اسلام شریعتی عیاللرنینگ اوز درآمدی و مال-ملکی گه مستقل ایگهلیک حقوقینی کفالتلهگن بولسه-ده، بعضی ایشلهیدیگن عیاللر عملده درآمدینی مصرف قیلیش حقوقیگه ایگه ایمسلیگینی ایتیشهدی. اولر تورموش اورتاغی یا کی عایله اعضالری تامانیدن درآمدلرینی تاپشیریش گه مجبورلنهدی؛ بو ایسه حقوقشناسلر و دین عالملرینینگ فکریگه کوره، انیق قانون و اسلام تعلیماتلریگه ضد حسابلنهدی.
دین عالملرینینگ ایتیشیچه، اسلامده عیال و ایرکک هر ایکیسینینگ مستقل مالکیت حقی بار و هیچ کیم عیالنینگ راضیلیکسیز اونینگ درآمدی یا کی مال-ملکینی آلیشگه حقلی ایمس. دین عالمی عبدالاحد عتید شوندهی دییدی: «شریعت نقطهی نظریدن الله تعالی شوندهی مرحمت قیلهدی، ایرکک و عیالنینگ هر ایکیلهسی هم مستقل مالکیت حقوقیگه ایگه؛ ایرککده قندهی حقوق بولسه، عیالده هم شوندهی حقوق بار. ایرککلر گه توشونتیریلیشی لازم کی، ایر آته-آنه یا کی اکه-اوکهلرنینگ عیالنی مجبوراً خرهجتلر گه مجبور قیلیش ظلم و گناه دیر.»
حقوقشناسلر گه کوره، هم قانون و هم اسلام فقه نقطهی نظریدن عیال اوز معاشی و مال-ملکی گه ایگهلیک قیلهدی و هیچ کیم اونی معاشینی تاپشیریش گه یا کی مجبوراً صرفلش گه مجبور قیله آلمهیدی. اولرنینگ قوشیمچه قیلیشیچه، اگر بو حقوق عایله اعضالری تامانیدن بوزیلسه، عیاللر قضایی نهادلریده اوز حقوقلرینی حمایه قیلیشلری ممکن
حقوقشناس مدثر ممتاز شوندهی دییدی: «ایش بیلن بند بولگن یا کی خذمت وظیفهسینی بجرهدیگن عیالنینگ معاشی و درآمدی افغانستان مدنی قانونی ۲۴ مادهسیگه موافق، بیواسطه اوزیگه تیگیشلی دیر. هر بیر محنت قیلوچی شخص اوز ملکی گه ایگهلیک قیلهدی؛ یعنی عیال هم اوز درآمدی، معاشی و مال-ملکی گه تولیق ایگهلیک قیلهدی.»
دوامی بار…
