لوگر یشاوچیلریدن بیرقطاری، سلاموطندار بیلن صحبتده، اقتصادی قیینچیلیک سببلی کسللرینی طبی مرکزلر گه آلیب باره آلمسلیکنی ایتهدیلر. اولرنینگ ایتیشیچه، اقتصادی قیینچیلیک سببلی کسللریگه شفاکارلردن مصلحت سورهمسدن دارو بیریشگه مجبور.
لوگر مرکزی پلعلم یشاوچیسی سمیعالله، اقتصادی قیینچیلیک طفیلی کسلینی شفاکار گه آلیب باریب و کوریکدن سونگ، دارو آلیشگه قوربی ییتمسلیگینی بیلدیرهدی.
اونگه کوره، اوزی و باشقه یوزلب عایله خوددی شوندهی معما گه دچار و کسللریگه شفاکاردن مصلحت سورهمسدن دارو بیریشهدی. او شوندهی دییدی: «اویده کسل بار و کوپینچه اقتصادی قیینچیلیکلر سببلی اونگه داروخانهدن دارو-درمان آلیب بیرهمن. اینگ کتته معما شونده کی، شفاکارلر یوقاری حق آلهدی، دارولر هم قیمت نرخده ساتیلهدی. شونینگ اوچون مین کبی کوپلب کسل قرهیدیگن عایلهنینگ قوربی ییتمهیدی.»
لوگر برکی برک تومنی یشاوچیلریدن بولمیش احمد، یشاوچیلر اوز باشیمچه دارو استعمال قیلیش یامان عاقبتلری بارهسیده خبرلری بولسه-ده، بیراق اقتصادی قیینچیلیک سببلی کسللریگه شفاکار آلدیگه آلیب بارمسدن دارو بیریشلرینی ایتهدی.
او حکومتدن، بو ولایت مرکزی و تومنلریده طبی مرکزلر سانینی آشیریب و کمبغل عایلهلر طبی خذمتلردن اساسی شکلده فایدهلنیشنی ایستهیدی. اونگه کوره: «لوگرده کوپلب آدملرنینگ اقتصادی احوالی آغیر. کوپلب شفاکارلر یوقاری حق آلهدی. حتا عادی کسل هم مراجعت قیلسه، دارولر بیلن بیرگه بیرمینگ یا کی ایکی مینگ افغانیگچه مصرفی بولهدی. بونگه کمبغل عایلهلرنینگ قوربی ییتمهیدی.»
باشقه تاماندن، لوگر ولایتیده شفاکار مزمل مقبلنینگ ایتیشیچه، شفاکاردن مصلحت سورهمسدن دارو استعمال قیلیش، کسل احوالی آغیرلشیب، یامان عاقبتلری و حتا حیاتینی قولدن بیریشگه آلیب کیلیشی ممکن.
او، کسللر و پایوازلردن هر قندهی دارو استعمال قیلیشدن آلدین شفاکاردن مصلحت سورهب و لازم بولگن کوریکنی بجریشلرینی سورهیدی.
اونینگ فکریچه، بیر کسل اوچون بیریلگن نسخه، احتمال باشقه کسلگه ماس کیلمسه، چونکی یاش، ساغلیق احوال و کسل توری فرقلی دیر.
شو بیلن بیرگه، لوگر ساغلیقنی سقلش باشلیغی زرک زیرک، بو ولایت مرکزی پل علم شهری و باشقه تومنلریده طبی مرکزلر فعال و کسللر گه ضرورت اساسیده طبی خذمت کورستماقدهلیگینی معلوم قیلهدی.
او، یشاوچیلردن اوز باشیمچهلیک بیلن دارو استعمال قیلمهی و کسللرینی دولت شفاخانهلریگه آلیب باریشنی ایستهیدی. او شوندهی دییدی: «رهبریتیمیزنینگ ساغلیقنی سقلش ساحهسیدهگی اساسی شعاری – کسللر گه صفتلی و اوز وقتیده خذمت کورسهتیش دیر. حاضرده لوگر ولایتی بوییچه اونلب طبی مرکزلریده ۱۵۰ توردهگی دارو-درمانلر موجود و بیز ۲۴ ساعت دوامیده کمبغل، قیتیب کیلگن همده سیل آفتلریدن ضرر کورگن عایله و کسللر گه طبی خذمت کورستماقدهمیز. شونینگدیک، تیز یاردم خذمتلری هم ۲۴ ساعت دوامیده خلق خذمتیگه تیار.»
یشاوچیلر اقتصادی قیینچیلیککه دوچ بولسه-لرده، طب متخصصلری یشاوچیلردن کسللیک پیتیده اوز باشیمچهلیک بیلن دارو استعمال قیلیش اورنیده شفاکار و کسلخانهلر گه مراجعت قیلیب و احتمالی خطرلر آلدینی آلیشنی ایستهیدیلر.
