بهار ییتیب کیلیشی بیلن، گل و اوسیملیک بازاری ینگی بیر سیمانی اوزیگه آلیب و بو ساحهده فعالیت قیلهدیگن یاشلر، سونگی کونلر ساتیشلری کوپهیگنیدن خبر بیرهدیلر. مذکور یاشلر کوپراق قیزیقیش و ایش فرصتلری یوقلیگی سبب بو ایشگه یوز کیلتیریب و حاضر تورلیخیل گللرنی ییتیشتیریش بیلن، هم یشش محیط گوزهللیگینی آشیرماقده همده اوزلریگه درآمد منبعسینی یرهتگنلر.
لوگر یشاوچیسی بولمیش ۲۸ یاشر سیر ندیمنینگ ایتیشیچه، ایکی ییلدن بویان گل و اوسیملیک ییتیشتیریشگه یوز کیلتیریب و بو مدتده، قریب تورت مینگ شاخچه گلنی ییتیشتیره آلگن. «ایکی ییل آلدین گل ییتیشتیریشنی بالهدیم. باش اوییمیزده نیچهته گلدان بار ایدی و بیر یریم ییلدن کیین، قیشلاغیمیزده کیچیک بیر گلخانه آچدیم. حاضرگچه تورت مینگ شاخچه گلنی ییتیشتیرگنمین. بو تجربهنی یوتیوبدن ویدیو کوریش و گلخانهسی بولگن کیشیلردن مصلحت آلیش بیلن اورگندیم و بو ایشگه کوپ قیزیقهمن.»
شونینگدیک کابل یشاوچیسی بولمیش فیصلنینگ ایتیشیچه، اقتصادی قیینچیلیک سبب، گل و اوسیملیک ییتیشتیریشگه یوز کیلتیریب و بو یولدن، هم اوزی همده عایلهسینینگ دستلبکی خرهجتلرینی تامین قیله آلهدی. «یامان اقتصادی وضعیت، ایشسیزلیک و یشیللیککه قیزیقیش اوچون گل و اوسیملیک ییتیشتیریشگه بالهدیم. آیده بو یولده قریب آلتی-ییتی مینگ افغانی قولگه کیلتیریب و اونینگ بیلن عایله خرهجتینی تامین قیلهمن.»
کابل یشاوچیلریدن باشقه بیری ۲۷ یاشر ولیدنینگ ایتیشیچه، گل و اوسیم ییتیشتیریشگه قیزیقیش طفیلی، بو ایشگه یوز کیلتیرگن. «گل و اوسیملیک ییتیشتیریش، بویوکلریمیزدن بیزلرگه قالگن. ۱۴-۱۵ یاشرلیگیمدن بو ایشگه باشلهدیم. گل و اوسیملیککه کوپ قیزیقهر ایدی. باشده اوییمیزده بیر گلخانهمیز بار ایدی، اوشه ییرده گللرنی ییتیشتیرهر ایدیک؛ بیراق نیچه ییلدن کیین، کتهراق گلخانه توزهتدیک.»
یشش محیط ایش بیلرمانلریدن سیدمحمد سلیمانخیلنینگ ایتیشیچه، افغانستان ده گل و اوسیملیک ییتیشتیریش کوپینچه اهمیت گه ایگه بولیب و اوشبو فعالیتلرنینگ کوچهیتیریلیشی اوچون تکنالوژی و زمانهوی اسلوبلردن فایدهلنیش کیرهک. «افغانستان ده گل و اوسیملیک ییتیشتیریلیشی کوپ مهم دیر؛ هم تجارتی نقطهی نظریدن همده اجتماعی و فرهنگی یشش محیط نقطهی نظریدن. انه شوو سبب، اوسیملیکلر ییتیشتیریلیشیده اقدام بولیشی کیرهک. اوشبو فعالیتلر کوچهیشی اوچون تکنالوژی و زمانهوی اسلوبلردن فایدهلنیش کیرهک.»
اسلام امیرلیگی ایکینچیلیک، سووغاریش و چاروهچیلیک وزیرلیگی سوزلاوچیسی شیرمحمد حاتمینینگ ایتیشیچه، اوشبو وزیریلک گل و اوسیملیک بولیمیده فعالیت قیلهدیگن یاشلرنی قوللب-قوتلش اوچون بیر قطار فایدهلی دستورلری بار. «اسلام امیرلیگی ایکینچیلیک، سووغاریش و چاروهچیلیک وزیرلیگی گل و اوسیملیک ییتیشتیریش بولیمی فعالیت قیلهدیگن یاشلرنی قوللب-قوتلش اوچون ساووقخانهلر آچیب، کوچت ترقهتگن همده ایش و تعلیم امکانیتینی یرهتگن که یاشلر برقرار درآمدگه ایگه بولسهلر.»
گل و اوسیملیک ییتیشتیریش، نه فقط یشش محیط گوزهللیگی و یشیللیگیگه سبب بولهدی، بلکیم یاشلرگه امید و درآمد امکانیتیگه بیرهدی. اوشبو فعالیتلر شونی کورستهدی که، حتا اقتصادی قیینچیلیکلر آرهسیده هم یاشلرنینگ سعیوحرکتی و قیزیقیشی، حیات و یشش محیطنی امید، فعاللیک و یشیللیک بیلن باغله آلهدی؛ بو حرکت تیریکچیلیک، ایجادکارلیک و جمعیتدهگی صلاحیت رمزی دیر.
