پرواننینگ ساووق قیشلری نهفقط ایکینچیلیک فعالیتلرینی توختهتمهگن، بلکیم قیشلاقدهگی عیاللردن قطاری اوچون کوپراق سعیوحرکت قیلیش و عایله اقتصادی جریانینی سقلب قالیش امکانیتیگه اَیلنگن. اویده قوریلگن ایسیقخانهلرده سبزهوات ایشلب چیقریش، سوت ساغیش، قتیق، پنیر، قیماق و قروت تیارلش، مذکور عیاللرنینگ عملگه آشیرهدیگن اینگ مهم فعالیتلریدن حسابلنهدی.
اوشبو عیاللردن بیری فاطمه، اوییدهگی باغچهسیده عایله و محلی بازار اوچون نیاز بولگن سبزهواتلرنی تولید قیلهدی. اونینگ ایتیشیچه: «اوییمیزده بیر باغچه بار؛ اونگه پمیدار، کچالو، قلمپیر، گشنیز و نعنا ایکهمن، بازار گه ساتهمن و پولی بیلن سکیز کیشیلیک عایله نیازلرینی حل قیلهمن. سینگیللریمدن هیچ کیمنی کوتیب تورمهی، سعیوحرکت قیلیب و عایلهلرینینگ قولینی توتیشلرینی ایستهیمن. برچه موسسهلردن هم مالی همکارلیک قیلیشلرینی سورهیمن.»
اوییده ایسیقخانهسی بولگن عیاللردن پرنیان، دولتی و خلقارا نهادلرنینگ قوللب-قوتلشی دوام قیلیشیگه تاکیدلب و ایتیشیچه: «پمیدار، بادرنگ، قلمپیر و تازه سبزهوات کبی نرسهلرنی تولید قیلهمن. بو ایسیقخانه اوییمیزده قوریلگن و اوزیم سووغارهمن. یازده محصولی کوپراق دیر؛ بیراق قیشده هم تولیدیمیز بار. قیینچیلیگیمیز ایسه اصلاح بولگن اوروغلر کملیگی، ستندرد پلاستیک یوقلیگی و ایسیتووچی نرسهلر قیمتی یوقاریلیگی دیر. ستندرد ایسیقخانه قوریلشی، فنی تعلیملر همده ایستووچی اوسکونهلر توغریسیده همکارلیک بولیشینی ایستهیمیز.»
سبزهوات ایشلب چیقریلیشی یانیده، قیشلاقدهگی عیاللردن قطاری چاروهچیلیک و لبنیات ایشلب چیقریشده هم مهم رولگه ایگهلر. حریر و مونسه، سیگیر و ساغین ایچکی سقلهش بیلن نیچه کیشیلیک عایلهلرینینگ اقتصادینی اوتکزهدیگن عیاللردن دیر.
حریرنینگ ایتیشیچه: «ایکینچیلیک بیرته سیگیر ساتیب آلدیم و اونینگ سوتی بیلن قتیق و پنیر تیارلهیمن.»
شونینگدیک مونسهنینگ ایتیشیچه: «ایکیته ساغین ایچکیم بار؛ اونینگ سوتیدن قتیق، پنیر، قیماق و قروت تیارلهیمن و بازار گه ساتهمن. بو رقم اوزیم و عایلهمنینگ صرف-خرهجتینی قولگه کیلتیرهمن.»
سونگی ییللر، ایسیقخانهلر جهازلری ترقهتیلیشی، ایکینچیلیک و چاروهچیلیک بولیمیده دستلبکی تعلیملر بیرلیشی و ملی پروژهلر بیلن همکارلیک شامل پروان ده عیاللر اقتصادی اورنی مستحکملنیشی اوچون بیر قطار حمایتی برنامهلر عملگه آشیریلگن. مذکور برنامهلر عیاللرگه سنتی اسلوبلردن اوزاق بولیب و فایدهلیراق بولگن تولید تامان باریشلریگه یاردم بیرگن.
شوندهی بیرحالده، تولید قیلووچی عیاللر ستندرد امکانیتلر کملیگی، تخصصی تعلیملردن آزراق فایدهلنیش، محصوللر ساتیلیشی اوچون منظم بازار یوقلیگی، قیشده ایسیتووچی نرسهلر قیمتی یوقاریلیگی و اجتماعی توسیقلر شامل جدی قیینچیلیکلر بیلن روپهرهلر. اولردن قطاری تولیدلرینینگ یالغیز محلی سطح یا-ده عایلهلری اوچون فایدهلنیشگه مجبور بولهدیلر که بو ایش، اقتصادی رواجلنیش امکانیتینی آز قیلهدی.
ایکینچیلیک اقتصادی رواجلنیشی بوییچه ایش بیلرمان فرهاد همدردنینگ ایشانچیگه کوره، هدفلی سیاستلرنی قوییش بیلن عیاللر اورنینی یاردم بیرووچی سطحدن عایلهلر اقتصادینینگ اصلی بولیمیگه آلیب باریش ممکن. «سوت محصوللرینی ییغیش و پروسس قیلیش مرکزلری آچیلیشی، فنی تعلیملرنی کوپهیتیریش، محلی بازارلرنی یرهتیش، ترانسپورت سیستمی، کیچیک قرضهلر و زمانهوی پروسس قیلیش اسلوبلری و محصوللرنی ذخیره قیلیش، عیاللر فعالیتلرینینگ جدی شکلده حمایت قیلهدی.»
پروان ایکینچیلیک، سووغاریش و چاروهچیلیک ریاستیده مسئوللرنینگ ایتیشلریچه، ایکینچیلیک و چاروهچیلیک بولیمیدهگی فعال عیاللردن کوپ قطاری، سیاهگرد و بگرام تومنلریده بولیب و ایکینچیلیک ریاستی همده موسسهلردن قطارینینگ حمایتی برنامهلری آستیده فعالیت قیلماقدهلر.
پروان ایکینچیلیک ریاستی زراعتی ایشلری بوییچه آمری نیازمحمد تایبنینگ ایتیشیچه: «سیاهگرد و بگرام تومنلریده، قریب ۲۳۳۴ عایله لبنیات ایشلب چیقریش و اوی باغچهلری ایشلری بیلن شغللنگن. ۲۳۳۴ عایله موسسهلر آرقهلی باغچه اوسکونهلرینی قولگه کیلتیریش شرایطیگه ماس ایدی که زراعت ادارهسی نظری آستیده فعالیت قیلماقدهلر. حاضر ایسه بو بولیمده ینگی برنامه ایش دستوریده ایمس.»
ایتیش کیرهک که، ایکینچیلیک و چاروهچیلیک بولیمیده عیاللر اوچون سرمایه یاتقیزیلیش، نهفقط عایلهلر اقتصادی وضعیتی یخشیلنیشیگه سبب بولهدی، بلکیم آزیق-آوقت امنیتی، قشاقلیک کمهیشی و قیشلاقلرده برقرار رواجلنیشنی هم تضمین قیلهدی.
