ینگیلیکده قندوز شهریده عیاللرگه مخصوص قول صناعتی ایشخانهسی آچیلگن. اوشبو ایشخانهده عیاللردن قطاری ایشلش یانیده تیکووچیلیک و قول صناعتی بوییچه تورلی مهارتلرنی اورگنماقدهلر. مذکور ایشخانه مسئولی سوژه نظامینینگ ایتیشیچه، بو مرکزنی ۳۰۰ مینگدن آرتیق افغانی سرمایه بیلن آچیب و حاضر ایسه ۳۵ عیالگه ایشلش و ایش اورگهنیش امکانیتی یرهتیلگن.
بانو نظامینینگ کوپهیتیریشیچه: «بو ایشدن مقصد عیاللرنینگ رواجلنیشی ایدی. استعدادلی قیزلریمیز کوپ دیر که قول صناعتی بولیمیده ایش اورگتهمیز. شونینگدیک بیزلر بیلن ایشلهیدیگن عیاللرنینگ مالی حمایت بولیشی دیر. ملی و محلی سطحده ایشلشگه علاوه بیر کونی خلقارا سطحده ایشلب و ایشیمنینگ رواجلنتیریشنی ایستهیمن.»
شوندهی بیرحالده، نظامی اوچون فعالیت قیلیش و اوشبو ایشخانهنی کوچهیتیریش قولی بولمهگن. اونگه کوره، ییترلی امکانیت و جهازلر یوقلیگی، بو ایشخانه فعالیتی برابریدهگی اساسی قیینچیلیکلردن بیری بولیب و اوشبو قیینچیلیک سبب کوپینچه عیال گه ایشلش و ایش اورگهتیش امکانیتینی یرهته آلمهگن.
او یاردم بیرووچی نهادلردن جهاز تامینلنیشی و کوپراق همکارلیک بولیشینی سورهگن. «حاضرگچه ادارهلر آرقهلی همکارلیک بولیشی و جهازلر توغریده کوپراق یاردم بیریلیشیگه نیازیمیز بار.»
مذکور ایشخانهده فعالیت قیلهدیگن عیاللردن قطاری اوچون بو ییر یالغیز ایش جایی ایمس؛ بلکیم ایشسیزلیکدن قاچیش، بیر ایشنی اورگهنیش و درآمد قولگه کیلتیریش بوییچه بیر فرصت دیر. اوشبو ایشخانهدهگی ایشلاوچیلردن بیری اسمانینگ ایتیشیچه، ایش اورگهنیش اوچون بو ییرگه کیلهدیگن قیزلر، تیکووچیلیک، گلدوزلیک، خامکدوزلیک، مهرهدوزلیک و باشقه قول صناعتینی اورگنهدیلر.
اونینگ کوپهیتیریشیچه، بوندن آلدین ایشسیزلیک قیینچیلیگی بیلن روپهره ایکن، بیراق حاضر ایسه اوشبو ایشخانهده فعالیت قیلیش بیلن آیدن ییتی مینگ افغانیگچه درآمد قولگه کیلتیرهدی. «مینگه ایش زمینهسی یرهتیلگنی اوچون جودهیم خورسندمین، چونکه بو ایش آرقهلی اوی خرهجتلری تامینلنیشیده حصه قوشیب و عایله اقتصادیگه یاردم بیره آلهمن. کیلهجکده کوپینچه درآمدگه ایگه بولیش اوچون اوشبو ایش امکانیتینینگ دوام قیلیشی گه امیدوارمین.»
مذکور ایشخانه گه تیکووچیلیک و قول صناعتینی اورگهنیش اوچون بارهدیگن عیاللردن قطاری، بیر مسلکنی اورگهنیش بیلن کیلهجکده اوزلریگه درآمد منبعسینی یرهته آلیشگه امیدوارلر.
بو ایشخانهده تیکووچیلیک و قول صناعتی بولیملریده ایش اورگنهدیگن آرزو و رقیه گه کوره، ایش و تعلیم امکانیتلری یوقلیگی سبب تورلیخیل قیینچیلیکلر بیلن روپهره ایکنلر. بو توغریده آرزونینگ ایتیشیچه: «تیکووچیلیکنی اورگنهمن و بو ییرگه کیلگنیمدن بیری کوپینچه نرسه جملهدن اولچش، قیرقیش، تیکیش و تیکووچیلیک ماشین بیلن ایشلشنی اورگندیم. باشده مینگه قیین ایدی، بیراق تمرین و استادیمیزنینگ رهنمالیگی بیلم ایش آسان بولیب و تیکووچیلیکنی یخشی بیر شکلده اورگنه آلدیم.»
سونگی ییللرده عیاللرگه مخصوص تیکووچیلیک و قول صناعتی ایشخانهلری آچیلیشی قندوز و افغانستاننینگ اَیریم ولایتلریده کوپهیب و عیاللردن قطاری بو ایشخانهلرده مسلک و تولیدی فعالیتلرنی اورگهنیش بیلن شغللنگن.
