۲۱-عصر تکنولوژی دنیاسی گه مشهور بولگن بولسه‌ده؛ لیکن ینه هم افغانستان ده ییگیتلردن کوپ قطاری تورلی سبب‌لر گه اوشبو ینگی دنیادن اوزاق قالگنلر. سلام‌وطندار نینگ افغانستان ده ۳۴ ییگیت بیلن اوتگزگن صحبتی گه کوره، اولر کونده‌لیک حیاتلریده تکنولوژی و اینترنت‌دن آزراق شکلده قوللنه‌دیلر.
مذکور ۳۴ ییگیت‌دن، ۱۰ ته‌سی اوزاق منطقه‌لرده حیات کیچیریش سبب، اینترنت و تکنولوژیدن فایده‌لنه آلمه‌یدی؛ ۱۷ ته‌سی آزراق فایده‌لنه‌دی و اولردن باشقه ییتی ته‌سی ایسه مکمل شکلده اینترنت‌دن فایده‌لنیب و کونده‌لیک حیاتلریده قوللنه‌دیلر.
تکنولوژی و اینترنت‌دن فایده‌لنه آلمه‌یدیگن ۱۰ کیشی نینگ ایتیشلریچه، اینترنت نینگ قنده‌ی قوللنیلیشی خصوصیده اهالی نینگ معلومات‌سیزلیگی، شهری منطقه‌لردن اوزاق بولیش، اینترنت صفتی قوییلیگی و جمعیت‌ده ناتوغری عنعنه‌لر سبب، زمانه‌وی تکنولوژیدن اوزاق بولگنلر.
بامیان یشاوچیسی و زمانه‌وی تکنولوژیدن فایده‌لنه آلمه‌گن شیرحسین نینگ ایتیشیچه: «حیات کیچیره‌دیگنیمیز منطقه‌ده اینترنت ایشلمه‌یدی و قونقیراق اوچون سیم‌لی تلیفون‌لردن قوللنه‌میز و اقتصاد هم یخشی ایمس. کمپیوتر نی هم بیلمه‌یمن.»
تخار یشاوچیسی و زمانه‌وی تکنولوژیدن فایده‌لنه آلمه‌گن فضل‌الله نینگ ایتیشیچه: «تکنولوژی خصوصیده اونچه‌لیک نرسه بیلمه‌یمیز؛ یالغیز تلویزیونی‌میز بار؛ اینترنت‌دن قوللنمه‌یمیز؛ چونکه قیمت و ایشلمه‌یدی.»
بیزلرنینگ فیسبوک صحیفه‌میزگه باش اورینگ!
شونینگدیک تخار یشاوچیلریدن باشقه بیری و زمانه‌وی تکنولوژیدن فایده‌لنه آلمه‌گن حسیب‌الله نینگ ایتیشیچه: «بو ییرده‌گی اهالی‌دن کوپینچه‌سی فایده‌لنه آلمه‌یدی؛ بیرینچی‌ده اهای نینگ معلوماتی یوق و شو رقم صفتی قویی و قوللنمه‌یدیلر. مین نوکیا موبایلی‌دن قوللنه‌من؛ اقتصادم هم یخشی ایمس.»
شونینگدیک قندوز یشاوچیلری ثنا و مرسل و بامیان یشاوچیسی نیک‌بخت نینگ ایتیشلریچه، عایله‌وی چیکلاولر سبب، هوش‌مند موبایل‌لردن قوللنه آلمه‌یدیلر و انه شوو تکنالوژی عالمی‌دن اوزاق‌لر.
ثنا نینگ ایتیشیچه: «تلویزیونی‌میز بار؛ آته‌م و آنه‌م‌ده موبایل بار؛ بیراق یاش قیزلر موبایل آلالمه‌‌یدیلر؛ اینترنت قیمت دیر.»
مرسل نینگ ایتیشیچه: «هیچ فایده‌لنه آلمه‌یمیز؛ یالغیز آته‌م‌ده موبایل بار و بیزلر نی مکتب گه قویمه‌یدی؛ موبایل خو اوزاق بیر موضوع و شو رقم اینترنت قیمتی هم کوپ دیر.»
شونینگدیک نیک‌بخت نینگ ایتیشیچه: «ییتی سینگیل‌میز و موبایلیمیز یوق؛ قوللنمه‌یمیز و یالغیز آته‌م ایشله‌یدی. صنعی هوش/ ذکاوت نی هیچ ایشیتمه‌گن‌میز و بیلمه‌یمیز.»
