اطراف-محیطنی سقلش ملی اداره مسئوللری، بوگون (چهارشنبه، ۱۶-جوزا/ ۵-جون)، بیر ییغین آرقهلی «ییریمیز، کیلهجگیمیز» شعاری بیلن ۵-جون خلقارا اطراف-محیط کونیدن نشانلهگنلر.
اطراف-محیطنی سقلش ملی اداره سرپرستی حافظ عزیزالرحمان، قوروقچیلیک، سوو تاشقینلر و اطراف-محیط افلاسلیگی نی، هوا اوزگریشلری نینگ اساسی عامللریدن بیلیب و ایتیشیچه، افغانستان ده هوا اوزگریشلری نتیجهسیده مملکت اورمانلریدن ۵۰ فایزی اورتهدن کیتگن.
اونینگ کوپهیتیریشیچه: «مملکتده هوا اوزگریشلری سبب، ییرلر نینگ ۴۰ فایزی خراب بولیب و مملکت اورمانلریدن ۵۰ فایزی اورتهدن کیتگن؛ بیراق بو اداره نینگ سعیوحرکتی نتیجهسیده، ۲.۸ فایز اورمانلر کوپهیگن.»
بیزلرنینگ فیسبوک صحیفهمیزگه باش اورینگ!
اطراف-محیطنی سقلش ملی اداره مسئوللری، اطراف-محیط قانونی نی کوریب چیقیش، اطراف-محیط پالیسیلری ییغیلیشی، بیش ییللیک استراتژیک برنامهلر ایجاد بولیشی، هوا درجهسی کمهیشی برنامهلری یرهتیلیشی و اطراف-محیطنی سقلش اوچون برنامهلر نینگ عملگه آشیریلیشی نی، بو اداره نینگ یوتوقلریدن عنوان قیلهدیلر.
شوندهی بیرحالده، اسلام امیرلیگی باش وزیری نینگ اداری اورین باسری عبدالسلام حنفی، خلقارا نهادلردن باشقه مملکتلرده هوا اوزگریشلری اوچون یولگه قوییلهدیگن اونملی ییغیلیشلر گه اسلام امیرلیگی نینگ هم دعوت بولیشی نی ایستهگن.
اونینگ ایتیشیچه: «مملکتلر افغانستان بیلن همکارلیک قیلیشی کیرهک و باشقه مملکتلرده هوا اوزگریشلری اوچون یولگه قوییلهدیگن اونملی ییغیلیشلر گه اسلام امیرلیگی نینگ دعوت بولینیشی نی ایستهیمیز.»
عین حالده، حادثهلر گه ییتیشیش بوییچه دولت وزیرلیگی مسئوللری، سونگی سوو تاشقینلر نینگ افغانستان ده هوا اوزگریشلری گه سبب بولگن عامللردن بیری بیلیب و ایتیشلریچه، ۲۰-ثوردن حاضرگچه ۱۴ ولایتده یوز بیرگن سوو تاشقینلر نتیجهسیده، ۲۹۴ کیشی اولیب و ۲۶۶ کیشی ایسه یرهلنگن.
حادثهلر گه ییتیشیش بوییچه دولت وزیرلیگی سرپرستی عبدالرحمان زاهد نینگ ایتیشیچه، مذکور سوو تاشقینلر نتیجهسیده، ۱۴ مینگدن آرتیق یشش اوی قسماً و بوتونلی ویران بولیب و ۶۰۰۶ باش چاروه تلف بولگن.
شونینگدیک افغانستان ده بیرلشگن ملتلر تشکیلاتی نینگ رواجلنتیریش دستوری مسئوللری گه کوره، بیرلشگن ملتلر تشکیلاتی افغانستان ده هوا اوزگریشلری بیلن قرشی کورهش اوچون، بو مملکت آستقورمهلری خصوصیده سرمایه یاتقیزهدی.
بیزلرنینگ «ایکس» ترماغی ده هم تعقیب قیلینگ!
افغانستان ده بیرلشگن ملتلر تشکیلاتی نینگ رواجلنتیریش دستوری نمایندهسی استفان رودریگز نینگ ایتیشیچه، اولر بیرلشگن ملتلر تشکیلاتی نینگ ۲۹-هوا اوزگریشلری ییغیلیشی یا-ده «کاپ ۲۹» گه اسلام امیرلیگیدن نمایندهلر دعوت بولینیشی گه سعیوحرکت قیلهدیلر.
اونینگ کوپهیتیریشیچه: «افغانستان ده هوا اوزگریشلری بیلن قرشی کورهش اوچون، آستقورمهلر خصوصیده سرمایه یاتقیزهمیز و شونینگدیک کاپ ییغیلیشی گه اسلام امیرلیگی نمایندهلریدن دعوت بولینیشی اوچون تلاش قیلهمیز.»
ایتیش کیرهک که، افغانستان اسلام امیرلیگی نینگ رسمیت گه تانیلمهگنی سبب، دنیا هوا اوزگریشلری ییغینلری گه شرکت قیلیشدن محروم بولیب و شونینگدیک افغانستان ده اطراف-محیط بولیمیده خلقارا جمعیت نینگ ۳۲ لایحه ایشی هم توختهتیلگن دیر.