افغانستان برق یېتکزیش شرکت (برشنا) عمومی باشلیغی عبدالباری عمر، ایچکی منبعلردن برق ایشلب چیقریش اوچون حاضرگه قدر ۷۱۹ میلیون دالر سرمایه کیریتیلگنینی معلوم قیلدی.
عمر جنابلری، بوگون (۴-قوس/۲۵-نومبر، سهشنبه)، کابلده اۉتکزیلگن مطبوعاتی ییغیلیشده ایتیشیچه، ایچکی منبعلردن برق ایشلب چیقریش اوستیگه ایش آلیب باریلماقده.
عمر گه کوره، ایچکی منبعلردن ۲۰ مینگ میگاوات برق ایشلب چیقریش و اونینگ توزیع قیلیش اوچون، کمیده ۱۰ ییل وقت کېرهک.
عبدالباری عمر، افغانستاننینگ برق یېتکزیش شرکتی دستلب معیارسیز و ضعیف شکلده قوریلگن و مملکتنینگ حاضرگی احتیاجلرینی تأمینلهی آلمسلیگینی ایتهدی. اونگه کوره، برق ایشلب چیقریش ترقیاتی لایحهلر دوام ایتماقده و اونینگ توگهلیشی اوچون وقت کېرهک.
برق تقچیلیگی و اونگه بولگن چېکلاولر، افغانستان یشاوچیلرینینگ اساسی قیینچلیکلریدن بیری حسابلنهدی. برشنا شرکتینینگ معلوماتیگه کوره، فقط مملکتنینگ ۳۸ فایز اهالیسی برق بیلن تأمینلنگن.
