نایجریا خوفسیزلیک رسمیلرینینگ اعلام قیلیشیچه، بو مملکت نایجر ایالتیگه قوراللی کیشیلرنینگ هجومی نتیجهسیده، کمیده ۳۰ کیشی اولیب و باشقه بیر قطار کیشی اوغیرلنگن.
رویترز، بوگون ایرتهلب (۱۵-جدی/ ۵-جنوری، دوشنبه)، نایجر ایالتینینگ پولیس سوزلاوچیسی واسیو ابیودوندن نقل قیلیب گزارش بیریشیچه، هجومچیلر محلی بیر بازارگه هجوم قیلیش بیلن دکانلرنی آلاو بیریب، آزیق-آوقتنی تالان-تاراج قیلیب و تینچاهالینی اوققه توتگن.
اونینگ کوپهیتیریشیچه: «بو هجوم نتیجهسیده ۳۰ دن آرتیق کیشی اولیب و شونینگدیک بیر قطار کیشی ایسه اوغیرلنگن. اوغیرلنگن کیشیلرنینگ قوتقریش اوچون سعیوحرکتلرنینگ دوامی بار.»
شونینگدیک نایجریا جمهور باشلیغی بولا تینوبو، خوفسیزلیک رسمیلریگه اوشبو هجوم عامللری تانیلیب و قولگه آلینیش بویروغینی بیرگن. او بیر بیانیه ارقهلی ایتیشیچه: «اوغیرلنگن کیشیلردن برچهسینینگ تیزلیککه قوتقریلیشی و جبرلنهدیگن جمعیتلر اطرافی اینیقسه اورمانلر یقینیده خوفسیزلیک عملیاتنینگ کوچهیتیریلیش بویروغینی بیرگنمین.»
بو هجوم، نایجریا مرکزی نایجر ایالتیده قوراللی کیشیلر آرقهلی کاتولیک مکتبلریدن بیریده ۳۰۰ دن آرتیق باله و ایشلاوچینینگ اوغیرلنگنیدن نیچه هفته اوتگچ، یوز بیرگن.
ایتیش کیرهک که، سونگی ییللرده نایجریا مرکزی و شمالغربیده قوراللی هجوملر و اوغیرلاوچیلیکلر کوپهیگن. حربی عملیات دوام قیلیشی بیلن، خوفسیزلیک کوچلری حاضرگچه بو زورهلیکلرنینگ اورتهدن کیتگزیشده جدی قیینچیلیکلر بیلن روپهره دیر.
