مین محمدامید حبیبی هروی من، کابل بیلیم یورتینینگ سیاسی بیلیملر فاکولتهسینی بیتیرگن من. گرچی جاری ییلنینگ اوتگن آییده صنعی هوشدن فایدهلنیش یاشلر آرهسیده کېنگ ترقهلیب، اونینگ اکثر پلتفرمهلری عینن یاشلر تامانیدن قوللنهیاتگن بولسهده، مین باشیدن صنعی هوش گه شبهه و احتیاطکارلیک بیلن قرردیم. حتا بعضاً دوستلر گه هم صنعی هوشدن فایدهلنیشده احتیاط بولیشنی، عکس حالده، جدی معمالر گه دوچ کیلیشلری ممکنلیگینی توصیه قیلردیم. مینینگ صنعی هوش بیلن تنیشوویم شبهه و ایکیلنیشلر بیلن بیر گه کیچدی – و بو شبههلر بیر نیچه آی دوامیده صنعی هوش بیلن ایشلهگنیمگه قرهمی، هنوز دوام ایماقده.
دوستلردن ایشیتردیم صنعی هوش پلتفرمهسی یرهتیلگن و او سیزنینگ برچه سواللرینگیز گه جواب بیرهدی. البته، صنعی هوش باشقه تکنالوژی واسطهلر گه قرهگنده کوپراق واتساپ آرقهلی عامهلشگن اېدی. برچه اوشه شبهه و خواطرلریمگه قرهمی، آخر-عاقبت مین هم صنعی هوشدن فایدهلنیشگه تارتیلدیم. جوابسیز سواللریم و قیزیقووچنلیک مینی یکونده واتساپ دهگی صنعی هوشدن فایدهلنیشگه آلیب کېلدی. البته شونی تأکیدلهیمن کی، اول باشده بولگن بعضی خواطر و شبههلریم حاضر هم بار و اوندن فایدهلنیشده جوده احتیاط بولیشگه حرکت قیلهمن.
سلبی قرهش و ایجابی تجربه
صنعی هوشدن فایدهلنیشنی باشلهگن دستلبکی کونلرده مین بو انسانی تکنالوژی گه نسبتن سلبی قرردیم. هر بیر سۉز یا کی جملهنی اوشبو پلتفرمه گه کیریتگنیمده، شخصی معلوماتلریم و اخباراتلریم اوشبو واسطهلرنی یرهتگن کمپنیهلرنینگ قولیگه اوتیشینی اویلردیم. البته، مینینگ خواطر و سلبی قرهشیم قسماً توغری هم اېدی. موجود حساباتلر گه کوره، اوشبو تیزیملرنی یرهتگن کمپنیهلر فایدهلنووچیلرنینگ صنعی هوش بیلن بولگن صحبتلرینی قیته کوریشلری یا کی اولرنی حکومتلر گه تقدیم ایتیشلری ممکن. بعضاً خواطرلریم بوندن هم کېنگهیب کیتردی؛ صنعی هوشدن فایدهلنیش نتیجهسیده تلفونیمیزدهگی معلوماتلر تشقریگه سیزیب چیقیب، ناتوغری قوللر گه توشیب قالمسلیکنی اویلردیم.
اۉز اوکهلریم و آپه-سینگیللریمنینگ صنعی هوشدن کېنگ فایدهلنهیاتگنینی و بو تکنالوژی اولرنینگ سواللریگه قیسقه وقت ایچیده، انیق جواب بیرهیاتگنینی کوریب مینینگ خواطر و سلبی قرهشیم کمهیدی و عملده مین هم صنعی هوشدن فایدهلنیشگه کیریشدیم. بیرینچی مرته اۉز سواللریمنی بیریشیم مین اوچون حیرتلنرلی بولدی. جواب بیریشدهگی تیزلیک و انیقلیک شونینگدیک، اونگه باغلیق معلوماتلر گه ایگهلیگی مینی جوده حیرتلنتیردی. شو خصوصیتلری طفیلی مین ایلگری سیزگن کتته قسم خواطر و شبههلریم یوقالدی و بیزنینگ دایمی ملاقاتیمیز باشلندی. مین اونگه جوده مهم و اساسی سوال بیردیم و اونینگ جوابلری مین اوچون جوده قیزیقرلی بولدی. معلوماتلرنینگ تیزلیگی، انیقلیگی و تولیقلیگی صنعی هوشنی تکنالوژی عالمیدهگی باشقه هر قندهی فیناملردن اجرهتیب تورهدی. باشلنیشده سلبی قرهشگه ایگه بولسمده، صنعی هوشدن فایدهلنیش تجربهسی و اونینگ ثمرهدارلیگی مینینگ فکریمنی اۉزگرتیردی. بعضاً مین رسم چیزیش اوچون تختهنی بویش یا کی دیزاین قیلیشده اونینگ فکری و توصیهلرینی آلهمن و اونینگ کورستمهلری جوده عجایب.
صنعی هوشدن عقللی و تیزیملی فایدهلنیش یاشلرنینگ استعدادینی رواجلنتیریشده جوده ثمرهلی بولیشی ممکن. اونی ایشلهتیشده احتیاطکارلیک و موازنتنی سقلش لازم.
