شفاکارلرنینگ آگاهلنتیریشیچه، حاملهدارلیک دورهسیده عیاللرگه قرشی زورهوانلیک، قیتریب بولمهیدیگن عاقبتلرگه آلیب کیلهدی. عیاللردن قطاری سلاموطندار بیلن اوتکزگنلری صحبتلرده، بو دورهده جدی زورهوانلیکلر بیلن روپهره بولیب و حتا چقهلاقلرینینگ توشگنینی بیان قیلهدیلر.
مذکور عیاللرنینگ ایتیشلریچه، کوپراق قیز فرزندیگه حاملهدار بولگنلری طفیلی، زورهوانلیک بیلن روپهره بولگنلر. زرلشت بو عیاللردن بیری دیر، او تورموش اورتاغی تامانیدن کلتکلهنیب و جدی شکلده قان کیتیشدن کیین قارنیدهگی نیچه آیلیک قیزینی قولدن بیرگن. «حاملهدارلیگیمنینگ آلتینچی آیی ایدی، شفاکارلر قیز دیدیلر. جودهیم خوش ایدیم؛ اویگه ایتگنیمده عایلهده هیچ کیم خوش بولمهدی. تورموش اورتاغیم بیر کونی جنجل قیلدی، یاغاچ بیلن قارنیمگه اوردی. قان کیتدی و کسلخانه گه بارگنیمده بچهدان ایچیده چقهلاق اولگن ایکن. روحی قیینچیلیککه روپهره بولدیم. ینه هم حاملهدار بولسم و قیز بولسه، ینه نیمهلر بوله دیب توشینهمن.»
شونینگدیک ۲۹ یاشر نظیفه و ۳۴ یاشر زرمینه هم عایله زورهوانلیگینی بیان قیلهدیلر. نظیفهنینگ ایتیشیچه: «حاملهدارلیک دورهسیده سینی کلتکلهمیز دیهر ایدیلر؛ اینیقسه قیین آنهم. هیچ چارهم یوق ایدی، اولتیریب ییغلهر ایدیم. قیز و بیز قیزدن خوشیمیز کیلمهیدی دیهر ایدیلر.»
شونینگدیک زرمینهنینگ ایتیشیچه: «تورموش اورتاغیم آرقهلی کلتکلندیم؛ حتا نیچه مرته قولیم سیندی؛ بیر مرته چقهلاغیم توشدی. هر مرته مینی کلتکلهر ایدی. اوشبو زورهوانلیکلر اوچون بالهلریمنینگ روحی وضعیتی هم یخشی ایمس.»
شوندهی بیرحالده، شفاکارلر حاملهدارلیک دورهسیده زورهوانلیکنینگ آنه و بالهلر اوچون جسمی و روحی عاقبتلریدن آگاهلنتیرهدیلر. بو توغریده نسایی-ولادی متخصص شفاکاری سعیده سعیدینینگ ایتیشیچه: «حاملهدارلیک دورهسیدهگی زورهوانلیک آنه و چقهلاق اوچون خوفلی دیر و بو یالغیز فیزیکی ضربه ایمس، روحی استرس هم جدی عاقبتلرنی یرهته آلهدی و وقتدن آلدین چقهلاقنینگ توغیلیش خوفینی کوپهیتیره آلهدی. شونینگدیک قارینگه ضربه اوریلیشی همراهینینگ اَیریلیشی، قان کیتیشی، بچهدانی ایرتیلیشی و حتا بچهدان ایچیده چقهلاق اولیشیگه سبب بولیشی ممکن.»
شونینگدیک روانشناسلردن محمدالله بلوچنینگ ایتیشیچه، حاملهدارلیک دورهسیده زورهوانلیک آنه اوچون جدی روحی قیینچیلیکلرنی یرهتیب و جنیننینگ توشیشیگه سبب بولیشی ممکن. «عایلهوی زورهوانلیکلر حاملهدار عیال اوچون اوچ تاثیری بار: بیرینچیسی، روحی قیینچیلیکلر کوپهیشی دیر که جنین توشیشی یا-ده ساغلیگیگه زیان ییتیشیشیگه سبب بوله آلهدی. ایکینچی، آنهنینگ افسرده بولیشی دیر که چقهلاققه جدی زیان ییتیشتیرهدی. اوچینچیسی، عیاللر یاندهشوویده قیینچیلیک اورته گه کیلیشی دیر که جنین میهسیدهگی فایدهلی قوتلی هورمونلر کمهیشی گه سبب بولیب و جنین رشدی فعالیتینی قیینچیلیک بیلن روپهره قیلهدی.»
دین عالملری هم، عیاللر اینیقسه حاملهدار عیاللرگه قرشی زورهولیکنی شرعی نقطهی نظریدن حرام بیلهدیلر. دین عالملردن قطبالدین مجتهدنینگ ایتیشیچه، هیچ کیم حاملهدار عیالگه زورهوانلیک قیلیش حقیگه ایگه ایمس. اونگه کوره، بو کبی زورهوانلیک یوز بیریب و نتیجهده جنین اورتهدن کیتگنی صورتده، حنفی فقهسیده جنایت قیلگن کیشیگه «غُرّه» واجب بولهدی. «حنفی فقهسیده تورموش اورتاق یا-ده باشقه بیر کیشی حاملهدار عیالگه ضربه اورگنی و اوشبو ضربه جنین گه زیان ییتیشتیریب و جنیننینگ اورتهدن کیتیشی و اولیب دنیا گه کیلیشیگه سبب بولگنیده، غُرّه واجب بولهدی؛ یعنی بیر برده یا-ده اونینگ وقتیمیزده قیمتی مالی شکلده توللنیهدی و جنین تیریک دنیا گه کیلیب و کیین اولگنیده، دیه توللنیشی واجب بولهدی.»
«غُرّه»، ضربه یا-ده زیان طفیلی جنین توشیشی عوضیگه آنه گه توللنیلهدیگن مالی پول دیر.
اسلام امیرلیگی امربالعروف و نهی عنالمنکر وزیرلیگی سوزلاوچیسی سیفالاسلام خیبرنینگ بوتوغریده سلاموطندار گه ایتیشیچه: «افغانستان ده هر ایکی اویدن بیر اویده زورهوانلنیک بار. بو بولیمده اوتگن تورت ییلده قریب ۲۰۰ مینگ قضیه بار ایدی که عایلهلرنینگ عایلهوی قیینچیلیگی حل بولدی. کونده زورهوانلیک و عایلهوی قیینچیلیکلرگه تیگیشلی ۱۰ قضیه تیکشیریلیب و حل بولهدی.»
شوندهی بیرحالده، حاضرگچه عیاللرگه قرشی عایلهوی زورهوانلیک قربانلریدن کوپ قطاری حکومتی جایلرگه بارمهی و قانونی حمایتگه ایگه بولمسدن، آنه و جنین سلامتلیگینی جدی شکلده تهدید قیلهدیگن عایلهلریدهگی زورهوانلیکلر دوامینی چیدهگنلر.
