۲۴-مارچ، خلقارا توبرکلوز یا-ده سل کسللیگی کونیگه ماس دیر. اوشبو کون بیلن بیرگه، بیرلشگن ملتلر تشکیلاتی ترقیاتی دستوری افغانستان بولیمینینگ ایتیشیچه، اوتگن ییلده افغانستان بویلب بو کسللیککه چلینگن ۵۰ مینگ کیشیگه دوالنیش خذمتلرینی کورستگنلر.
مذکور نهاد، افغانستان ده توبرکلوز کسللیگی بیلن قرشی کورهش، بو کسللیکنینگ تیزلیکده انیقلنیش امکانیتی یرهتیلیشی و دوالنیش خذمتلری کورسهتیلیشی توغریسیده، خلقارا اقدامنی سورهگن.
شوندهی بیرحالده، چیگره بیلمس شفاکارلر تشکیلاتینینگ ایتیشیچه، ۲۰۲۵-ییلده قندهار ده بالهلر آرهسیده توبرکلوز کسللیگیگه چلینیش، ایکی برابر کوپهیگن. چیگره بیلمس شفاکارلرنینگ افغانستان بولیمیگه کوره، توبرکلوز کسللیگیگه چلینگن بالهلرده یاشی بویوک بولگن کیشیلردهگی بیلگیلر کوریلمهگنی سبب، اونینگ انیقلنیشینی قیینلشتیرگن.
قندهار ده چیگره بیلمس شفاکارلرنینگ آزیقلنیش بولیمی بوییچه طبی نظارتچیسی ضیاءالرحمان استانکزینینگ سلاموطندار گه ایتیشیچه: «بویوکلرگه قرهگنده بالهلرده توبرکلوز کسللیگینی انیقلش قیین دیر. ۲۰۲۵-ییلده قندهار ده چیگره بیلمس شفاکارلر آرقهلی توییب آوقتلنمسلیک سبب دوالنگن بالهلردن ۱۰ فایزی، سل کسللیگیگه چلینگنی انیقلندی. بو رقم ۲۰۲۴-ییلگه قرهگنده ایکی برابر کوپهیگن.»
وزن کمهیشی، قیتریش، ایچ کیتمه و تنه آرقهلی قوی آقوتلرنینگ جذب بولمسلیگی، بالهلرده سل کسللیگیگه چلینیش نشانهلریدن دییلگن.
بالهلرنینگ ایچکی بولیمی متخصص شفاکاریگه کوره، رواجلنهدیگن مملکتلرده توبرکلوز کسللیگی کوپراق ترقلهدی. مذکور شفاکارلر، آزیق-آوقت ناتینچلیگی و تنه قوتی کمهیشی، افغانستان دهگی بالهلر آرهسیده توبرکلوز کسللیگی کوپهیشی اصلی عامللریدن حسابلنهدی.
بو توغریده بالهلر ایچکی بولیمی متخصص شفاکاری فیاض صافینینگ ایتیشیچه: «بو کسللیک اقتصادی قیینچیلیگی بولگن و رواجلنهدیگن مملکتلرده بار. مملکتیمیزده اوزاق مدتلی اوروشلر طفیلی اهالینینگ مهاجرت قیلیشی، قشاقلیک، آچرچیلیک و توییب آوقتلنمسلیککه سبب بولگن. بالهلر تنهسینینگ قوتی کمهیگنیده، اوشبو کسللیککه چلینیش خوفی کوپهیهدی. انه شوو سبب ایته آلهمیز که سوو و آوقتدن فایدهلنه آلمهگن و توییب آوقتلنمهگن بالهلر آرهسیده، توبرکلوز کسللیگیگه چلینیش کوپراق بولگن.»
سکیز آیلیک بالهسی توبرکلوز کسللیگیگه چلینگن قندهار یشاوچیلریدن نوریهنینگ ایتیشیچه: «قیزیم اوچ آیلیک بویان کسل دیر. ایسیتمه و یوتلی بار. داروخانه گه باریب و اونگه پیچکاری آلدیم. بیش کون ساغهیدی، بیراق قیته کسل بولدی. بو ییرگه کیلگنیمده اونینگ ایکسری قیلدیلر و اونینگ توبرکلوز کسللیگیگه چلینگنینی ایتدیلر.»
اوتگن ییل یاز موسومیدن حاضرگچه توبرکلوز کسللیگیگه چلینگن غزنی یشاوچیسی بولمیش ۱۵ یاشر کبرا، کسللیگی جریانی حقیده شوندهی دیدی: «اوتگن ییل یاز موسومیده کسل بولگن ایدیم. یوتلیم بار ایدی و شفاکار گه بارهر ایدیم که توبرکلوز کسلخانهسیگه یوباردیلر. ۲۷ کون دوالنیش آستیده ایدیم. ساووق سوو ایچدیم و کسل بولدم.»
اوشبو گزارشده اسلام امیرلیگی ساغلیقنی سقلش وزیرلیگینی فکرینی آلیش ایستهدیک؛ بیراق کیتمه-کیت سعیوحرکت بیلن موفق بولمهدیک.
اوتگن قویاش ییلده اسلام امیرلیگی ساغلیقنی سقلش وزیرلیگی، ییلده ۷۵ مینگ افغانستانلیکنینگ توبرکلوز گه چلینیشی و اولردن ۱۰ مینگ تهسینینگ مذکور کسللیک نتیجهسیده وفات قیلیشینی معلوم قیلگن ایدی.
۱۹۹۵-ییلده ۲۴-مارچ، توبرکلوز حقیده آگاهیلیک آشیریلیشی و بو کسللیک بیلن قرشی کورهش مقصد، خلقارا ساغلیقنی سقلش تشکیلاتی آرقهلی خلقارا توبرکلوز کونی صفتیده ناملنگن.
