بغلان و ارزگان ولایتلریدن امنیتی منبعلر و محلی مسووللر، امنیتی کوچلردن ۱۹ تهسی هلاک و باشقه ۶ تهسی نینگ یرهلنگنیدن خبر بیرگنلر.
بغلان ولایتیدن کیملیگی سیرقالیشنی ایستهگن امنیتی بیر منبع نینگ سلاموطندارگه ایتیشیچه، طالبان جنگریلری اوتگن کیچه پلخمری شهری نینگ «وزیرآباد و نیازالله» منطقهسیده امنیتی کوچلرنینگ ایکی پوستهسی اوستیگه هجوم قیلگن.
منبعگه کوره، مذکور هجوم عاقبتیده، ملی پولیس، محلی پولیس و مردمی کوچلر شامل امنیتی کوچلردن ۱۳ تهسی هلاک و باشقه ۴ تهسی یرهلنگن.
منبع نینگ کوپهیتیریشیچه، اوشبو هجوم طالبان گروهی نینگ لیزری قطعهسی تامانیدن اویوشتیریلگن و امنیتی کوچلر تانکلریدن بیرقطاری تخریب بولگن.
بغلان پولیس قومندانلیگی سوزلاوچیسی جاوید بشارت، بو واقعهنی تصدیقلگن، لیکن تلفات خصوصیده معلومات بیرمهگن.
طالبان گروهی اوشبو هجوم مسوولیتینی بوینیگه آلگن.
شونینگدیک، باشقه بیر منبع نینگ ایتیشیچه، بوگون “چهارشنه” ایرتهدن چاغیده، بغلان مرکزی پلخمری شهریده یوز بیرگن بیر پارتلشده مردمی کوچلر قومندانلریدن بیری هلاک ایتیلگن.
عینحالده، ارزگان حاکمی سوزلاوچیسی احمدشاه ساحل نینگ ایتیشیچه، اوشبو ولایت نینگ دهراوود تومنیده طالبان تامانیدن اویوشتیریلگن هجوم نتیجهسیده، امنیتی کوچلردن ۵ تهسی هلاک و باشقه ۲ تهسی یرهلنگن.
ارزگان حاکمی سوزلاوچیسی نینگ کوپهیتیریشیچه، امنیتی کوچلر و طالبان آرهسیده یوز بیرگن آتیشمه عاقبتیده، طالبان جنگریلریدن ۱۷ تهسی هلاک و باشقه ۶ تهسی یرهلنگن.
بیراق، امنیتی بیر منبع نینگ کیملیگی سیرقالیشنی ایستهب سلاموطندارگه ایتیشیچه، مذکور هجومده دولتی کوچلردن کمیده ۱۰ تهسی هلاک ایتیلگن.
طالبان گروهی حاضرگهقدر بوتوغریده فکر بیلدیرمهگن.