مملکت شمال زونینینگ نفت مادهلری و گاز بیرلشمهسی مسئوللری، نفت مادهلری ساتیلهدیگن بازارنینگ حیرتان بندری شهرچهسیدن بلخ مرکزی مزارشریف شهریگه انتقال تاپگنیدن خبر بیرگنلر.
نفت مادهلری و گاز بیرلشمهسی باشلیغی مومن ضیاییگه کوره، بیرلشمهنینگ مرکزی ادارهسی و نفت مادهلری ساتیلهدیگن بازار، یولنینگ اوزاقلیگی سبب مزارشریف گه انتقال بیریلگن.
جناب ضیایی، مزارشریف ده نفت مادهلری بوییچه بیر مرکزنینگ قوریلیشیدن مقصد، سوداگرلر و حکومتی مسئوللر آرهسیده مناسب علاقه یرهتیلیشی، قیمت کنترول بولیشی و احتکار آلدی آلینیشی دیگن.
اونینگ ایتیشیچه، بو مرکز ۱۵ میلیون دالر عوضیگه ۱۲ قوتده قوریلهدی. «سوداگرلریمیزنینگ جلسه و قیمتنی کنترول قیلیش مقصد، ۸۰ کیلومتر یولنی یوریب، حیرتان گه باریشگه مجبور بولمسلیکلری اوچون ۲۳ ییلدن کیین، تیل و گاز ساتیلهدیگن بازارنی حیرتان دن مزارشریف شهریگه انتقال بیردیک.»
نفت مادهلری ساتیلهدیگن بازارنینگ مزارشریف شهریگه انتقال تاپگنی، سوداگرلر اینیقسه تیل و گاز وارد قیلیش توغریسیده فعالیت قیلهدیگنلر آرهسیده خورسندلیککه سبب بولگن. اولرنینگ ایتیشلریچه، بو مرکز آچیلیشی قیمتلر کنترول بولیشی و نفت مادهلری ساتیلیشی توغریسیده فایدهلی بولیشی ممکن.
