افغانستان بوییچه انسان حق‌لری ایرکین کمیسیونی مسوول‌لری نینگ ایتیشلریچه، اوتگن هفته نینگ ۶ کونی‌ده مملکت ۴ ولایتیده ۳۹ تینچ اهالی اولدیریلگن.
انسان حق‌لری ایرکین کمیسیونی نینگ میدیالر بولیمی باشلیغی ذبیح‌الله فرهنگ نینگ ایتیشیچه، اوشبو رقم تینچ اهالی مقناطیسی و جاده چیککه‌سیده جایلشتیریلگن ماین‌لرنینگ پارتلشی و قوراللی هجوم‌لر نتیجه‌سیده فراه، پروان، ننگرهار و قندهار ولایت‌لریده هلاک ایتیلگن‌لر.
جناب فرهنگ گه کوره، ۴ عیال و ۸ باله هلاک ایتیلگن‌لر جمله‌سیدن دیر. اونینگ ایتیشیچه، مذکور واقعه‌لرده ۴ عیال و ۱۷ باله شامل ۴۰ تینچ اهالی یره‌لنگن دیر.
عین‌حالده، انسان حق‌لری ایرکین کمیسیونی نینگ بیر اعلامیه آرقه‌لی ایتیشیچه، مذکور واقعه عامل‌لری طالبان گروهی و ناتانیش کیشی‌لر دیر. اوشبو کمیسیون آتیش‌کیسین برقرار ایتیلیشی و عادلانه تینچلیککه قول تاپیش اوچون جنجلی موضوع‌لر سوزلشوو آرقه‌لی حل ایتیلیشی‌نی ایسته‌گن.
انسان حق‌لری ایرکین کمیسیونی مملکت حاضرگی وضعیتی‌نی خواطرلنترووچی عنوان قیلگن.
ایتیلیشیچه، رمضان آیی ایتیب کیلیشی بیلن مملکت جمهور رئیسی محمداشرف غنی، طالبان گروهی دن اهالی نینگ حق ایستکلریگه جواب قیتیریش بیلن آتیش‌کیسین اعلان قیلیشی‌نی سوره‌گن، بیراق طالبان گروهی حاضرگه‌قدر بوتوغریده جواب قیتیرمه‌گن.