۳۵۰ کیشی کابل ده خصوصی بیر موسسه آرقهلی اوتکزیلگن آلتی آیلیک کسب-هنر بوییچه تعلیم کورسلرینی بیتیرگن. اوشبو ییگیتلرنینگ ایتیشلریچه، حاضر تورلی بولیملر اینیقسه زمانهوی کسبلرده ایشلشگه تیارلر.
مذکور کسب-هنر اورگهتیش بولیمینی بیتیرگن ییگیتلر، کوپینچه ایش فرصتلری یرهتیلیشی و مملکت رواجلنیشیده تکنولوژی اهمیتیگه تاکید قیلگنلر. مذکور تعلیم کورسلرده موبایل و کمپیوتر ترمیملش بولیملرینی اورگنگن نصیبالله و حبیبالرحماننینگ ایتیشلریچه، حاضر تکنولوژی بیلن تیگیشلی ایشلرده ییترلی مهارتلرنی اورگهنیب و فرصت یرهتیلگنی صورتده، باشقه ییگیتلرگه هم تدبیرکارلیک امکانیتلرینی یرهتیشلری ممکن.
نصیباللهگه کوره: «حاضر تکنولوژی بولمسدن حیات کیچیریلمهیدی و برچه نرسه کمپیوتر و تکنولوژی همده موبایل و اینترنت گه باغلیق دیر و بو توغریده بیلگیلی بولیش کیرهک. ادارهلرده حسابدارلیک و بانکدارلیک بولیملری اوچون برچه کیشی کمپیوتر و تکنولوژیدن ایش آلهدی. ییگیتلرگه ایش فرصتلری یرهتیلیشینی ایستهیمیز که ایشسیزلیک اولرنینگ اذیت بولیشی و مملکتدن مهاجرت قیلیشیگه سبب بولهدی.»
شونینگدیک حبیبالرحماننینگ ایتیشیچه: «حاضرگی شرایطده تکنولوژی جودهیم رواجلنگن و بو رقم دوام قیلگنی و موسسهلر بولگنیده، بیز ییگیتلر درس اوقیب و تکنولوژیدن فایدهلنیشیمیز ممکن. بیرینچی کونده هیچ نرسهنی بیلمس ایدیم و حاضر کوپ نرسهنی اورگنگنمین.»
شوندهی بیرحالده، خصوصی موسسه مسئوللرینینگ ایتیشلریچه، هر ییلی ایش بازاریگه ییگیتلرنینگ حاضرلنیشی اوچون تورلی بولیملرده ۷۰۰ دن آرتیق اوقووچیگه کسب-هنرنی اورگتهدیلر.
مذکور خصوصی موسسهدهگی اوقیتووچیلردن مجتبا سیرتنینگ ایتیشیچه: «حاضر درسی صنفلریمیزدن قریب ۳۵۰ کیشی فارغ بولدی؛ آلتی آیلیک تعلیمی کورسلریمیز برقی اوسکونهلرنی ترمیملش، موتر و یخچالنی ترمیم قیلیش، کمپیوتر هاردویر و سافتویری و باشقه بولیملر توغریسیده ایدی.»
شونینگدیک ایش و اجتماعی ایشلر وزیرلیگی مسئوللرینینگ ایتیشلریچه، اوشبو وزیرلیک افغانستان بویلب کسب-هنر تعلیمی کورسلرینی کوچهیتیریش بیلن، ییگیتلرنی ایش بازاریگه تیارلنیشی اوچون اولرگه تکنولوژی بولیمیده تعلیم بیریلهدی. ایش و اجتماعی وزیرلیکنینگ ایش بوییچه معینی محمدزاهد احمدزینینگ ایتیشیچه: «ایش و اجتماعی ایشلر وزیرلیگی کسب-هنر بولیمیده ایش اورگهنیش زمینهسینی یرهتگن که برچه کیشی کسب-هنرنی اورگهنیب و بو یول آرقهلی اوزی و عایلهسیگه حلال درآمد تامین قیلسه.»
ایتیش کیرهک که، ۱۵-جدی دوشنبه کونی کابل ده اوشبو ییگیتلرنینگ فارغ بولیشی اوچون بیر مراسم اوتکزیلدی. مذکور ییگیتلر تیکووچیلیک، موتر انجینی، موتر وایرینگی، نلدوانلیک، اوتاوچیریش سیستمی، ایرکاندیشن ترمیملش، بنالرگه لینتارتیش، بنالرگه برق تارتیش، کمپیوتر مهارتلری، وبدیزاین و موبایل ترمیملش بولیملریده آلتی آی تعلیم کورگنلر.
