کیچیک اتاقینینگ بیر چیکهسیگه بیرته تیکوو ماشینینی قوییش بیلن تیکووچیلیک بولیمیده ایشگه باشلهگن کابل یشاوچیسی بولمیش ۳۴ یاشر رویا محمدی، حاضر ایشی و ایشخانهسینی رواجلنتیریش بیلن باشقه ۳۰ عیالگه ایش زمینهسینی یرهتگن.
سعیوحرکت بیلن سرمایهسینی ۵ مینگدن بیر میلیون افغانیگه ییتیشتیرگن محمدینینگ ایتیشیچه، بو یولده کوپینچه قیینچیلیکلر بیلن روپهره بولگن بولسهده، بیراق ینه هم مذکور قیینچیلیکلر رواجلنیشینینگ آلدینی آلالمهگن. «باشده سرمایهم کوپ آز ایدی. آز سرمایه و امکانیت بیلن رواجلنیشیمنی توشینمهگن ایدیم. کوپینچه توسیقلر بیلن روپهره بولگن ایدیم، بیراق سعیوحرکت بیلن ایشخانهمنی کتهراق قیلیب و کوپینچه امکانیتنی یرهته آلدیم.»
رویا، مالی مستقللیککه ییتیشیش و سرمایهسینی کوپهیتیریش بیلن، تحصیلدن محروم قالگن، کمبغل و سرپرستسیز عیاللرگه هم ایش زمینهسینی یرهته آلگن. او، ملی و خلقارا نهادلر آرقهلی افغانستان ده تدبیرکار عیاللرنینگ قوللب-قوتلنیشینی سورهگن. «بو ایشخانهنی، مین و باشقه عیاللر گه درآمد زمینهسی یرهتیلیشی مقصد آچگن ایدیم. مذکور ایشخانهده قریب ۳۰ عیال ایشلهیدی. بو ییردهگی عیاللردن کوپ قطاری کمبغل همده درس و تحصیلدن قالگنلر دیر. شونینگدیک سرپرستسیز عیاللر هم بار. ملی و خلقارا نهادلردن تدبیرکار عیاللرگه یاردم بیریشلرینی ایستهیمن.»
رویا محمدی، کوپینچه عیال اوچون ایش زمینهسی یرهتیلیشی مقصد، اینگ یقینده ایشخانهسینینگ رواجلنتیرماقچین. «کوپینچه عیال گه ایش زمینهسی یرهتیلیشی مقصد، کیلهجک اوچون پلانیم شو که ایشخانهمنینگ ساحهسینی کتهراق قیلیب و ایشلاوچیلر سانینی کوپهیتیرسم.»
باشقه بیرتاماندن، مذکور ایشخانهده ایش بیلن شغللنگن عیاللر و قیزلردن قطارینینگ ایتیشلریچه، قیزلر ایشی و تحصیلیگه قوییلگن چیکلاولردن کیین، بو ایشخانه درآمد قولگه کیلتیریش و عایله نیازلرینی تامینلش اوچون مناسب بیر ییر دیر.
عایله سرپرستی بولمیش و بو ایشخانهدهگی ایشلاوچیلردن بیری سعدیه هاشمینینگ ایتیشیچه: «اقتصادی قیینچیلیگیمیز بار. ییتی آیدن بیری اوشبو ایشخانهده تیکووچیلیک بولیمیده ایشلهیمن. حاضر آتهم مسافر دیر و انه شوو سبب اوی خرهجتینی مین تاپیشیم کیرهک. آیده تورت یا-ده بیش مینگ افغانی درآمدیم بار که بو پول مینی و عایلهمنینگ قیینچیلیکلرینی بیراز حل قیلهدی.»
شونینگدیک مهرهدوزلیک بولیمیده ایشلهیدیگن روینا خیرینینگ ایتیشیچه، عایله اقتصادی نیازلرینی تامینلش اوچون تیکووچیلیک و مهرهدوزلیککه یوز کیلتیرگن. «عایلهده توقیز کیشیمیز. یالغیز مین و آتهم ایشلهیمیز. اقتصادیمیز اونچه یخشی ایمس و بو ییرگه کیلیب مهرهدوزلیک و تیکووچیلیک قیلیشگه مجبورمین. آیده ۵ یا-ده ۶ مینگ افغانی درآمدیم بار و بو درآمد اوزیم و عایلهمنینگ ۲۰ یا-ده ۳۰ فایز قیینچیلیکلرینی حل قیله آلهدی.»
کمبغللیک و ایشسیزلیک مملکتده عایلهلردن کوپ قطارینی تهدید قیلگنی بیرحالده، رویا محمدی هر کونی عزم-اراده بیلن قیینچیلیکلر آرهسیده کمبغل و تحصیلدن قالگن عیاللرگه امکانیتلرنی یرهتیش ایستهیدی.
