قویاش نورلرینی شهرلر گه ساچماقده ایکن کابل نارنچی پوشلریدن بیرقطاری ایسیقدن قاچیش و هاریگنلیگینی چیقریش اوچون، ساکن کوچهلردن بیریده قدیمی درخت سایهسیده دیوار گه سویهنیب اولتیرگنلر. یازگن دسترخوانده فقط بیر نیچه بولک نان و بیر نیچه پیاله چای کورینهدی. اولردن بیری باشقهلریگه قرهگنده یاشی کتّهراق کورینهدی گپیریشنی باشلهی من.
۶۰ یاشر رحمت، کابل شهری بلدیه خادملریدن بیری. تانگ آتیشی بیلن او همکارلری بیلن بیرگه کابلنینگ گوجوم کوچهلریده یوریدیلر؛ شهر افلاسلیگینی بیر آز بولسه هم کمهیتیریش اوچون؛ بیراق بو محنت اولر گه قدنینگ بوکیلیشی، قداقباسگن قوللر و یوقالگن آرزولردن باشقه کوپ نرسه بیرمهیدی.
بیزلرنینگ فیسبوک صحیفهمیزگه باش اورینگ!
رحمت، چنگ و کیر قارهیب قالگن قوللری بیلن پیشانهسیدهگی تیرنی اریتیب، چرچاق علامتینی سیزدیرگن بیر نفس چیقریب، شوندهی دیېدی: «هر کونی ایرتهلب ساعت سکیزدن توشدن کېین تورت گچه ایشلهی من. اوی اجارهده، برق و سوو اوچون پول کېرهک ۱۱ مینگ افغانی معاش آلهمن؛ زورغه یېتهدی. کیمدیر کسل بولسه، داری-درمان اوچون پول تاپیلمهیدی؛ بیراق حیات قیینچلیکلریگه اورگنیب قالگنمیز.»
رحمت، عایله باشقرووچیسی بولیب، هر کونی بیش کیشیلیک عایلهسینینگ درآمدینی تأمینلش یوکینی یالغیز اوزیگه آلیش گه مجبور.
هر کون اوتیشی بیلن اونینگ کوچی کمهیب بارماقده، بیراق امیدینی یوقاتمهیدی. او قلبیده فرزندلری اوچون یارقینراق کېلهجک تیلکداش؛ تیلکلری چیقیندیلردن، شهر کوچهلرینینگ چنگ-توزانیدن و قداق باسگن قوللریدن گللب چیقماقده. «توپراق و دودنی تحمل قیلهمن؛ چونکه بالهلریم درس اوقیب، انسان بولیشنی ایستهی من، مین کبی زحمت چیکمهسینلر.»
بیزلرنینگ «ایکس» ترماغی ده هم تعقیب قیلینگ!
رحمت، حیاتینینگ قالگن قسمینی بیر آز قولیراق اوتکزیش اوچون اوغیل فرزند توغیلیب، اولغهیگچ عایله مسئولیتی بیر قسمینی اوز زمهسیگه آلیشنی آرزو قیلهدی. «بوندن باشقه هېچ نرسه قیله آلمهی من. کیچه آوقتلنسم ایرتن ایسیمدن چیقهدی؛ کوپینچه نرسهلر ایسیمدن چیقهدی؛ ایشلش اوچون قوربیم قالگن یوق، بولمسه بو یاشده کیم ایشلهیدی.»
رحمت درآمدی آز بولسهده، بیراق عایله اعضالرینینگ احتیاجلرینی تأمینلشیدن خورسند. بو فقط رحمتنینگ حیاتی حکایهسی اېمس بلکه کورینمس حالده هر کونی شهرنینگ تازهلیگی اوچون محنت قیلهیاتگن مینگلب رحمتلرنینگ حیاتیدن بیر حکایه.