اوشبو گزارش‌ده صحبت قیلینگن و نسبی شکلده اینترنت و کونده‌لیک تکنولوژیدن فایده‌لنه‌دیگن ۱۷ کیشی نینگ ایتیشلریچه، اینترنت قیمتی نینگ یوقاریلیگی سبب بعضی وقت دنیاده‌گی ینگی موضوع‌لردن اوزاق قاله‌دیلر و باشقه بیش کیشی نینگ کوپه‌یتیریشیچه، اینترنت بسته‌لری نینگ قیمتی کوپ؛ لیکن ینه هم تعلیمی قیین‌‌چیلیکلرنی حل قیلیش اوچون اوندن قوللنیش گه مجبورلر.
کابل یشاوچیسی و خبرچیلیک بولیمیده تحصیل کورگن محمد، اینترنت و تکنولوژی گه قول تاپگنی بیلن؛ بیراق اینترنت قیمتی یوقاریلیگی و صفتی قویی‌لیگی‌دن شکایت قیله‌دی. اونینگ کوپه‌یتیریشیچه، اینترنتی خذمت‌لر قیمتی یوقاریلیگی سبب تعلیمی ماده‌لرگه قول تاپیش امکانیتی‌دن اوزاق قالگن.
محمد نینگ ایتیشیچه: «بیراز قیین‌چیلیگیمیز حل بوله‌دی؛ اینترنت نینگ یوقاری قیمتی تاثیر قویه‌دی؛ قیمتی یوقاری و اینترنت صفتی یخشی هم ایمس و قوللنیشی‌میز کیره‌ک بولگنی‌ده‌ی قوللنه آلمه‌یمیز. مین یوتیوب‌ده تعلیمی ماده‌لر نی کوریشیم کیره‌ک؛ لیکن کوره آلمه‌یمن.»
کابل ده حیات کیچیره‌دیگن و تکنولوژیدن بیراز فایده‌لنه‌دیگن اوشبو گزارش‌ده صحبت قیلگنلردن باشقه بیری زحل نینگ ایتیشیچه، اینترنت نینگ صفتی یخشی ایمس و ایسته‌گنی قدر تکنولوژیدن فایده‌لنه آلمه‌یدی.
اونینگ کوپه‌یتیریشیچه: «زمانه‌وی دنیا، تکنولوژی دنیاسی دیر و بوگون هر کیم ایسته‌سه و ایستمه‌سه قول تاپگن و ۵۰ فایز فایده‌لنه‌من. افغانستان ده اینترنت کوپ ضعیف؛ کوپ قیین شکلده فایده‌لنه آله‌میز و کوپ قیمت هم دیر.»
مذکور گزارش‌ده صحبت قیلینگن و تکنولوژیدن فایده‌لنه‌دیگن ییتی ییگیت نینگ ایتیشلریچه، حاضرگی دنیا ینگی تکنولوژی دنیاسی دیر و بو طریق‌دن شخصی ترقیاتلری نینگ کوپه‌یتیریشلری ممکن. اولر نینگ کوپه‌یتیریشلریچه، حاضرگی کونده بیلیم یورت‌لر و مکتب‌لر ییگیت‌لر یوزیگه یاپیق و تکنولوژی دنیاسیدن فایده‌لنیش، اولر نینگ تعلیم آلیش گه مجبور قیله‌دی.
کابل یشاوچیلری و بیلیم یورت‌لر ایشیگی قیزلر یوزیگه یاپیلگنی‌دن کیین تحصیل‌دن محروم قالگن مریم و حمیده نینگ ایتیشلریچه، تکنولوژیدن فایده‌لنیش شرایطی اولر گه مساعد بولیب و حاضر ایسه آنلاین درس‌لر اوچون یوتیوب و باشقه فایده‌لی برنامه‌لردن قوللنه‌دیلر.
بیزلرنینگ «ایکس» ترماغی ده هم تعقیب قیلینگ!
مریم نینگ ایتیشیچه: «تکنولوژی انسان‌لر حیاتی‌ده سهمی بار؛ آنلاین درس‌لر و تعلیم اوچون قوللنه‌میز، اینیقسه مکتب‌لر یاپیلگنی بیر شرایط‌ده یوتیوب و بو نرسه‌لر یاردم بیره‌دی و مین انگلیسچه اورگه‌نیش اوچون قوللنه‌من.»
