۱۲-عقرب ده یوز بیرگن زلزله، بلخ ولایتی مارمل تومنی «خراسان و پشت باغچه» تومنلریده جایلشگن بیر تاغنینگ قویی قسملریده کوچلی سیلجیش و تاشلر توکیلیشیگه سبب بولگن که خواطرلنتیرووچی بو واقعه، ینه تاغدن تاش-توپراقلر توشیشی همده اویلر و علاقه یوللرگه زیان ییتیشیشی احتمالینی آشیرگن. محل یشاوچیلرینینگ ایتیشلریچه، سونگی زلزلهده کمیده ۲۰ یشش اوی ویران بولیب و حاضر ایسه قیش موسومی ییتیب کیلیشی و یاغینگرچیلیک احتمالی بیلن باشقه ۲۰۰ گه یقین اوی هم تاغ سیلجیشی طفیلی توغری تهدید آستیده قرار تاپگن.
مارمل تومنی یشاوچیلریدن بیری هاشم، اویلرنینگ کینگ کولملی شکلده خراب بولگنیگه اشاره قیلیب و ایتیشیچه، یوز بیرگن زلزله و تاغ سیلجیشی نتیجهسیده قریب ۲۵ یشش اوی بوزیلگن. «بو تاغ جودهیم بلند دیر. اوشبو تاغ سیلجیشی نتیجهسیده، ۲۵ یشش اوی بوزیلگن. مذکور تاغنینگ قویی قسمیده ۱۰۰ دن آرتیق یشش اوی بار که یشاوچیلر قیینچیلیک بیلن حیات کیچیرهدی. کیچه قورقوو بیلن اوخلهب و ایرتهلب آراملیک بولگنی اوچون شکرگذارلیک بیلن اویغلنهدیلر. یاغینگرچیلیک بولگنیده باشقه اویلرنینگ خراب بولیشی ممکن. دولتده بو قیینچیلیکنینگ حل بولیشینی ایستهیمیز. بیران جاینی تنلهسین که بارهیلیک.»
مارمل تومنی یشاوچیلریدن باشقه بیری ذکرالله، زلزله یا-ده قیش موسومیدهگی یاغینگرچیلیکلر طفیلی تاغنینگ اَیری قسملری ییقیلیشی احتمالیدن آگاهلنتیرگن. «سوو تاشقینی و یاغینگرچیلیک بولگنیده، قریب ۲۰۰ یا-ده ۳۰۰ اوی تهدید آستیده قالهدی. بو توغریده دولتنینگ توجه قیلیشینی ایستهیمیز. بو منطقهنینگ بیر چیکهسینی بیرسین که باریب آراملیک بیلن حیات کیچیرهیلیک.»
بلخ ولایتی مارمل تومنینینگ خراسان و پشتباغچه قیشلاقلری یشاوچیلریدن قطاری خواطر بیلدیریب، حکومت و یاردم بیرووچی نهادلردن، مذکور توپراقلی تاغنینگ قیته سیلجیشی احتمالی زیانلری آلدی آلینیشی اوچون بیرقطار اقداملرنینگ قولگه آلینیشینی سورهگنلر. اوشبو تومن یشاوچیلریدن طاهر قانتنینگ ایتیشیچه، کیلهسی احتمالی خطرلردن امان قالیش اوچون بو محل یشاوچیلریگه اویلری قوریلیشی مقصد بدیل جایلر یرهتیلسین. «حکومتدن جبرلنگن کیشیلرگه باشپنه قوریشی یا-ده ییر ترقهتیشینی ایستهیمیز. بو ییر باشقه تینچ ایمس و اوشبو جایده حیات کیچیریش حقیقتده بیر خطا دیر.»
شوندهی بیرحالده، بلخ ولایتی مارمل تومنینینگ قیشلاقلر بوییچه مدیری حبیبالرحمان حبیب، اوشبو قیشلاقلردهگی یشاوچیلر خواطرلرینی تصدیقلب و ایتیشیچه، بو تاغنینگ قویی قسملریده حیات کیچیریش خوفلی بولیب و محل یشاوچیلری اوچون باشپنه قوریلیشی توغریسیده مناسب بیر جاینینگ نظرگه آلینیشی کیرهک. «تاغ سیلجیشی بولگن قیشلاقلرده باشقه تیریکچیلیکنینگ امکانی یوق. دولت و بویوکلردن بو اهالیگه بیر ساحهنینگ تعیینلنیشینی ایستهیمیز. شهرچه قورسین و بو اهالینی او ییرگه انتقال بیرسین، چونکه هر لحظه هم تاغ سیلجیشی خوفی بار.»
بوندن آلدین، سمنگان ولایتی خُلم تومنی یشاوچیلری یوز بیرگن سونگی زلزله نتیجهسیده مذکور تومندهگی بیر تاغده یاریقلر تاپیلگنیدن خبر بیرگنلری بیرحالده، بلخ ولایتی مارمل تومنی یشاوچیلری هم، قیشلاقلریده بیر تاغده یاریقلر تاپیلگنی و سیلجیشیدن خواطر بیلدیرگنلر که بو واقعه، مملکتنینگ شمالیده یوز بیریشی ممکن بولگن زلزلهلرنینگ عاقبتلریگه دایر خواطرلرنی کوچهیتیرگن.
