دوشنبه کیچه، ۲۲ جوزا، بدخشان مرکزی فیض‌آباد شهری ده اوزبیک شاعرلری دن بیرقطاری، «شعر کیچه‌سی» عنوانی ده فرهنگی برنامه یولگه قویگنلر.
بدخشان ده «شعر کیچه‌سی» برنامه‌سی تشکیلاتچیلری، اوشبو برنامه یولگه قوییلشیدن مقصد اوزبیک شاعرلرینی تانیشتیریش و ترغیب قیلیش عنوان قیلیب ایتیشلریچه، مذکور برنامه ده شاعرلر شعر دکلمه قیلیش گه قوشیمچه اوزبیک ادبیاتی تاریخی و فرهنگی حقیده هم معلومات بیرگنلر.
اوشبو برنامه تیشکیلاتچیلریدن بیری مسعود تیموری نینگ سلام‌وطندار گه ایتیشیچه، اوزبیک تیلی ده یازیلگن ادبی اثر کورگزمه‌سیدن کیین، بو بدخشان ده شعر کیچه‌سی عنوانیده یولگه قوییلگن اوزبیک تیلی شاعرلری نینگ ایکینچی فرهنگی برنامه‌سی دیر.
بیزلرنینگ فیسبوک صحیفه‌میزگه باش اورینگ!
مسعود تیموری نینگ کوپه‌یتیریشیچه: «اوزبیک شاعرلرینی ترغیب قیلیش و اولر آره‌سیده هماهنگ‌لیکنی کوچه‌یتیریش و مملکت تورلی قوم‌لری ارا برادرلیک و اتفاق‌لیک مقصدیده اوشبو برنامه یولگه قوییلگن، بو برنامه دن باشقه مقصد اوزبیک تیلی شاعرلری تانیشتیریلیشی و شعرخوان‌لیک فرهنگی رواجلنیشی دیر، بیز اوزبیک اوله‌راق اوزبیک تیلی اوستیده ایشلب کیلماقده‌میز، تیلیمیز اوسیشی اوچون سعی‌وحرکت قیلماقده‌میز.»
شعر کیچه‌سی دستوری ده اشتراک ایتگن شاعرلردن باشقه بیر قطاری، شاعرلر و فرهنگی‌لر حضوری ده شعرلرینی دکلمه قیلیش اوچون بو گَل فرهنگی برنامه‌لر گه اشتراک قیلگن‌لریدن خورسندلیک بیلدیره‌دیلر.
فاریاب ده اوزبیک تیلی شاعرلریدن محمدحنیف لطفی نینگ سلام‌طندار گه ایتیشیچه، انچه دن بویان بو کبی فرهنگی برنامه‌لر گه اشتراک ایتمه‌گن و باشقه ولایت ده اوزبیک شاعرلری حضوری بیلن بو گَل برنامه یولگه قوییلیشیدن خورسند دیر.
اونگه کوره: «بیر تیل نینگ ادبیاتی اوستیده ایشله‌نیب و بوکبی فرهنگی برنامه‌لر یولگه قوییلسه تیل رواجلنیب و اوسه‌دی، عکس‌حالده شاعرلر هم بو تیل ده شعر یازمه‌یدیلر، ایکی ییل دن کیین فرهنگی برنامه گه اشتراک قیلیب و شعر یازیش گه ترغیب‌لندیم، چونکه حمل آی دن بیری بیر پارچه شعر یازگنیم یوق، چونکه حاضرگی وضعیت اوستیدیم ده سلبی تأثیر قیلگن ایدی.»
بدخشان ده اوزبیک شاعرلریدن باشقه بیری صدرالدین مظلوم، مذکور برنامه یولگه قوییلیشینی خوش قرشی‌لب سلام‌وطندار گه ایتیشیچه، حاضرگی شرایط ده بو کبی فرهنگی برنامه‌لر یولگه قوییلیشی شعر و ادب اهلی نینگ ترغیبی گه سبب بوله‌دی.
او نینگ ایتیشیچه: «اسلام امیرلیگی دن شاعرلر اوچون انجمن تشکیل و اولر نینگ مطالعه‌سی اوچون شرایط یره‌تیشنی ایسته‌یمیز، چونکه شاعرلر یورت ده‌گی وضعیت نی شعر قالبی ده بیان قیله‌دی.»
بیزلرنینگ توییترده هم تعقیب قیلینگ!
بدخشان ده‌گی فرهنگی‌لر، اوزبیک شاعرلری نینگ شعر کیچه‌سی دستوری یولگه قوییلیشیدن خورسندلیک قیلیب ایتیشلریچه، بو گَل برنامه‌لر یولگه قوییلیشی ضیالی کیشی‌لر نینگ ترغیبی و شاعرلر نینگ تانیشتیریلیشی اوچون اونملی دیر.
شونینگدیک، مذکور فرهنگی برنامه گه اشتراک ایتگنلردن باشقه بیری امدادالحق تورال گه کوره، شاعرلری حضوری بولگن بو کبی برنامه گه اشتراک ایتیشیدن خورسند دیر. «اوشبو برنامه ده تورک‌لر نینگ ادبیات تاریخی و فرهنگی حقیده سوزلندی، بدخشان ده‌گی ییگیت‌لر تورک_اوزبیک تیلی ده بیلیم آلیشنی ایسته‌یدیلر، بدخشان ده اوزبیک، هزاره و تاجیک کبی اوروغ‌لر یشه‌ماقده، بیز کیم‌لیگیمیزنی سقلش اوچون بو گَل برنامه‌لر یولگه قوییلیشی اونملی دیر.»
بو، بدخشان ده اوزبیک شاعرلری و یازووچیلری نینگ ایکینچی فرهنگی برنامه‌سی بولیب، اوزبیک شاعری و یازووچیسی محمدنسیم نسیم نینگ حمایتی بیلن بدخشان مرکزی فیض‌آباد شهری ده یولگه قوییلگن.