فاریاب ولایتی المار تومنی یشاوچیسی حمیرا ایوبی، میمنه شهریگه کیلگچ آز امکانیت بیلن «کیبابو» تیکوچیلیک ایشخانهسینی آچدی؛ بو ایشخانه حاضر نهفقط اوزی اوچون درآمد منبع، بلکی مستقل بولیشگه بیل باغلهگن قیزلر اوچون هم امید دیرهزهسیگه ایلنگن.
مملکت مقیاسیده عیاللرنینگ ایشلشی منع قیلینگنیدن کیین، حمیرا اوزی و عایله اعضالرینینگ احتیاجلرینی تأمینلب، هم اوزی و هم باشقهلر اوچون درآمد منبع یرهتیشگه قرار قیلدی.
اویلی و اوقیمیشلی المارلیک بو عیال، تورموش قورگنیدن کیین معلم تربیهلش و قابلهلیک بولیملرینی بیتتیرگن. اونگه کوره، بو ییرده ایشلب و عایله اعضالری احتیاجلریدن بیر بولیمینی تأمینلهیدی.
او شوندهی دییدی: «مین مستقل بولیشنی خواهلهی من. عایله درآمدینینگ کوپ قسمینی مین تأمینلهی من. عایلهده باشقهلر هم ایشلهیدی، بیراق آز.»
حمیرا، بو ییر گه آسانلیک بیلن ییتمهگن، بیراق برچه قیینچیلیکلر گه چیدهب و یولیگه دوام ایتتیرگنینی معلوم قیلهدی.
بو ایشخانهدن حاضرگه قدر ۴۲ نفر تیکوچیلیکنی اورگهنیب چیققن و ایندی ۲۰ نفر یاش قیز، تیکوچیلیکنی اورگهنیش بیلن شغللنماقده.
حمیرا گه کوره، شاگردلری آلتی آیلیک دورهدن کیین، مسلکی شکلده تیکوچیلیکنی اورگنیب و اوشبو مرکزدن فارغ بولهدیلر.
اونینگ ایتیشیچه: «شاگردلریمنی فارغ بیرهمن آلتی آی دن سونگ، هر آلتی آیده فارغ بولیشهدی حاضر ۲۰ نفر شاگردیم بار. تیکوچیلیکنی مسلکی شکلده اورگنهدیلر. بعضیلریگه امکانیت گه قرهب معاش هم بیرگن من.»
بو ایشخانه، فقط میمنه شهریگه چیکلنیب قالمهیدی.
«کیبابو» تیکوچیلیک ایشخانهسی فاریاب مرکزی میمنه شهری، قوشنی تومنلر، مملکت باشقه ولایتلری حتا چیت ایل گه یول تاپگن.
او شوندهی دییدی: «محصولاتیمیز کوپراق تخار، بغلان و کابل ولایتلریده ساتیلهدی. ایراندن هم بویورتمه آلهمیز، تیارلب و یوبارهمیز.»
برچهسی بیلن، اوسیش یولی آسان بولمهگن. بیرینچی ییلده خام اشیا، تیکو اسبابلری و تورلی ماشینلرنینگ یوقلیگی، حمیرانی جدی قیینچیلیکلر گه دوچ قیلگن.
بوگون ایسه، او تبسم بیلن ایشخانهسینینگ رواجلنگنی و بو مرکز اوتمیش گه نسبتن کینگهیگنینی بیلدیرهدی.
او کیلهجکده اوشبو ایشخانهنی ینهده کینگهیتیریشنی، شاگردلری اوچون معاش تعیین قیلیشنی ریجهلشتیرماقده. اونینگ ایتیشیچه، بو یولده نهادلر و همکار ادارهلرنینگ قوللب-قوتلشیگه محتاج.
سونگی ییللرده، تعلیم و ایشدن چیتده قالگن قیزلر، تیکوچیلیک، گلدوزلیک، کیک پیشیریش و باشقه ساحهلردهگی کسبلرنی اورگهنیشگه یوز کیلتیرگن؛ اولر بو ایش آرقهلی هم اوزلریگه ایش امکانیتینی یرهتیب و هم عایله نفقهسینی تأمینلشده حصه قوشیش گه سعی-حرکت قیلماقدهلر.
