افغانستاننینگ بیر قطار منطقهلریده، عیاللر اقتصادی ترقیات و جمعیتنینگ رواجلنیشیده اونملی رول اوینهیدی. پنجشیر ده عیاللر لبنیات پروسس قیلیش توغریسیده عایلهلریدهگی ایرککلر بیلن همکارلیک قیلیب، عایلهلر اقتصادیده کوپینچه حصه قوشگنلر. اولر تورلیخیل محصوللرنی ایشلب چیقریش بیلن نه فقط عایلهلرینینگ کوندهلیک نیازلرینی تامینلش گه یاردم بیرهدیلر، بلکیم درآمد قولگه کیلتیریش بیلن یشش شرایطیده ایجابی اوزگریشلرنی یرهتگنلر.
پنجشیرنینگ «ملیمه» قیشلاغی یشاوچیسی بولمیش عاقله، هر ایرتنگ سیگیرلر بوینیدهگی قونقیراق سیسلری و ایچکیلرنینگ تازه سوتی هیدی بیلن، باشقه بیر ایشلی کوننی باشلهیدی. قدیمی بیر اویینینگ چیکهسیده، امید و تجربه بیلن تولگن قوللری بیلن تازه پنیر و قتیق تیارلماقده. او نه فقط بیر آنه، بلکیم عایلهسینینگ اقتصادی تینچی بولیب، سیسسیز بیراق تاثیرلی سعیوحرکتلری بیلن، محلی اقتصادنی حرکت گه کیلتیرگن.
اونینگ ایتیشیچه: «اویده ایکی ته ساغین ایچکی بار. انه شوو سوت آرقهلی، قتیق، چکه، قیماق، پنیر، قروت و باشقه نرسهلرنی توزتهمن. بازار گه یوبارهمن، اوزیم و عایلهمنینگ صرف-خرهجتینی چیقرهدی. باشقه عیاللردن اویگه اولتیرمهی، تیکووچیلیک و خامکدوزلیک؛ تاووقچیلیک و سیگیردارلیک آرقهلی اوزلری و عایله نیازلرینینگ تامین قیلیشلرینی ایستهیمن.»
بیزلرنینگ «ایکس» ترماغی ده هم تعقیب قیلینگ!
عاقله کبی باشقه عایلهلر هم سوت بیلن یالغیز قیماق و ماست ایشلب چیقرمهی، بلکیم بالهلریگه یخشی کیلهجک اوچون سعیوحرکت قیلهدیلر. بویوک کارخانهلر یوق بولسهده، مذکور عیاللر اویلریده کیچیک کارخانهلرنی شکللنتیرگنلر.
بیش باله آنهسی بولمیش زینب، سوت محصوللرینی تیارلش آرقهلی تورموش اورتاغی بیلن عایله درآمدیگه سیزیلرلی درجهده یاردم بیرگن. اونینگ ایتیشیچه: «ایکینچیلیک بیر سیگیر ساتیب آلدیک که قیمتی یوقاری ایدی؛ بیراق بو سیگیردن سوت، پنیر، ماست و قیماق قولگه کیلتیره آلهمیز. بو محصوللرنی بالهلریم اوچون تیارلهیمن و بازار گه آلیب باریب و ساتهدیلر. تورموش اورتاغیم هم زمرد کانیده ایشلهیدی. او عایله نیازلریدن بیر قطارینی تامین قیلهدی و من هم لبنیاتدن قولگه کیلتیرهدیگنیم درآمد بیلن، بالهلریم گه کییم و باشقه نرسهلرنی تیارلهیمن. امید قیلهمن که بیر فارم یا-ده ینه بیرته سیگیر ساتیب آلالسم که تولیدلریمیز کوپهیسه.»
باشقه بیر تاماندن، اقتصادی مسئلهلر بیلرمانی و بیلیم یورت استادی عبدالولی هژیرنینگ ایشانچیگه کوره، عیاللر اقتصادنینگ اساسی حرکتلنتیرووچی کوچلری بولیب و مصرف قیلووچی وضعیتیدن تولید قیلووچی بیر تیمگه اوزگریشلری کیرهک.
هژیرنینگ ایتیشیچه: «قنچه یخشی بولهدی که جمعیتدن یریمینی تشکیل بیرگن عیاللر، یالغیز مصرف قیلووچی اورنیده تولید قیلووچی بولسهلر. دولت تورلی یوللردن اوی کسب-کارلری رواجلنیشیگه یاردم بیره آلهدی. مالیهوی تشویق قیلووچیلر بو کسب-کارلر رواجلنیشیده یخشی بیر امکانیت حسابلنهدی. شونینگدیک اقتصاد و جمعیت گه یاردم بیریشلری اوچون عیاللرگه امکانیت و اوسکونهلرنینگ یرهتییلشی کیرهک.»
بیزلرنینگ فیسبوک صحیفهمیزگه باش اورینگ!
شوندهی بیرحالده، پنجشیر صناعت و سودا باشلیغی امینالحق ماثورینینگ ایتیشیچه، تدبیرکار ۸۰۰ عیالنینگ بیلگیلرینی یاردم قولگه کیلتیریشلری مقصد یاردم بیرووچی نهادلر گه شریک قیلگنلر.
اونینگ کوپهیتیریشیچه: «مرکز شامل ییتی تومندن قریب ۸۰۰ عیالنینگ بیلگیلرینی ثبت قیلگنمیز. همکار موسسهلر بیلن صحبت قیلگنمیز و عنابه تومنیده قریب ۵۰ عایله گه اوی و زراعتی تاووقچیلیک فارینی ترقهتگنمیز که اولر هم یومورتقه و همده گوشتیدن فایدهلنسینلر. اولرگه دانه ترقهتیلیب و شونینگدیک تعلیم هم بیریلهدی.»
رواجلنیشده عیاللر رولی، نه فقط بیر شعار، بلکیم عملده هم کوز گه کوریلهدی. بو ییرده لبنیات یالغیز بیر محصول ایمس؛ بلکیم اراده، توختهش و عیاللرنینگ وقفهسیز شکلده سعیوحرکتی دیر که اولر اوزگریشنی اوزلریدن باشلشگه قرار آلگنلر.
