سلاموطندارنینگ کابل، هرات، بدخشان، قندوز، فاریاب، بادغیس، کاپیسا و کنر ولایتلریدن ۳۵ یاش بیلن صحبتی شونی کورستهدی کی، بو یاشلرنینگ یالغیزلیک و جمعیتدن اوزاقلشیش تجربهسی کوپینچه فطری شخصی خصوصیتدن آشیب، بیواسطه اجتماعی، عایلهوی و جمعیت توزیلمهسی شرایطلریده یوز بیرهدی.
اوشبو یاشلر، اوزلرینی ایچکی دنیاسی رواجلنگن شخصلر دیب بیلیشهدی و دایمی روشده عمومی جایلرده بولیشنی خواهلمسلیکلرینی ایتیشهدی. اولرنینگ سوزلریگه کوره، یالغیزلیک، چقور فکرلش و شخصی فعالیتلر، روحی انرژی تأمین قیلوچی منبعلرنینگ اینگ مهملریدن بیری دیر. شونگه قرهمی، صحبت قیلگنلرنینگ بهتفصیل تحلیلی شونی کورستهدی کی، بو یاشلرنینگ کتته قسمی اوچون جمعیتدن چیکینیش شخصی تنلاودن کوره، تشقی سببلر نتیجهسیده یوزه گه کیلگن عامللردن دیر.
اجتماعی باسیملر؛ جمعیتدن اوزاقلشیش اصلی سببی
گزارشده صحبت قیلگن ۳۵ نفر یاشدن ۳۲ نفری، اجتماعی، عایلهوی باسیملر، تعلیم و جمعیتدهگی چیکلاولر، اولرنی استه-سیکین جمعیتدن اوزاقلشیشی گه آلیب کیلگن عامللردن دیب بیلیشهدی. فقط اوچ نفری، بو یونهلیشنینگ ایلدیزینی بالهلیکدهگی آغریقلی تجربهلر، مثلاً عاطفی محروملیک یا کی ضرر کورستهدیگن تجربهلر بیلن باغلهیدی.
اوشبو نتیجهلر شونی کورستهدی کی، کوپلب حاللرده ایچکی دنیا گه یونهلتیریلگنلیک دیب تعریفلنهدیگن حالت اصلیده اجتماعی باسیملر و امیدسیزلیک شرایطیده یوزه گه کیلگن اجتماعی چیکلنیش شکلی دیر.
فاریاب یشاوچیسی آی صفا، اوزینی ایچکی دنیا گه یونهلتیریلگن شخص دیب شوندهی دییدی: «اوزیمنی کوپراق ایچکی دنیا گه یونهلتیریلگن انسان دیب بیلهمن؛ عادتده وقتیمنی یالغیزلیکده یا کی کیچیک و صمیمی دورلرده اوتکزیشنی افضل کورهمن. یالغیزلیک مینگه خاطر جمعلیک بیرهدی و یخشیراق اویلهشیمگه، حس-تویغولریمنی انگلشیمگه همده انرژینی قیته تیکلهشیمگه یاردم بیرهدی.»
هراتلیک ۳۵ یاشلی صدیق هم اوزینی دنیا گه یونهلتیریلگن شخص دیب بیلیشینی ایتهدی. اونگه کوره: «مین اوزیمنی کوپراق ایچکی دنیا گه یونهلتیریلگن دیب حسابلهی من؛ بیراق کیچیک و خوفسیز دورلرده بولگنیمده، یخشی ملاقات قیله آلهمن. یالغیزلیکده تینچلنهمن.»
قندوز یشاوچیلریدن ۳۰ یاشلی فرزانه و ۲۰ یاشلی شمیلا، عایله اعضالری تامانیدن توشونمسلیک و آغزهکی باسیملر بو شخصی خصوصیتنینگ اولرده شکللنیشیگه سبب بولگنینی ایتیشماقده.
فرزانه شوندهی دییدی: «عایله اعضالری جملهدن آته، آنه، کیین تورموش اورتاق و ایرنینگ قرینداشلری تامانیدن توشونمهسنگیز؛ یالغیز قالیب و باشقهلر بیلن بولیشنی اوستون کورهسیز.»
شمیلا هم شوندهی دییدی: «آته و آنهم اوقیمیشلی ایمس؛ اوقیش و کیلهجک آرزولریم حقیده گپیرگنده، رخصت بیریشمهیدی. فقط اوی ایشلرینی بجر دیب ایتیشهدی. مکتب و بیلیم یورتلر دروازهسی یاپیلیشی، آرزولریمنینگ هیچ ارزشی یوق دیب توشونیشیمگه آلیب کیلدی و شو مسئله مینی اوزگرتیردی.»
