افغانستان ماین تازه‌لش ملی دستوری نینگ ایتیشیچه، افغانستان ده ماین بیلن افلاسلنگن ساحه‌لر، ییلده بیر مینگ ۲۰۰دن آرتیق قربانلیک آله‌دی.
اوشبو نهاد باشلیغی محمدشهاب حکیمی نینگ سلام‌وطندار گه ایتیشیچه: «حاضرگچه افغانستان ماین تازه‌لش دستوری، افغانستان نینگ ماین بیلن افلاسلنگن ساحه‌لریدن ۷۰ فایزینی تازه‌لگن و قالگن ۳۰ فایزی خصوصیده هم پلان بار که مالی یاردم‌لر کیلگنی صورت‌ده کیله‌سی ۷ ییل‌گچه تازه‌لنسه. قالگن ماین‌لردن کوپراق باله‌لر زیان کوره‌دی، شونینگدیک بو ساحه‌لرده بولگن عیاللر و ایرککلر هم زیان کوره‌دی، لیکن باله‌لر کوپراق دیر. آی ٔه ۶۰-۷۰ تلفات رقمی بار که اولردن کوپینچه‌سینی باله‌لر تشکیل بیره‌دی و ییلده ۱۲۰۰-۱۳۰۰ تلفات بار.»
بیزلرنینگ «ایکس» ترماغی ده هم تعقیب قیلینگ!
شونینگدیک ینگی‌لیکده هلوترست ماین تازه‌لش تشکیلاتی نینگ اعلام قیلیشیچه، جاری میلادی ییلده افغانستان نینگ ۲۶ ولایتی‌ده ۶۵ کیلومتر‌مربع‌دن آرتیق منطقه نینگ ماین بیلن افلاسلنگنی انیق‌لنگن. مذکور تشکیلات نینگ معلوماتی اساسیده، بو رقم ۲۰۲۲-ییلده ۵۳ کیلومترمربع گه ییتیشه‌ر ایکن.
باشقه بیر تاماندن، اوتگن اوروشلردن پارتلمه‌ی قالگن ماین‌لردن زیان کورگنلردن قطاری حیات کیچیره‌دیگنلری محل نینگ افلاسلیگی‌دن خواطر بیلدیریب، حکومت و همکار موسسه‌لردن افغانستان نینگ ماین‌لردن تازه‌لنیشی گه توجه قره‌تیلیشینی ایسته‌گنلر.
اوروشلردن پارتلمه‌ی قالگن ماین‌لر نینگ پارتلشی عاقبتیده زیان کورگنلردن بیری نینگ یقین‌داشی بولمیش غزنی ولایتی ناهور تومنی نینگ «جوشو» قیشلاق یشاوچیسی محمد نسیم گه کوره: «قیین‌چیلیکلریمیزدن بیریش اوشبو اوروشلردن پارتلمه‌ی قالگن ماین‌لر دیر. باله‌لریمیز، چاروه‌لریمیز بار. ماین پارتله‌یدی. نیچه کون آلدین بیر واقعه یوز بیریب و ایکی کیشی یره‌لندی و بیر ییگیت اولدی. اسلام امیرلیگی و موسسه‌لردن ماین‌لر نینگ تازه‌لنیشی و اورته‌دن کیتگزیلیشینی ایسته‌یمیز.»
شونینگدیک بو توغریدن زیان کورگنلردن بیری بولمیش غور ولایتی یشاوچیسی نوراحمد نینگ ایتیشیچه: «اوریب آلیش اوچون باریش پیتیده قیشلاق‌دن اوته‌میز. ابه‌م نینگ اوغلی بیلن ییرلر یقینی‌ده ایدیک که ماین موترسایکلیمیز بیلن توقنشدی و موترسایکلیمیز تکه تکه بولدی. اوزیمیز بیلمه‌دیک که ۲۰-۳۰ متر اوزاققه توشگن‌میز. هوش گه کیلگنیمیز‌ده ابه‌م اوغلی نینگ ایاغی مکمل شکلده اورته‌دن کیتگن و اوزیم نینگ یوزیم باشیم هم یره‌لنگن. دولت و همکار موسسه‌لردن ماین‌لر بیلن افلاسلنگن ساحه‌لر نینگ تازه‌لنیشینی ایسته‌یمیز.»
بیزلرنینگ فیسبوک صحیفه‌میزگه باش اورینگ!
گزارشلر اساسیده، افغانستان توپراغی‌دن اوچ‌دن بیری ماین‌لر بیلن افلاسلنگن و مذکور ماین‌لر پارتلشی قربانی‌لریدن کوپینچه‌سی هم باله‌لر و قیشلاق یشاوچیلری دیر.
بوندن آلدین بیرلشگن ملتلر تشکیلاتی نینگ انسان پرورلیک یاردم‌لرنی هماهنگ قیلووچی اداره‌سی (اوچا)، افغانستان ده انیق‌لنگن ۴۱۵۰دن آرتیق خوف حاضرگچه تازه‌لنمه‌ی قالگن که جمعیت اینیقسه باله‌لر اوچون تهدید حساب‌لنه‌دی.
