خبرچیلر و میدیالرنی قوللب قوتلش نهادلری، معلومات گه قول تاپیش چیکلهنیشیدن تنقید قیلهدیلر. بیرقطار خبرچیلر نینگ ایتیشلریچه، مملکت بویلب اسلامی امارت حاکمیتیدن کیین، میدیالر گه چیکلاو یرهتیلیشی باعث، فعالیتلری و سوز ایرکینلیگی اوستیگه سلبی تاثیر قیلگن.
باختر دولت آژانسی نینگ گزارشی اساسیده، اسلامی امارت کانلر و پترولیم وزیرلیگی، هرات ولایتی غوریان تومنیده تیمر کانی و غور ولایتی تولک تومنیده سُرب کانینی قازیب چیقریشنی قرارداد گه بیرهدی. باش وزیر بیرینچی اورین باسری ملا عبدالغنی برادر ییتکچیلیگیده، اسلامی امارت اقتصادی کمیسیونی، مذکور ایکی کان نینگ قازیب چیقریش رخصتینی صادر قیلگن.
جوزجان ولایتی نینگ مرکزی و فیضآباد تومنیده ۹ میلیون افغانیلیک ۲ سوو ییتکیزیش پروژه نینگ عملی ایشی یکونلهنیب بوگون فایدهلنیشگه تاپشیریلدی.
افغانستان مرکزی بانکی بوگون بیر خبرنامه ترقهتیب ایتیشیچه، افغانی پول برابریده دالر نرخینی پس توشیریش اوچون ۱۳ میلیون دالرنی لیلام شکلده ساتهدی. مذکور بانک نینگ خبرنامهسی اساسیده، اوشبو مقدار پول نینگ داوطلبلیگی ایرته (یکشنبه، ۲۱ حمل) یولگه قوییلیشی کوتیلهدی.
اسلامی امارت باش وزیری نینگ بیرینچی اورینباسری ملا عبدالغنی برادر، پنجشنبه کونی، ۱۸ حمل کانلر و پترولیم وزیرلیگی نینگ سرپرستی شهابالدین دلاور حضوریده، سرپل ولایتی قشقری نفت کانینی آچیش چاغیده میدیالر گه ایتیشیچه، اوشبو نفت کان نینگ درآمدلری مرکزی بانککه توللنیلیب و کیین ایسه بوتون ولایتلرده ترقه لهدی و سرپل ولایتی گه اوستونلیک بیریلهدی.
سرپل معلومات و مدنیت باشلیغی فخرالدین عمیر سرپلی نینگ سلاموطندار گه ایتیشیچه، اسلامی امارت باش وزیری نینگ بیرینچی اورین باسری ملا عبدالغنی برادر، بوگون بیر هیأت ییتکچیلیگیده اوشبو ولایت سفر قیلگن ایدی، قشقری نفت کانینی افتتاح قیلدی.
بوگون پنجشنبه کابلده مطبوعاتی ییغینده اشتراک ایتگن دین عالملریدن قطاری، قیزلر نینگ اورته و لیسه مکتبلری یاپیق قالیشی خصوصیده ایتیشلریچه، بو ایش اسلام پیکری گه اینگ بویوک زیان دیر.
خبرچیلر مصئونیت کمیتهسی اوشبو کمیته نینگ غور ولایتیدهگی همکاری غلام ربانی هدفمند تیزلیک بیلن اسلامی امارت کوچلری تامانیدن آزاد ایتیلیشینی سورهیدی.
اسلامی امارت معلومات و مدنیت وزیرلیگی نینگ مسئوللری گه کوره، اترا ادارهسی نیچه ییلدن بویان مالیه توللمهی، جواز آلمهگن و فرکانس مالیهلرینی توللمهگن میدیالرنی یاپیش اوچون ایچکی ایشلر وزیرلیگیگه مکتوب یوبارگن.
قندوز ولایتی ساغلیقنی سقلش مسئوللری نینگ ایتیشلریچه، اوتگن بیر آیده قیزهمیققه چلینگن کسللردن 17 تهسی جان بیرگن. اوشبو ولایت ساغلیقنی سقلش ریاستی نینگ مسئولی نجیبالله ساحل نینگ ایتیشیچه، اوشبو مدت ایچیده بو ویروسگه چلینگن کسللردن 9 یوز 15 کیشی ساغهیگن دیر.
جوزجان ولایتی نینگ ایکی تومنی و مرکزیده ۷۰۰ دهقان عیال گه اوی باغچهلری و ایش اسبابلری توزیع بولدی. جوزجانده اکتید دفتری باشلیغی امانالله امین نینگ ایتیشیچه، عایلهلرینی سرپرستلیک قیلهدیگن دهقان عیاللرنی قوللب قوتلش و اولر نینگ اقتصادیاتینی کوچهیتیریش مقصدیده، بو پروژهنی یولگه قویگنلر.
قندهارده سوداگرلردن بیرقطاری نینگ ایتیشلریچه، سپینبولدک قتناو یولیده قیینچیلیک کوپهیشی باعث، اوشبو یولده تجارت ۵۰ فایز کمهیگن. اولر گه کوره، سپینبولدک قتناو یولیده سوداگرلردن سالیق آلیشگه علاوه، ایریم بهانهلر بیلن اولردن پول آلینهدی و یوک تاشووچی موترلر اوچون ترانسپورت ریاستی تامانیدن شماره ایجاد بولگن و هر موتر نوبتیده سوداگرلر مالینی یوکلشگه مجبور دیر.
افغانستان بوییچه آمریکا ایلچیخانهسی نینگ سرپرستی یان مککری، مملکتده کوکنار و برچه نشهلی مخدره مادهلر ایکیلمسلیگی خصوصیده اسلامی امارت رهبری هبتالله آخوندزاده نینگ بویروغینی خوش قرشیلهگن.
کابل شهری دهگی عمده ساتوووچیلردن قطاری نینگ ایتیشلریچه، روسیه و اوکراین اوروشی ییگولیک مادهلر قیمتی اوستیگه تاثیر قیلیب و قریب ایکی هفتهدن بویان آزیق-اوقت نرخی آشگن. اولر نینگ ایتیشلریچه، اون، یاغ، شکر و برنج قیمتی ۲۰۰ دن ۳۰۰ افغانی گه آشگن.
بنگوار مادهلرنی ایکیش و قاچاقی منع ایتیلیشیدن بیر کوندن کیین، مملکت نینگ جنوبی ولایتلرده بنگومار مادهلر نینگ نرخی کوزگه کورینرلی درجهده آشگن. ارزگان و قندهار ولایتلریده تریاک ایشلری بیلن مصروف بولگنلردن قطاری نینگ سلاموطندار گه ایتیشلریچه، تریاک نرخی اوتمیش گه نسبتن ایکی برابر بولگن.
اسلامی امارت مالیه وزیرلیگی بوگون بیر بیانیه ترقهتیب ایتیشیچه، کابینه و اقتصادی کمیسیون نینگ قراری اساسیده، کیچیک تجارتلر مالیهلری ۱.۵ فایزدن ۰.۵ فایز کمهیتیریلگن.
