بدخشان ولایتی نوآباد قیشلاغی یشاوچیلریدن پروینگلنینگ ایتیشیچه، ۱۶ ییلدن بیری تورموش اورتاغی بیلن ایکینچیلیک ساحهسیده فعالیت قیلهدی. پروینگل ایکینزارده ایشلش یانیده اوییده چاروه باقیش بیلن عایله نیازلرینی تامینلهیدی.
اونینگ کوپهیتیریشیچه: «۱۶ ییلدن بیری ایکینچیلیک ایشلری بیلن شغللنگنمین. تورموش اورتاغیم بیلن همکارلیک قیلهمن. شونینگدیک اویده هم ایکی-اوچ باش سیگیر و قوییمیز بار. اولرنینگ سوتینی ساغیب و ماست توزتهمن. بیر قسمینی اویده مصرف قیلهمیز و بیر قسمینی بازارگه یوبارهمن و بو رقم عایله خرهجتینی تامینلهیمیز.»
بیزلرنینگ «ایکس» ترماغی ده هم تعقیب قیلینگ!
بدخشان ولایتیده ایکینچیلیک ساحهسیده ایشلهیدیگن عیاللردن باشقه بیری شگوفه، ایکینچیلیک و چاروهچیلیک محصوللریدن فایدهلنیش بیلن عایله خرهجتینی تامینلهیدی. اونینگ ایتیشیچه: «قولیمیزده اونچه پول یوق ایدی و بار پول بیلن ایکیته سیگیر ساتیب آلدیک. قریب بیش ییلدن بیری چاروهچیلیک بیلن شغللنگنمیز. سوتدن ماست توزهتیب و بازار گه یوبارهمیز. شو رقم عایله نیازلرینی تامینلهیمیز.»
اوشبو عیاللر یانیده، بدخشان ولایتی «قره قوزی» قیشلاغی یشاوچیسی بولمیش بلقیس هم، ۲۰ ییلدن بیری ایکینچیلیک و چاروهچیلیک ایشلری بیلن شغللنگن. اونینگ ایتیشیچه، باشده بیر موسسه آرقهلی یاردم بیریلگن ایکی سیگیر بیلن ایشینی باشلهگن. «بیر نهاد آرقهلی ۲۰ ییلدن آلدین ایکیته سیگیر یاردم بیریلدی. حاضر سیگیرلریم آلتیته بولگن. بو رقم عایله خرهجتینی تامینلهیمیز. تورموش اورتاغیم کوزدن عاجز دیر. مذکور سیگیرلر بولمسه اقتصادیمیز صفر بولهدی. شکر که چاروهچیلیک بار که بو رقم روزغاریمیز اوتهدی.»
شوندهی بیرحالده، بدخشان ولایتی ایکینچیلیک ایش بیلرمانی کفایتاللهنینگ ایتیشیچه، اوشبو ولایتدهگی عیاللر فایدهلی و صفتلی زراعتی محصوللرنی ایشلب چیقریش اوچون سعیوحرکت قیلهدیلر. اونگه کوره، مذکور عیاللر سوت، ماست و قتیق کبی محصوللرنی توپلش و پروسس قیلیش بیلن، عایلهلر اقتصادی یخشیلنیشیده فایدهلی اورینگه ایگهلر.
اونینگ کوپهیتیریشیچه: «بو ولایتدهگی عیاللرگه یاردم بیریلسه، ایشلری رواجلنهدی. عیاللر محصوللرنی توپلهیدیلر لیکن اولرنی سقلش اوچون جایلری یوق. اوشبو عیاللر ایکینچیلیک و چاروهچیلیک آرقهلی روزغارلرینی اوتکزهدیلر. اولرگه یاردم بیریلیشی کیرهک که محصوللرنی سقله آلسهلر. ملی و خلقارا همکارلریمیزدن کوپینچه آسایشتهلیک یرهتیلیشینی ایستهیمیز که عیاللر تشویق بولسین و اوزلری، عایلهلری و جمعیتگه کوپراق خذمت قیله آلسینلر.»
بیزلرنینگ فیسبوک صحیفهمیزگه باش اورینگ!
شوندهی بیرحالده، بدخشان اقتصادی ایشلر بوییچه ایش بیلرمان ابراهی صحاب، ایکینچیلیک و چاورهچیلیکده عیاللر اورنینی اونملی و فایدهلی دیب و ایتیشیچه: «بدخشان ده چاروهچیلیک و ایکینچیلیکده عیاللر سهمی اونملی و فایدهلی دیر. اولر محصول ایکیش، چاروه باقیش، لبنیات توزهتیش و اوی باغچهلریده فعالیت قیلیب، عایله نیازلریدن کوپ بولیمینی تامینلهیدیلر. بو مشارکتلر تعلیم، بازار گه قول تاپیش و مالی حمایت بیلن بیرگه بولگنیده، قشاقلیک کمهیشیگه مستقیم تاثیر قیله آلهدی.»
ایتیش کیرهک که، بدخشان دهگی سعیوحرکت قیلهدیگن عیاللرنینگ حکایهلری، حیات قیینچیلیکلری بولگنی بیلن اوشبو عیاللرنینگ عایله و جمعیت اقتصادیده اساسی و تاثیرلی اورینگه ایگه بولگنلرینی کورستهدی. اولر بوش قول، لیکن کوچلی اراده بیلن ایکینچیلیک، چاروهچیلیک و لبنیات ایشلب چیقریلیشی بولیملریده فعالیت قیلیب و بعضا حیاتنینگ برچه یوکینی یکه اوزلرینی بویینلریده تاشیدیلر.
