کاپیسا ده چاروهچی عیاللردن قطاری چاروهلر آرهسیده کسللیکلری ترقهلگنیدن خواطر بیلدیریب و ایتیشلریچه، چاروهچیلیک عایلهلر درآمدی اصلی منبعسی دیر. مذکور عیاللرنینگ کوپهیتیریشلریچه، سوت ایشلب چیقریلیشی کمهیشی، چاروهلر تلف بولیشی، دوالنیشینینگ کوپینچه خرهجتلری و دولتی درمانی مرکزلر یوقلیگی، جدی قیینچیلیکلردن بولیب و عایلهلردن کوپ قطارینینگ حیاتیگه تاثیر قویگن.
کاپیسا ولایتی حصهی اول کوهستان تومنیدهگی چاروهچی عیاللردن بیری گلدانه (مستعار آت)، نینگ ایتیشیچه، اصلی درآمدی چاروهچیلیکدن تامینلنهدی؛ لیکن چاوره کسللیکلری، چاروهلر تلف بولیشی و درآمدی کمهیشیگه سبب بولگن. اونینگ کوپهیتیریشیچه: «ایکی ییل آلدین هم و اوتگن ییل اوشه پیتده هم بوزاقیم تلف بولدی. شفاکارلر کسللیک کیلگن و اولرنی چلینتیرگن دیدی. بیز باشده بلکیم ساووق اورگن بولسه دیدیک؛ لیکن شفاکارلر کیلتیرگنیمیزده بو بیر تورلی کسللیک دیدی. دارو و پیچکاری بیردی، بیراق قایده قیلمهیدی و تلف بولدی. اوت ییمس ایدی، ییقیلدی و اولدی. اوتگن ییللرده کوپ سوت بیرهر ایدی، مسکه، پنیر، قتیق و چکه توزهتیب و ساته آلهر ایدیم. حاضر ایسه کسل بولیب، سوت بیرمهدی و هیچ نرسه هم توزته آلمهدیم. انه شوو سبب درآمدیمیز کمهیدی.»
بیزلرنینگ «ایکس» ترماغی ده هم تعقیب قیلینگ!
شونینگدیک کاپیسا ولایتی نجراب تومنی یشاوچیلریدن شیما، چاروهلرینینگ ساغلیق وضعیتیدن خواطر بیلدیریب و ایتیشیچه، چاورهلرینی سقلش اوچون کوپینچه سعیوحرکتی بیلن، وقتیده دوالنمه آلگنی سبب چاروهلری تلف بولگن. اونینگ سلاموطندار گه ایتیشیچه: «سیگیرلریمیزنی کوپ زحمت بیلن باققن ایدیک. ایسیق هواده باریب اوت تیرهمیز. قریب تورت ته سیگیریمیز بار ایدی که کسللیککه چلیندی. سیگیرلردن بیرتهسیده بچهسی بار ایدی که انه شوو کسللیک سبب، چاروهگینه قرنیده اولدی. اویده تورموش اورتاغیم، آتهم و ایناغهلریم ایشسیز دیر. بیزلر سیگیر سوتیدن پنیر توزهتیب ساتهیمیز؛ لیکن حاضر ایسه بو کسللیک سیگیرلر سوتینی هم کمهیتیرگن.»
باشقه بیرتاماندن، کاپیسا ولایتینینگ قیشلاقلریدن بیریده حیات کیچیرهدیگن ذاکره، چاروهلر اوچون ساغلیق مرکز یوقلیگیدن شکایت قیلیب و ایتیشیچه، دوالنیش خرهجتلری هم کوپ دیر. «سیگیر کسل بولگن ایدی، اوت ییمس ایدی، ایاغی آغیریهر ایدی و ایاغینی تارتیب یوریهر ایدی. اویگه اسپری بار ایدی اوندن فایدهلندیم و کیین شفاکار گه تماس آلدیم. اوزاق یولدن کیلدی و پیچکاری قیلیب، اسپری سیپدی که سیگیر ساغهیدی. بیزلر بار ساحهده کلینیک یوق. منطقهمیزده حیوانی کلینیک قوریلیشینی ایستهیمن که سیگیرلر دوالنیشیگه صرفلنهدیگن پول نی تاپیش بیزلرگه قیین دیر.»
شوندهی بیرحالده، وترینرلر چاروهچیلر آرقهلی ساغلیقنی سقلش اصوللری نظرگه آلینیشی و درست شکلده مراقبت قیلینیشنینگ رعایت بولینیشینی توصیه قیلگن. وترینرلردن بیری سیدالرحمان کوهستانینینگ ایتیشیچه، کسللیکلردن کوپینچهسی چیگره چاروهلردن اوتیب و باشقه چاروهلر اورتهسیده ترقهلیشگه سبب بولهدی.
کوهستانینینگ کوپهیتیریشیچه: «کسللیکلردن کوپینچهسی چیگره حیوانلردن اوتیب و باشقه چاروهلر اورتهسیده ترقهلهدی. چاروهچیلرگه حیوانلرینینگ مناسب اوتلاقلرگه آلیب باریشلری همده ایچکی و تشقی پارازیتلر آلدی آلینیشینی توصیه قیلهمن. بازاردن ساتیب آلینهدیگن چاروهنینگ حداقل ایکی هفته بولمسه، اوچ کونگچه باشقه حیوانلردن اوزاقراقده سقلنیشی کیرهک. شونینگدیک چاروهچیلر کسل حیوانلردن اوزاق بولسینلر، اینیقسه کانگو کسللیگی ترقهلیشیگه توجه قیلیش کیرهک، چونکه کنه آرقهلی انسان گه یوقهدی.»
بیزلرنینگ فیسبوک صحیفهمیزگه باش اورینگ!
باشقه بیرتاماندن، کاپیسا ولایتی ایکینچیلیک ریاستینینگ حیوانلر ساغلیگی و چاروهچیلیک خذمتلر آمری عبدالخلیل رحمانی، چاروهلر آرهسیده بیر قطار کسللیکلر ترقهلگنینی تصدیقلب، بو ولایتدهگی حیوانلر اوچون اونلب ساغلیق خذمتلر یرهتیلیشیدن خبر بیرگن. «کاپیسا ایکینچیلیک، سووغاریش و چاروهچیلیک ریاستی، بیرلشگن ملتلر تشکیلاتینینگ آزیق-آوقت و ایکینچیلیک ادارهسی و ایکینچیلیک وزیرلیگی بیلن هماهنگلیکده، کسللیکلر کنترول بولیشی اوچون بیر قطار برنامهلرنی یولگه تشلهگن. بو برنامه اوشبو ولایتنینگ تورلی تومنلریده، آگاهیلیک بیریش، کسللیککه قرشی واکسیناسیون، ۵۰ ته حیوانی کلینیک و ۳۰ ته حیوانی داروخانهنینگ قوریلیشیدن عبارت دیر.»
ایکینچیلیک و چاروهچیلیک، کاپیسا ولایتی اهالیسی اوچون بویوک اصلی درآمد منبعسینی تشکیل بیرگنی بیرحالده، چاروه کسللیکلری دوام قیلگنی، محلی اقتصادگه جدی زیان ییتیشتیره آلهدی.