اجتماعی ترماقلر؛ یالغیزلیک حسینی آشیرهدی
گزارشده صحبت قیلگنلردن ۲۷ نفر یاش گه کوره، اجتماعی ترماقلرده اوزلرینی باشقهلر بیلن سالیشتیریش و یالغیزلیک حسی اولرنینگ جمعیتدن چیکینیشینی کوچهیتیرگن. بو یاشلر، آنلاین میدانده باشقهلرنینگ حیات طرزی، اجتماعی ایرکینلیکلری و کینگ دوستانه مناسبتلرینی کوزهتیش اولرنینگ موفقیتسیزلیک و اوزینی قدرسیز حس قیلیشلرینی کوچهیتیرگنیگه ایشانیشهدی.
عکسینچه، ینه سکیز نفر یاشلر ایسه اجتماعی ترماقلرده فعالیت یوریتمسلیگینی و بو محیط اولرنینگ شخصی خصوصیتلری یا کی اجتماعی علاقهلریگه هیچ قندهی تأثیر قیلمهگنینی قوشیمچه قیلهدیلر.
هرات یشاوچیسی ۲۵ یاشلی علی شوندهی دییدی: «اجتماعی ترماقلرده کوپچیلیک ایرکین فکر بیلدیرهیاتگنینی یا کی کینگ دوستانه علاقهلر گه ایگه ایکنلیگینی کورگنیمده، اوزیمنی موفقیتسیز حس قیلهمن و کاش مین هم اولر گه اوخشب بوله آلسم دیب آرزو قیلهمن.»
فاریابلیک ۲۲ یاشلی تهمینه گه کوره: «اجتماعی ترماقلرده باشقهلرنینگ مکمل کورینیشی بعضاً مینینگ یالغیزلیک حسیمنی کوچهیتیرهدی؛ گرچی کوپلب بو تصویرلر حقیقت گه توغری کیلمسلیگینی بیلسم هم.»
جمعیتدن چیکینیش و روحی سلامتلیک
اوشبو گزارش گه کوره، یاشلرده یالغیزلیک و اجتماعی چیکینیش تجربهسی تورلیچه عاقبتلر گه آلیب کیلگن. صحبت قیلگنلرنینگ ۱۲ نفری بو حالت اولرنی توشکونلیک، خواطر و حیاتدن ناراضیلیککه ییتکزگنینی ایتیشگن. باشقه ۲۳ نفر ایسه اوشبو خصوصیتدن ممنون بولیب، اونی اوز حیات طرزی طبیعی بیر قسمی دیب حسابلشهدی.
اوشبو یاشلر، تینگلش اوچون اودیو یازولر، کتاب اوقیش همده یقین دوستلر و عایله اعضالری بیلن وقت اوتکزیشنی حیاتلریده تینچلیک و قووانچ حسینی یرهتهدیگن مهم فعالیتلر دیب بیلیشهدی.
قندوز یشاوچیسی ۲۶ یاشلی سوسننینگ ایتیشیچه: «مین جوده کوپ استرس گه توشدیم و حتا روانشناس گه مراجعت قیلدیم. بیر آز یخشیلنیش سیزدیم؛ بیراق هنوزگچه توشکونلیک دوریده توریب من.»
قندوزلیک ۳۰ یاشلی فرزانه بوتوغریده شوندهی دییدی: «یالغیزلیک و جمعیتدن اوزاقلشیش مینگه روحی توشکونلیک، خواطر و حوصلهسیزلیک کیلتیردی و حاضر مین توشکونلیک دارولرینی استعمال قیلهمن.»
روانشناسلرنینگ فکریچه، ایچکی دنیا گه یونهلتیریلگنلیک شخصنینگ طبیعی خصوصیتی بولیب، اوز-اوزیدن یاشلرنینگ حیاتیگه سلبی تأثیر قیلمهیدی؛ بیراق بوندهی شخصلرنی تنقید قیلیش و باستیریش جدی توشکونلیککه آلیب کیلیشی ممکن.
روانشناس محمدالله بلوچ شوندهی دییدی: «ایچکی دنیا گه یونهلتیریلگنلیک انساننینگ شخصیتی تورلریدن بیری دیر. بوندهی شخصلر چیکلنگن ملاقات گه ایگه بولیشهدی؛ بیراق یالغیزلیکده اولر یخشی غایهلرنی یرهتیشلری ممکن. کوپلب حاللرده ایچکی دنیا گه یونهلتیریلگن بولیش ایجابی خصوصیت حسابلنهدی و اونی باستیریش ایسه شخصنی جمعیتدن اوزاقلشتیرهدی.
اقتصادی باسیملر، عایلهوی الگولر اوزگریشی و اجتماعی ترماقلرنینگ کینگهیشی کوپلب یاشلرنینگ حیات طرزینی باشقچه تجربه قیلیشگه سبب بولگن. شو بیلن بیرگه، یالغیزلیککه اینتیلیش و جمعیتدن چیکینیش یاش اولاد آرهسیده اعتبار گه مالک حادثهلردن بیریگه ایلنگن.
