بریتانیا حکومتی، کیلهسی اوچ ییلده افغانستان اهالیسینی قوللب-قوتلش مقصد، ۳۱۵ میلیون پوند یاردم بیریشینی معلوم قیلگن.
بریتانیا تشقی ایشلر وزیری اورینباسری همیش فالکونر، اوتگن کون (۲۵-سرطان/۱۶-جولای، پنجشنبه)، بیر بیانیه ترقهتیش بیلن ایتیشیچه، مملکتی مذکور یاردملرنی ۲۰۲۶-ییلدن ۲۰۲۹-ییلگچه افغانستان اهالیسینی حمایت قیلیش اوچون اجرهتهدی. «بریتانیا کیلهسی اوچ ییل، ۲۰۲۶-ییلدن ۲۰۲۹-ییلگچه، افغانستان اهالیسینی قوللب-قوتلش اوچون هر ییلی ۱۰۵ میلیون پوندنی اجرهتیشی ممکن.»ّ
فالکونرنینگ کوپهیتیریشیچه، بریتانیا هر ییلی افغانستان اهالیسیگه ۱۰۵ میلیون پوندنی اجرهتیب و بو دورده، افغانستان بریتانیانینگ رسمی رواجلنتیریش یاردمی (ODA) بوییچه اینگ ییریک یاردم آلووچی مملکتلردن بیری بولهدی.
ایتیلیشچه، بو یاردملر طبی و آزیق-آوقت خذمتلرینی کورسهتیش، تعلیمنی قوللب-قوتلش، ضعیف قتلملرنی حمایه قیلیش همده تیریکچیلیکنی مستحکملش و اقلیم اوزگریشلریگه چیدملیکنی آشیریشگه قرهتیلهدی.
ایتیش کیرهک که بریتانیا بوندن آلدین هم، افغانستان اهالیسی جملهدن سوو تاشقینلردن زیان کورگنلر و توییب آوقتلنمسلیککه چلینگن بالهلرگه یاردم بیرگن دیر.
