بامیان ده یوز بیرگن قانلی واقعه‌دن اوچ کون اوتماقده. مذکور قانلی واقعه بامیان شهریده بولگن تینچلیک‌نی نابود قیلگن.
بامیان شهری نینگ شرقی‌ده جایلشگن «سوماره» دره‌سیده ۵۰ کون آلدین کسل‌لیک سبب، تورموش اورتاغی (ایری) نی قولدن بیرگن بیر عیال حیات کیچیره‌دی. مذکور عیال نینگ فرزندلری اوتگن هفته آته‌لری نینگ دنیا دن اوتگنی سبب، فاتحه اوقیش مراسمی اوتکزگنلر.
بیراق، “سه‌شنبه” کونی بامیان شهریده یوز بیرگن قانلی واقعه نتیجه‌سیده، اوشبو عیال نینگ نوروز و محمد نام‌لی ۲۳ و ۲۵ یاشیده بولگن ایکی اوغلی جان بیرگن.
محمد و نوروز عایله نینگ خره‌جتینی تامین قیله‌دیگن فرزندلری ایدی، لیکن بامیان شهریده یوز بیرگن ایکینچی پارتلشده هلاک ایتیلگنلر.
۲۵ یاشیده بولگن محمد پارتلش یوز بیرگن محلده جان بیره‌گن، بیراق ۲۳ یاشیده بولگن نوروز شدتلی شکلده یره‌لنیب کسلخانه‌گه انتقال بیریلگن، لیکن یره‌سی آغیر بولگنی سبب، کیچه ساعت ایکی ده جان بیره‌گن.
اوتگن “پنجشنبه” کونی مذکور آنه نینگ احوالی‌نی سوره‌ش مقصد ده سوماره دره‌سیده بار دیم. او بوتون بارلیگی‌نی تورموش اورتاغی نینگ درمان‌لنیشی‌گه هزینه قیلگن، بیراق تورموش اورتاغی ۵۰ کون آلدین دنیا دن اوتگن.
سوماره دره‌سیده بارگنیم ده بو دره اهالیسینی قیغولی کوردیم. محل یشاوچی‌لری نینگ یاردمی بیلن محمد و نوروز نینگ آنه‌سینی اویگه باردیم، عیاللر قیغوداشلیک بیلدیریش باریب کیله‌ریدی و اوی نینگ فضاسی قیغولی ایدی.
یشاوچی‌لر یاردمی بیلن بیر اتاققه باردیم. مذکور اتاققه عیاللر توپلنگن ایدی و آه و ناله‌لرینی اتاق نینگ فضاسینی قیغولی قیلگن ایدی. اتاق ده بولگن عیاللردن بیریدن قربان بولگنلرنینگ آنه‌سی نینگ اسمی نی سوره‌دیم، نامی جواهر ایکن.
جواهر کوپینچه آه و ناله بیلن گاهی محمد و گاهی هم نوروز نی نامینی آله‌ریدی. اتاق نینگ باشقه بیر کنجیده بیر عیال «آه ایناغم» دیم ناله قیله‌ریدی.
جواهر نینگ ایتیشیچه، یاش اوغلی‌لری کییم ساتیب آلیش اوچون شهرگه بارگن ایدیلر. اونینگ کوپه‌یتیریشیچه، محمد و نوروز نینگ ینگی کییم‌لری بیلن قیتیب کیلیشی‌نی کوتیب تورگن ایکن، بیراق اولرنی کفن نینگ آره‌سیده قوییب کیلتیرگنلر.
قربان بولگنلرنینگ سینگیلیسی نینگ ایتیشیچه، ایناغه‌لری نینگ اولیمی‌گه حکومت مسوول دیر. «دولت ایناغه‌لریم‌نی کیلتیره آله‌دی می ؟ نیمه اوچون بوندن آلدین بامیانده پارتلش یوز بیرمه‌ریدی؟ »
اوشبو عایله اعضالری، “سه‌شنبه” کونی یوز بیرگن پارتلش نینگ عامللرینی قولگه آلینیب و محکمه قیلینیشی‌نی ایسته‌یدیلر.
مذکور عایله نینگ اقارب‌لریدن بیری محمدامین امامی نینگ ایتیشیچه، محمد و نوروز آته‌لری دنیا دن اوتگنیدن سونگ، آنه‌لری نینگ یالغیز امیدی ایدی.
قبرستان‌گه باردیم و منطقه یشاوچی‌لریدن قبرلرنی تانیتیش‌نی ایسته‌دیم. اولردن بیری اوچ قبرنی کورستی. مذکور قبرلردن بیریگه عایله نینگ آته‌سی عبدالحمید، باشقه بیریده ۲۳ یاشیده بولگن نوروز و اوچینچی‌سیگه ایسته ۲۵ یاشیده بولگن محمد توپراققه قوییلگن ایدی.
اوشبو پارتلش اوتگن “سه‌شنبه” کونی ساعت ۴:۳۰ اطرافیده بامیان شهریده یوز بیردی. بامیان محلی مسووللری نینگ ایتیش‌لریچه، مذکور پارتلش نتیجه‌سیده ۱۵ کیشی هلاک و باشقه ۵۸ کیشی یره‌لنگن، بیراق انسان حقوقی ایرکین کمیسیونی نینگ بیر اعلامیه آرقه‌لی ایتیشیچه، اوشبو قانلی واقعه ده ۱۸ کیشی هلاک و باشقه ۵۸ کیشی یره‌لنگن.