شونینگدیک حمیده نینگ ایتیشیچه: «تکنولوژیدن فایده‌لنه آله‌من؛ آنلاین درسلریم بار. کابل ده ییگیت‌لر تکنولوژیدن فایده‌لنه آله‌دی؛ حتا باله‌لر هم قول تاپه آله‌دی؛ بیراق ولایت‌لرده فایده‌لنه آلمه‌یدیلر؛ چونکه برق و اینترنت‌دن فایده‌لنه آلمه‌یدیلر.»
مذکور گزارش‌ده صحبت قیلینگنلردن قطاری نینگ ایتیشلریچه، عمومی معلومات نی قولگه کیلتیریش یانیده، اویین-کولگی اوچون هم اینترنت‌دن قوللنه‌دیلر.
خبرچیلیک بولیمی طلبه‌سی مصطفا امیری و حقوق بولیمی نی بیتیرگن احمد نینگ ایتیشلریچه، تعلیمی موضوع‌لر خصوصیده تکنولوژیدن قوللنیشلری یانیده، بی‌کار‌لیک وقتلریده هم اویین-کولگی اوچون اینترنت‌دن قوللنه‌دیلر.
مصطفا نینگ ایتیشیچه: «تکنولوژیدن قوللنیش خصوصیده بیران توسیق‌لیک نی کورمه‌یمن و قول تاپه آله‌من؛ کوپراق تعلیم و اویین-کولگی اوچون قوللنه‌من؛ فیسبوک و کلش‌آف کلنز گیمی‌دن قوللنه‌من.»
شونینگدیک احمد نینگ ایتیشیچه: «۱۰۰ فایز فایده‌لنه آله‌میز؛ پابجی، اینستاگرام و تیک‌تاک اوچون قوللنه‌میز؛ وای‌فای آلگن‌میز و اقتصادی دیر.»
باشقه بیر تاماندن، اوشبو گزارش‌ده صحبت قیلگن ییگیتلردن قطاری نینگ ایتیشلریچه، حاضر ایسه زمانه‌وی تکنولوژیدن کوپراق ایش و سوداگرلیک بولیمیده قوللنه‌دیلر.
کابل یشاوچیسی و سوداگرلیک اداره‌سی بولیمی طلبه‌سی لطف‌الرحمان نینگ ایتیشیچه: «قریب بیر ییل بوله‌دی که چت‌جی‌پی‌تی‌دن قوللنه‌من؛ تورلی رقم‌لری بار و برچه‌سیدن قوللنه‌من و ینگی چت‌جی‌پی‌تی‌دن بیر ییل بوله‌دی که قوللنه‌من. گوگل جمینای بار، ایش و دفتری بولیم‌لریده کوپراق قوللنه‌من.»
شونینگدیک کابل یشاوچیسی و خبرچیلیک طلبه‌سی عبید نینگ ایتیشیچه: «حاضر چت‌جی‌پی‌تی ایشلر نی کوپ قوله‌یلشتیرگن؛ مین هر کونی قوللنه‌من و انسان‌لر گه کوپ فایده‌لی.»
عین حالده، (اترا) یا-ده افغانستان مخابراتی خذمت‌لر نی تنظیم قیلووچی اداره‌سی سوزلاوچیسی جلال‌الدین شمس نینگ ایتیشیچه، حاضر افغانستان ده ۱۲ میلیون‌دن آرتیق کیشی اینترنت‌دن فایده‌لنه آله‌دی.
اونینگ کوپه‌یتیریشیچه: «حاضر ایسه افغانستان ده ۲۳ میلیون کیشی مخابراتی خذمالردن فایده‌لنه آله‌دیلر و بو آره‌ده ۱۲ میلیون‌دن آرتیق کیشی اینترنت‌دن فوللنه‌دی. اوتگن ییلی اترا اداره‌سی کوپینچه بیلیم یورت‌لر گه وای‌فای باغله‌دی که بو رقم طلبه‌لر اینترنت‌دن قوللنسه.»
دنیا مملکت‌لریدن کوپ قطاریده اینترنت ایش و درآمد اوچون بیر یول بولگنی بیرحالده، افغانستان ده ییگیتلردن قطاری اینترنت‌دن آزراق فایده‌لنه‌دی.