جوزجان ولایتی مرکزی شبرغان شهریده ۷ میلیون افغانی عوضیگه، بیر سوداگر آرقهلی مس ایریتیش بیر فابریکه آچیلگن.
اوشبو فابریکه مسئولی اسدالله حسینینینگ ایتیشیچه، جوزجان ده برقرار گاز و برق انرژیسیدن فایدهلنیش، امنیت و صناعت رواجلنیشی بوییچه مناسب امکانیت، بو ولایتده سرمایه یاتقیزیشیگه سبب بولگن.
شوندهی بیرحالده، جوزجان صناعت و سودا ریاستی باشلیغی نیازمحمد تواب، بو اقدامدن خورسندلیک قیلیب و ایتیشیچه، بو اداره تورلی بولیملرده سوداگرلر بیلن هر قندهی قوللب-قوتلش و همکارلیک قیلیش توغریسیده تیار دیر.
بیزلرنینگ فیسبوک صحیفهمیزگه باش اورینگ!
جناب توابنینگ کوپهیتیریشیچه، بو کبی فابریکهلر آچیلیشی، نهفقط خودکفالیک و صناعت رواجلنیشی، بلکیم یاشلر اوچون ینگی ایش فرصتلری یرهتیلیشیگه سبب بولهدی.
مس ایریتیش مراسمیگه شرکت قیلگن سوداگرلر و صناعتچیلردن قطاری، اوشبو سرمایه یاتقیزیلیشدن خورسندلیک قیلیب، مملکتدهگی باشقه سوداگرلردن ملی مسئولیتنی حس قیلیش بیلن مملکت آبادانچیلیگیده حصه قوشیشلری و اقتصادی رواجلنیش اوچون جوزجان ولایتیده بولگن فرصتلردن فایدهلنیشلرینی ایستهگنلر.
مسئوللرنینگ معلوماتی اساسیده، بو فابریکهنینگ آچیلیشی بیلن حاضر بو ولایتدهگی ۱۰ کیشیگه ایش زمینهسی یرهتیلگن و اینگ یقینده، اوشبو فابریکه فعالیتی رواجلنیشی یانیده باشقه اونلب کیشیگه ایش زمینهسی یرهتیلیشی ممکن.
