حامد تهذیب، معاون سخنگوی وزارت خارجه به سلام‌وطندار می‌گوید که نشست شانگهای فردا با حضور وزیران خارجۀ کشورهای عضو سازمان همکاریهای شانگهای در شهر دوشنبه، پایتخت تاجیکستان برگزار می‌شود.
به گفتۀ حامد تهذیب، محمدحنیف اتمر، وزیر خارجه برای شرکت در این نشست به تاجیکستان رفته است و در چهارمین نشست این سازمان روی وضعیت جاری افغانستان صحبت می‌کند.
وزارت خارجه می‌گوید که قرار است در این نشست روی عضویت افغانستان در سازمان شانگهای، همکاریهای این سازمان با افغانستان در امر مبارزۀ مشترک علیه تروریسم و افراط‌گرایی، وضعیت امنیتی افغانستان و تأثیرات آن بر ثبات و رفاه منطقه، گفت‌وگو شود.
سلام‌وطندار فارسی را در فیسبوک دنبال کنید
در همین حال، شماری از آگاهان سیاسی به این باور اند در صورتی که افغانستان موفق به کسب عضویت سازمان شانگهای شود، به نفع کشور است.
محب‌الله شریف، آگاه سیاسی و اقتصادی می‌گوید که عضویت افغانستان در سازمان شانگهای سبب وصل کشور به اقتصاد منطقه‌یی می‌شود و در کنار آن، از نگاه امنیتی و سیاسی افغانستان را به انسجام می‌رساند.
لازم به یادآوری‌ست که کشورهای روسیه، چین، اوزبیکستان، تاجیکستان، پاکستان، قرقیزستان و هندوستان، عضو سازمان شانگهای‌اند و وزیران خارجۀ افغانستان، ایران و برخی کشورهای دیگر به‌عنوان ناظر در این نشست شرکت می‌کنند.
