افغانستان اینیقسه غزنی ولایتیده قوروقچیلیکلر و اقلیم اوزگریشلری دوامی، مینگلب عایلهنینگ حیاتینی تاثیر آستیده قوییب و بو وضعیت اولرنینگ توغیلگن جایلرینی ترک قیلیشگه مجبور قیلگن. اوشبو وضعیتنینگ دوام قیلیشی بیلن، دهقانلر و چاروهلرچیلردن کوپ قطاری قیشلاقلرینی ترک قیلیب و غزنی شهریگه مهاجرت قیلیشگه مجبور بولگنلر که بو ییرده ایکینچیلیک و چاروهچیلیک اورنیده، باشقه ایشلر بیلن شغللنگنلر.
غزنی ولایتی «جرمتو» قیشلاغی یشاوچیلریدن بیری نوید، حیات کیچیرهدیگن تومنیده جدی شکلده قوروقچیلیک و ییترلی سوو یوقلیگی سبب، غزنی شهری مرکزیگه کوچ قیلیب و حاضر ایسه آزیق-آوقت ساتیلهدیگن بیر دکانده ایش بیلن شغللنگن. اونینگ ایتیشیچه: «تومنیمیزده هیچ سوو قالمهگن؛ هر قیشلاقده اوچ-تورت اوی قالگن؛ اهالی سوو یوقلیگی اوچون شهر ایچیگه کوچ قیلگن. اوزیم هم دهقان ایدیم و حاضر ایسه دکاندارمین. اهالینینگ سوو توغریسیدهگی قیینچیلیگی حل بولگنی صورتده، اهالی قیته ایکیش یوز کیلیترهدی.»
بیزلرنینگ «ایکس» ترماغی ده هم تعقیب قیلینگ!
بوندن آلدین اوشبو ولایت قرهباغ تومنیده ایکینچیلیک و چاروهچیلیک بیلن شغللنگن غزنی یشاوچیلریدن باشقه بیری عزیزالله، اوتگن ییلی جدی قوروقچیلیک طفیلی غزنی شهری مرکزیگه کوچ قیلگن. اونینگ سلاموطندار گه ایتیشیچه: «منطقهمیزده کوپینچه باغ و ییریمیز بار؛ بیراق سوو یوق. مجبور بولیب شهر گه کیلدیک. کاریزلر قوریگن، اهالی برمه اوردی، بیراق هر ییلی سوو کمهیهدی. اوتگن ییلی غزنی شهریگه کیلدیک، منطقهمیزده سوو یوق و اهالی مجبور بولیب، او ییرده قالگن. قوروقچیلیک کوپهیگن.»
شوندهی بیرحالده، غزنی ده ایکینچیلیک ایشلری بوییچه ایش بیلرمان صالحمحمد غزنوی، اقلیم اوزگریشلری و قوروقچیلیک بیلن قرشی کورهش توغریسیده، سوونینگ حددن تشقری فایدهلنیشی آلدی آلینیشی، زمانهوی سووغاریش سیستملرینی تنلش و سوو توغانلرینینگ قوریلیشینی تکلیف بیرهدی. «قوروقچیلیکلر و جبری کوچ قیلیشلر طفیلی اهالینینگ قیشلاقلردن شهر گه بارمسلیگی اوچون، سوونینگ حددن تشقری فایدهلنیلمسلیگی کیرهک. شونینگدیک قطرهای سیستملر رواجلنیب و سوو توغانلری قوریلیشی کیرهک. چقور قودوقلر قازیلیشی آلدی آلینسین. بو ایشلر صورت تاپگنیده هیچ کیم مهاجرت یا-ده کوچ قیلمهیدی.»
شوندهی بیرحالده، غزنی ایکینچیلیک، سووغاریش و چاروهچیلیک ریاستیده مسئوللرنینگ اورغولشیچه، قوروقچیلیکلر و اقلیم اوزگریشلری مذکور ولایتدهگی ایکینچیلیک و چاروهچیلیک بولیملریگه سلبی تاثیرلرنی قوییب و شونینگدیک عایلهلرنینگ بیجا بولیشیگه هم سبب بولگن.
بیزلرنینگ فیسبوک صحیفهمیزگه باش اورینگ!
غزنی ایکینچیلیک ریاستیدهگی مسئوللردن بیری محمدزکریا هوتکنینگ سلاموطندار گه ایتیشیچه: «تورلی ساحهلردهگی دهقانلر، باغدارلر و چاروهچیلر سوو یوقلیگی سبب ساحهلریدن غزنی مرکزی و باشقه منطقهلریگه بیجا بولگنلر. ناوه، آببند، گیرو، جاغوری، مالستان، ناور و زنهخان تومنلریدهگی دهقانلر و چاروهچیلریمیز، سونگی قوروقچیلیکلر طفیلی کوپینچه زیان کورگنلر. ایته آلهمیز که، چاروهلر اوچون ییترلی اوت و ایکینلرنی سووغاریش اوچون ییترلی سوو یوقلیگی توغریسیده هم دهقانلریمیز و همده چاروهچیلریمیز زیان کورگن.»
قوروقچیلیکلر و اقلیم اوزگریشلری نه فقط غزنی یشاوچیلری بلکیم افغانستاننینگ تورلی ولایت یشاوچیلری حیاتینی تهدید قیلهدی. بو قیینچیلیکلرگه قرشی کورهش انیق ریجهلشتیریش، سوو منبعلرینی درست سقلش و ایکینچیلیک و چاروهچیلیک اصوللرینینگ اوزگریشینی طلب قیلهدی. سوو منبعلرینی مدیریت قیلیش و قوروقچیلیکلر بیلن قرشی کورهش اوچون فایدهلی و تیز اقداملر صورت تاپمهگنیده، کیلهجکده مهاجرتلر کوپهیشی و انسانی بحران گه گواه بولیشیمیز ممکن.
