بوگون “سهشنبه” کابلده شاهتوت سوو توغانی نینگ قوریلیش شرطنامهسی افغانستان و هند آرهسیده امضا ایتیلدی. اوشبو شرطنامه افغانستان جمهور رییسی محمداشرف غنی و هند باش وزیری نریندرا مودی حضوری بیلن افغانستان تشقی ایشلر وزیری محمدحنیف اتمر و هند تشقی ایشلر وزیری سابرامانیام آرهسیده آنلاین شکلده امضالنگن.
شاهتوت سوو توغانی نینگ قوریلیش ایشی ۲۰۰ میلیون دالر هزینه کوتارهدی و بو هزینه نینگ بیر بولیمی هند اولکهسی تامانیدن توللنهدی. اوشبو بند نینگ قوریلیشی بیلن کابلده ۲ میلیون کیشی ایچیملی سووگه قول تاپیب و ۴ مینگ هکتار ییرگه سوو چیقهدی. شاهتوت بندی نینگ قوریلیش ایشی کیلهسی ۶ ییلده تکمیل بولیشی ممکن.
هند باش وزیری نریندرا مودی، اوشبو شرطنامه امضا ایتیلیشی مراسمیده، افغانستانده دایمی آتیشکیسین ایستهگن. مودی نینگ افغانستانده زوروانلیکلر کوپهیشیدن خواطر بیلدیریب ایتیشیچه، افغانستان و هند منطقهده تینچلیک تامینلنیشی نی ایستهیدی.
عینحالده، افغانستان جمهور رییسی محمداشرف غنی، هندوستان نینگ یاردملریدن منتدارلیک بیلدیریب و شاهتوت بندینی مملکت یشاوچیلریگه کته هدیه عنوان قیلگن.
شاهتوت بندی کابل ولایتی نینگ چهارآسیاب تومنینی للندر منطقهسیده موقعیت تاپگن. اوشبو بند ۱۵۰ میلیون متر مکعب سوونی ذخیره قیله آلهدی و شونینگدیک، ۲ دن باشلب ۵ میگاوات برق تولید قیلیش ظرفیتیگه ایگه دیر.