سرپرست حکومت تشقی ایشلر وزیرلیگی نینگ سیاسی معینی شیرمحمدعباس استانکزی، بوگون (دوشنبه، ۱۵-عقرب)، کابل ده افغانستان اقتصادی ترقیاتی عنوانی ده یولگه قوییلگن ییغیلیش ده، افغانستان سوولری باشقریلیشی اوستیگه تاکیدلب ایتیشیچه، سرپرست حکومت مملکت بویلب سوولرنی باشقریش اوچون سوو توغان‌لرینی قوریب و ریجه‌لرینی عملی قیلیش گه متعهد دیر.
اونگه کوره: «ییل‌لردن بیری سوولریمیز باشقریلمه‌ی کیله‌یپتی و اوندن قوشنی اولکه‌لر فایده‌لنماقده، عین‌حالده قوشنی‌لریمیز خورسند ایمس‌لر و منتدارلیک بیلدیرمه‌دیلر، اسلام امیرلیگی مملکت بویلب سوو توغان‌لرینی قوریب و سوولرنی باشقریش گه متعهد دیر.»
بیزلرنینگ فیسبوک صحیفه‌میزگه باش اورینگ!
تشقی ایشلر وزیرلیگی نینگ سیاسی معینی گه کوره، حاضر افغانستان سوو تنقیص‌لیگی و قورغاقچیلیک بیلن روپه‌ره دیر و حاضرگی قلتیس شرایط ده باشقه مملکت‌لر نینگ نیازی بولگن سوو نی تامین قیله آلمه‌یدی.
شیرمحمدعباس استانکزی نینگ کوپه‌یتیریشیچه: «بیز قوشنی اوله‌راق، قوشنی‌لری میز گه روا کوره‌میز، لیکن یشاوچیلر نینگ قیینچیلیگی حل بولیب، ایکینچیلیک محصولات گه ییترلیچه سوو ییتسه و بیز دن کوپ‌لیک قیلسه قوشنی‌لر گه بیره‌میز، بیراق اوزیمیز قورغاقچیلیک و سوو تنقیص‌لیگی بیلن روپه‌ره بولسک، قوشنی اولکه‌لر بیز دن توقع قیلمه‌سین‌لر.»
اوشبو ییغیلیش ده سوو و برق وزیرلیگی مسئوللری نینگ ایتیشلریچه، مملکت سوولری اساسی روشده باشقریلگن حالده، افغانستان سوو تنقیص‌لیگی بیلن روپه‌ره بولمه‌یدی.
سوو و برق وزیرلیگی نینگ ییریک مصلحتچیسی فاروق اعظم نینگ کوپه‌یتیریشیچه: «ییترلیچه منبع‌لریمیز بار، سوویمیز کوپ دیر باشقریلگن حالده برچه قوشنی‌لریمیز بیز گه محتاج بوله‌دیلر.»
بیزلرنینگ «ایکس» ترماغی ده هم تعقیب قیلینگ!
عین‌حالده، ایران رسمی‌لری سرپرست حکومت باش وزیری نینگ اقتصادی اورین باسری ملابرادر بیلن اوچره‌شوولری ده، هلمند دریاسی دن ایران نینگ حق‌آبه‌سی و سوو حوزه‌سیده همکارلیک‌لر آشیریلیشی اوستیگه تاکید ایتگنلر.
سونگی ایکی ییل ده مملکت نینگ بیر قطار دریالری ده سوو توغان‌لری و قوش‌تیپه کانالی قوریلیشی، قوشنی اولکه‌لر جمله دن ایران و اوزبیکستان نینگ قرشی‌لیگی بیلن دوچ بولگن بیرحالده، سرپرست حکومت رسمی‌لری مملکت بویلب سوولر باشقریلیشی اوستیگه تاکید ایتماقده‌لر.
اوزبیکستان جمهور باشلیغی قریب ایکی آی آلدین قوش‌تیپه کانالی قوریلیشی خصوصیده خواطر بیلدیریب و اوشبو کانال قوریلیشی بیلن اورته آسیا سوو تنقیص‌لیگی بیلن روپه‌ره بولیشی دن آگاه‌لنتیرگن ایدی. ایران هم نیچه مرته سرپرست حکومت نی ۱۳۵۱-ییل بیتیمی گه عمل قیلمسلیککه عیبلب، هلمند ده کجکی سوو توغانی ایران گه سوو تنقیص‌لیگی گه سبب بولگنینی ایتگن.
