اوتگن اوروش‌لر و طبیعی آفت‌لر باعث اوی_جای‌لرینی ترک قیلیب بلخ مرکزی مزارشریف شهری اطرافی ده خیمه‌لر آستیده حیات کیچیریب کیله‌یاتگن عایله‌لردن بیرقطاری نینگ ایتیشلریچه، حتا دستلبکی امکانیت‌لردن فایده‌لنه آلمه‌یدیلر.
مزارشریف شهری ده آواره‌لر کمپی ده مهاجرلردن الله‌داد نینگ ایتیشیچه: «آچلیک ده چیده‌ش ممکن؛ بیراق سووسیزلیک ده چیده‌ش قیین دیر. برچه‌میز قیینچیلیک بیلن روپه‌ره‌میز. حتا پول گه ساتیب آلیش اوچون سوو تاپیلمه‌یدی.»
بیزلرنینگ فیسبوک صحیفه‌میزگه باش اورینگ!
مزارشریف ده مهاجرلر کمپی ده مهاجرلردن باشقه بیری غفار، مسئوللر نینگ دقت‌سیزلیگیدن نالیب ایتیشیچه: «اساسی قیینچیلیک سوو و نان دیر. کلینک فعال ایمس و مسجدیمیز یوق. بیز گه دقت قیلیش‌لرینی ایسته‌یمیز.»
آچلیک، دستلبکی امکانیت‌لردن فایده‌لنه آلمسلیک، ساغلیک خذمت‌لر و تعلیم زمینه‌سی یره‌تیلمسلیگی، ایش فرصت‌لری یوق‌لیگی و انسان پرورلیک یاردم‌لر کمه‌یشی، بلخ ده مهاجرلر نینگ اساسی قیینچیلیک‌لریدن سنله‌دی.
داکتر بولیش آرزوسیده بولگن مهاجر باله‌لردن بیری رازمحمد، سرپرست حکومت دن او و باشقه مهاجر باله‌لر گه تعلیم زمینه‌سینی یره‌تیشنی طلب قیله‌دی. اونگه کوره: «سبق اوقیشنی ایسته‌ی من و کیله‌جک ده داکتر بولیب و یشاوچیلر گه خذمت قیلیشنی آرزو قیله‌من.»
بیزلرنینگ توییترده هم تعقیب قیلینگ!
شو بیلن بیرگه، بلخ مهاجرلر باشلیغی اسدالله وفا نینگ ایتیشیچه، قطار آواره‌لر گه یاردم کورسه‌تیلیب و اوی‌لری گه قیتیریلگن و قالگن مهاجرلر نینگ قیینچیلیگینی حل قیلیش اوچون سعی‌وحرکت قیلماقده‌لر. او نینگ کوپه‌یتیریشیچه: «بلخ شمال زونی ده بویوک ولایت اوله‌راق اوروش باعث مینگلب آواره میزبانی دیر. بیز آواره عایله‌لر گه یاردم بیریش گه قوشیمچه، اولرنی منطقه‌لری گه قیتیریش زمینه‌سینی یره‌تیش اوچون سعی‌وحرکت قیلماقده‌میز.»
بلخ مهاجرلر ریاستی نینگ معلوماتی اساسیده، حاضرگی کونده مزارشریف شهری نینگ تورلی منطقه‌لریده قریب ۳۰ مینگ آواره عایله تیریکچیلیک قیلماقده‌لر.