانی آلهدیلر. حاضر دکاندارلر بیر کیلو قتیقنی ۳۰ افغانیگه ساتیب آلهدیلر.»
بیبیگل، وقتیدن کوپراغینی ایشلش و درآمد قولگه کیلتیریشگه قویسهده، لیکن بو یولدن قولگه کیلتیرهدیگن پول آز بولیب و آزیق-آوقت نیازلرینی تامینلشدن کیین دوالنیش نیازلرینی تامینلش اوچون هیچ بیر نرسه قولیگه قالمهیدی.
او، تیزهلری آغریغینینگ بیراز آرام بولیشی اوچون یالغیز پرستامول ساتیب آلالهدی. «بو یولدن قولگه کیلتیرهدیگنیم پول بیلن یالغیز آزیق-آوقت و کییم-کیچگ توغریسیدهگی نیازلریمیزنی بیراز حل قیله آلهمن. ساووق اوچون تیزهلریم آغریدی، لیکن دوالش اوچون پولیم یوق. کسل بولگنیمده یالغیز بیر پرستامول ساتیب آلهمن و ییهمن.»
کوندهلیک آغریقلر و کیکسهلیک بیلن، بیبیگل ینه هم هر کونی چاروهلری ایشلریگه شغللنهدی و اوز ایاغی اوستیده توختهش بیلن، حیاتینینگ یکونلنمهگن قیینچیلیکلر چرخهسینی دوام بیرهدی که بو سعیوحرکتلر، کون اوتیشی بیلن قیینراق بولهدی.
