سمنگان ده یوز بیرگن زلزله نتیجهسیده یقینلرینی قولدن بیرگن عایلهلردن قطارینینگ ایتیشلریچه، روحی نقطهی نظریدن زیان کورگنلر.
سمنگان ولایتی خُلم تومنی یشاوچیلریدن بیری، ۳۸ یاشر مرجان، زلزله یوز بیرگن کونیده اوزی و بالهلری باشیدن اوتگن واقعهنی، بیر دهشتلی توش صفتیده ایسلهیدی. بیر مکتب بناسیده بالهلری بیلن کیچهوکوندوز نی اوتکزهدیگن بو عیالنینگ ایتیشیچه، بالهلری اوشبو زلزلهدن قوریب قالگن و اویلریگه قیته باره آلمهیدیلر. اونینگ سلاموطندار گه ایتیشیچه: «زلزله بولگن کیچه، اوچ بالهم جودهیم قورققن ایدی. قوللریدن توتیب اویدن چیقردم. قیزیم حاضرگچه قورقهدی و اویگه قیته باره آلمهیدی.»
مرجاننینگ کوپهیتیریشیچه، زلزله یوز بیرگنیدن کیین بیر کیچهنی باغ و بیر کیچهنی ایسه برنده آستیده، یامغیر و شمالده اوتکزگنلر. او، حیاتینینگ حاضرگی قیینچیلیکلریگه اشاره قیلیب و مالی یاردم بیریلیشینی سورهگن.
خُلم تومنی یشاوچیلریدن و زلزلهدن جبرلنگنلردن باشقه بیری عبدالغفار، باشپنهسیزلیک و حیاتنینگ دستلبکی امکانیتلریدن فایدهلنه آلمسلیگیدن خواطر بیریب و ایتیشیچه، حاضرگچه جبرلنگنلرگه بیریلگن یاردملر، دریا گه بیر قطره سوو کبی دیر.
او، زلزلهدن جبرلنگنلرگه کوپراق یاردم بیریلیشینی ایستهب و کوپهیتیریشیچه: «بیر مقدار یاردم بیریلدی؛ لیکن آز دیر. باشقه هیچ نرسه بیریلمهگن. دولت، نهادلر و موسسهلردن بیزلرگه یاردم بیریلیشینی ایستهیمیز؛ چونکه برچه نرسهمیزنی قولدن بیردیک.»
سمنگان ولایتی خُلم تومنیده محلی مسئوللرنینگ ایتیشلریچه، حاضرگچه جبرلنگن عایلهلرگه یاردم بیریلیش اوچون نهادلردن قطاری اقدام قیلگنلر.
خُلم تومنی بلدیهسی خیرالله خیرخواهنینگ ایتیشیچه، خلقارا آزیق-آوقت دستوری آرقهلی ۲۰۰ عایله و بیر قطار موسسهلر آرقهلی باشقه ۱۰۰ عایلهگه خیمه، آزیق-آوقت، تیار آوقت و نقد پول یاردم بیریلگن.
اسلام امیرلیگی ساغلیقنی سقلش وزیرلیگینینگ سونگی معلوماتی اساسیده، افغانستان شمالیده یوز بیرگن زلزلهده ۲۷ کیشی قربان بولگن. اوشبو وزیرلیککه کوره، بو زلزلهده ۹۵۶ کیشی یرهلنگن.
۱۲ عقرب، دوشنبه کونی ایرتنگ چاغی، بلخ و سمنگان شامل مملکتنینگ بیر قطار ولایتلریده زلزله یوز بیردی.
