بدخشان ولایتی ارگو و درایم تومنی یشاوچیلری، «ریزکان» سرکی خرابلیگیدن شکایت قیلماقدهلر. مذکور سرک اوشبو ایکی تومننی بدخشان مرکزیگه باغلهب و توارلرنی انتقال بیریش همده اوتیب-قیتیش یوللریدن بیری حسابلنهدی.
محل یشاوچیلریگه کوره، بو سرک خرابلیگی یول کرایهسی آشیشی، اوتیب-قیتیش سیکینلنیشی و ساغلیقنی سقلش خذمتلریدن کسللر فایدهلنیشینینگ قیینلنیشیگه سبب بولگن.
بدخشان ولایتی ارگو تومنی یشاوچیلریدن حمیداللهنینگ ایتیشیچه، ریزکان سرکی خرابلیگیدن کوپ وقت اوتیب و حاضرگچه اونینگ قیته قوریلیشی توغریده توجه قرهتیلمهگن.
اونگه کوره، سرک خرابلیگی و قار و یامغیر یاغیشی سبب، بو تومن یشاوچیلری قیینچیلیک بیلن روپهره بولیب و بعضا ایسه، کسللر مناسب وقتده دوالنیش مرکزیگه ییتیشه آلمهیدی. «ریزکان کوتلیده کوپینچه کسلنی قولدن بیرگنمیز. حاملهدار عیاللر یولده بالهسینی قولدن بیرگن. اوتمیشده سرک بیراز یخشی ایدی و موتر کرایهسی تومندن مرکزگچه ۱۰۰ افغانی ایدی. سرکنینگ کوپراق خراب بولیشی بیلن، موتر کرایهسی کوپهیب و حاضر ۲۰۰ افغانی تولهیمیز.»
بدخشان ولایتی درایم تومنی یشاوچیلریدن گلمحمدنینگ ایتیشیچه، سرک خرابلیگی سبب کسلینی مناسب وقتده ولایت مرکزیگه ییتیشتیره آلمهی و وضعیتی یامانراق بولگن.
اونینگ اورغولشیچه، بو وضعیت اهالینینگ باریب-کیلیشی، ساغلیقنی سقلش مرکزلریدن فایدهلنیشی و وضعیتی یامان بولگن کسللرنینگ انتقال بیریلیشینی قیینچیلیک بیلن روپهره قیلیب و ریزکان سرکی قیته قوریلیشی ضرور دیر. «سرکیمیز قیینچیلیگی اینیقسه قیشده نیچه برابر بولگن. یوللر لای بولهدی. کسلیمیز وقتده ولایت مرکزیگه ییتیشه آلمهیدی. هم قیش همده کمبغللیک دیر. یول کرایهسی ایکی برابر بولگن. بیر کیشی کسل بولگنیده ولایت مرکزیگچه باریش اوچون موتر کرایهسینی تاپه آلمهیدیلر.»
شوندهی بیرحالده، ارگو-فیضآباد تومنی یولیدهگی هیداوچیلردن بیری جاویدنینگ ایتیشیچه، سونگی پیتلرده ریزکان سرکی جدی شکلده خراب بولیب و بو وضعیت هیداوچیلرگه جدی زیانلرنی یتیشتیرگن.
اونگه کوره، بو سرک خرابلیگی سبب موتری هر کونی فنی قیینچیلیک تاپیب و ترمیملش خرهجتلری کوپهیگن. «هر کونی موتر چپه بولهدی، هر کونی بو ییرده اهالی شهید بولهدی. موترم بوزیلهدی، سرک وضعیتی کوپ خراب دیر. نیچه مرته کیچه تامان اوشبو ریزکان سرکیده قالگنمیز.»
شوندهی بیرحالده، بدخشان حاکمی اورینباسری جمالالدین حقجونینگ ایتیشیچه، ریزکان سرکی قیته قوریلیش لایحهسی منظور بولیب و اونینگ عملی ایشی تیزلیککه باشلنهدی. «ارگو دن درایمگچه بولگن سرک کوپ خراب بولگن. یقیندن کورگنمیز و خوشبختانه بدخشان ده حاضر بیشته لایحه منظور بولگن که بو لایحهلردن بیری ارگو دن درایمگچه بولگن ۴۲ کیلومتر سرک دیر.»
بوندن آلدین هم، محلی رسمیلر نیچه مرته ریزکان سرکی قیته قوریلیشی توغریسیده سوز بیرگن، بیراق حاضرگچه بو سوزلر عملگه آشیریلمهگن.
