کابل ده نسایی-ولادی شفاکارلریدن قطارینینگ سلاموطندار گه ایتیشلریچه، سل کسللیگی (توبرکلوز)، تننینگ تورلی بولیملریگه زیان ییتیشتیرهدی؛ لیکن «بچهدان» نی مقصد قرار بیرگنی صورتده، قیتریلیب بولمهیدیگن عاقبتلر جملهدن بیپشتلیک، کیتمه-کیت سقطلر و حاملهدارلیکنی سقلب قالیش قابلیتسیزلیگیگه آلیب کیشی ممکن.
اولرنینگ کوپهیتیریشلریچه، ساغلیق مسئلهلریگه توجهسیزلیک و سل کسللیگیگه چلینگن کیشی بیلن توغری علاقه قوریش، عیاللرنینگ خوفلی «بچهدان توبرکلوز» کسللیگیگه چلینیش اصلی عامل بولیب که بو کسللیک، عیاللرنی دایمی شکلده آنه بولیش نعمتیدن محروم قیله آلهدی. شفاکارلرگه کوره، مذکور کسللیکنینگ انیقلنیشی قیین بولگنی بیرحالده؛ لیکن اونینگ دوالش امکانیتلری مملکتده موجود دیر.
بیزلرنینگ «ایکس» ترماغی ده هم تعقیب قیلینگ!
نسایی-ولادی شفاکاری زرغونه محبتنینگ ایتیشیچه: «کسللیکنینگ اصلی عاملی توبرکلوز میکروبی دیر که باشده ششلرنی افلاسلنتیرهدی و کسل بولگن کیشیدن هوا یولی آرقهلی ساغ کیشی گه اوتهدی. افغانستان ده زمانهوی جهازلرنینگ کملیگی سبب، وقتیده انیقلنیشی قیین دیر. کسل بولگن کیشیلر بیلن علاقهده بولگن عیاللردن کوپ قطاری اینیقسه حاملهدارلیک پیتلریده بو کسللیککه چلینهدیلر.»
نسایی-ولادی شفاکارلریدن باشقه بیری سونیتا بهرامنینگ ایتیشیچه، بچهدان توبرکلوزینی بیر قطار نشانهلر بیلن انیقلش ممکن. «بچهدان توبرکلوزینی بیر قطار نشانهلر جملهدن حیض کوریش پیتیده جدی و دایمی آغریق، یقینلش چاغیده آغریق و بیپشتلیک کبی قیینچیلیکلر و کیتمه-کیت سقطلر بیلن انیقلش ممکن. بو کسللیک حتا نفیرلرنینگ یاپیشیشی و بچهدان آغزی یاپیلیشیگه سبب بولهدی که بولردن برچهسی عیاللرنینگ حاملهدارلیگینی توغری تهدید قیلهدی.»
باشقه بیر تاماندن، افغانستان نسایی-ولادی شفاکارلر انجمن باشلیغی نجمالسما شفاجو، عیاللر آرهسیده بو کسللیک عاقبتلری حقیده ایتیشیچه: «توبرکلوز بچهداننی افلاسلهگنی صورتده، بچهداننینگ خراب بولیشی، کیتمه-کیت سقطلر و بیپشتلیککه سبب بولهدی. نفیرلرنی چلینتیرگنی صورتده، اولرنینگ باغلنیشیگه سبب بولیب و تخمدانلرگه زیان ییتیشتیرهدی. توبرکلوز تخمدانلرنینگ ذخیرهلنیشینی کمهیتیریب و عیاللرنینگ حاملهدارلیک قابلیتینی کمهیتیرهدی.»
کابل شهریده خصوصی کسلخانهلردن بیرینینگ لابراتوار تکنسینی ذبیحالله مونسگه کوره، حاضر مملکتده بچهدان توبرکلوز کسللیگینی انیقلش و دوالش امکانیتی بار. جناب مونسنینگ کوپهیتیریشیچه: «IGRA طبی تستی نی قریب بیر یریم آی بولهدی که آلیب کیلگنمیز و بو بولیمده قریب ۶۰۰ کسل مراجعت قیلگن.»
بچهدان توبرکلوزیگه چلینگن ۳۵ یاشر پکتیکا یشاوچیسی بولمیش معصومه، بو کسللیک طفیلی کورگن قیینچیلیکلرینی توغریسیده ایتیشیچه: «آلتی ییل ایچیده تورت ته بالهمنی قولدن بیردیم. توی قیلیشدن آلدین مخصوص بیر علایم یوق ایدی؛ لیکن کیتمه-کیت سقطلردن سونگ، بچهدان توبرکلوز گه چلینگنیم انیقلندی. ینگیلکیده درمانلنیش آستیده قرار تاپدیم.»
بیزلرنینگ فیسبوک صحیفهمیزگه باش اورینگ!
ایکی ییلدن بیری آنه بولیش آرزوسیده بولگن بدخشانلیک ۲۵ یاشر سعدیهنینگ ایتیشیچه: «ایکی ییلدن بیری بیپشتلیک اوچون دوالنیش آستیدهمین. نیچه کون آلدین شفاکارلر بچهدان توبرکلوز گه چلینگنیمنی انیقلهدیلر. دوالنیش بیلن ساغهیشیمنی امید قیلهمن که مین هم باله صاحبی بولسم.»
شفاکارلرنینگ بیاناتی اساسیده، اوتگن ییللرده افغانستان ده بچهدان توبرکلوزینی انیقلش قیین بولگنی بیلن، لیکن حاضر ایسه مملکت ایچیدهگی نیچه مرکزلرده بو کسللیکنی انیقلش زمینهسی یرهتیلگن. شوندهی بیرحالده، گزارشلر گه اساسیده افغانستان حاضرگچه بو کسللیک طفیلی زیان کورهدیگن ۲۲ مملکتدن بیری دیر.
