کنر ده یوز بیرگن زلزلهدن جبرلنگن و حاضر اوشبو ولایتده جایلشگن کمپلرده حیات کیچیرهدیگن کیشیلردن قطارینینگ ایتیشلریچه، یوز بیرگن کوچلی زلزله و اوندن کیینگی زلزلهلر، بالهلرینینگ ساغلیگینی خوف بیلن روپهره قیلگن.
مذکور ولایت چوکی «څوکی» تومنینینگ «دیوهگل» دره یشاوچیسی نقیباللهنینگ ایتیشیچه، اوشبو تومنده یوز بیرگن اولیملی زلزلهدن، بالهلری قورقیب قالگن. اونینگ کوپهیتیریشیچه: «زلزله بولگنی پیتده، بالهلریم اویقودن قورقیب تورهدی، ییغلهیدی و ساعتلرچه هیچ آرام بولمهیدی. حاضر یکه هم اوخله آلمهیدیلر و دایم بیزلر بیلن بیرگه اوخلهیدیلر.»
کنر ده زلزلهدن جبرلنگن کیشیلرنینگ کوپهیتیریشلریچه، بالهلری حتا سیسدن قورقیب و اونی زلزله و ییر سیسی توشینهدیلر.
«دیوهگل» دره یشاوچیلریدن ۱۴ یاشر توابنینگ ایتیشیچه، حاضرگچه اوشبو ولایتده یوز بیرگن اولیملی زلزلهنی اونیته آلمهگن. «زلزله بولگنیده قاچدیک؛ کوپ قورققن ایدیم و کیچیک سنگلیم هم قورققن ایدی؛ زلزلهدن کیین حاضر هر سیسنی ایشیتسم، قورقهمن.»
شونینگدیک «دیوهگل» دره یشاوچیلریدن باشقه بیری ۱۲ یاشر وجیههنینگ ایتیشیچه: «بلندراق سیسنی ایشیتگنیمده، قیته زلزله یوز بیرگنینی توشینهمن؛ یورهگیم اورهدی؛ قورقهمن و نیمه قیلیشیمنی بیلمهیمن؛ کیچهلر هم درست اوخله آلمهیمن و دایم خواطردهمین.»
باشقه بیر تاماندن، کنر ده اجتماعی فعاللردن قطارینینگ ایتیشلریچه، زلزله یوز بیرگنیدن کیین وضعیتنینگ مدیریت بولمهگنی، مذکور ولایتدهگی بالهلرنینگ اوزاق مدتلی روحی کسللیکلریگه سبب بولیشی ممکن.
اجتماعی فعاللردن قانتالله صافینینگ ایتیشیچه، روحی مصلحت بیرووچی مرکزلر آچیلیشی و تعلیم زمینهسی یرهتیلیشی، بالهلرده روحی باسیملر کمهیشیگه یاردم بیره آلهدی. «بالهلرگه تعلیم زمینهسی یرهتیلیشی، اولرنینگ فکری مصروف بولیشی و زلزلهگه توشینمسلیکلریگه سبب بوله آلهدی؛ بالهلر کوپ زیان کورگنلر و حاضرگچه بو وضعیتدن چیقه آلمهیدیلر.»
کنر ده یوز بیرگن زلزلهدن کیین، اسلام امیرلیگی و یاردم بیرووچی نهادلر، بو ولایتده جبرلنگن کیشیلرگه آزیق-آوقت، باشپنه و باشقه یاردملرنی یرهتگنی بیرحالده؛ لیکن روحی خذمتلر کورسهتیلیشی بولیمیده زیان کورگنلرگه اونچهلیک اعتبار قرهتیلمهگن.
«دیوهگل» درهسیدهگی زلزلهدن جبرلنگنلر کمپی مسئولی خلیلالرحمانگه کوره، بو تومندهگی زلزلهدن زیان کورگنلرگه روحی خذمتلر کورسهتیلهدی. «بالهلر و کیکسهلردن کوپ قطاری، روحی نقطهی نظریدن قیینچیلیکلر بیلن روپهرهلر؛ بیراق بو بولیمده نهادلردن کوپ قطاری ایشلهیدیلر.»
شونینگدیک «څوکی» تومنی ولسوالی محمدابراهیم ثاقبنینگ ایتیشیچه، مذکور تومندهگی جبرلنگنلرنینگ حاضر روحی قوللب-قوتلنیشگه نیازلری بار. «کوپینچه کیشی روحی قیینچیلیکلر بیلن روپهره بولگن؛ چونکه عایلهلرینی قولدن بیرگنلر و حیاتلری بوزیلگن. بو موضوع اوزی روحی قیینچیلیکلرگه سبب بولهدی.»
قریب ایکی آی آلدین، کنر ولایتینینگ بیر قطار بولیملری اینیقسه نورگل و څوکی تومنلریده اولیملی زلزله یوز بیریب و اونینگ نتیجهسیده، ایکی مینگدن آرتیق کیشی اولیب و اوچ مینگدن آرتیق کیشی یرهلنگن.
