فاریاب ده قیش موسومیدهگی یاغینگرچیلیکلر آز مدتلی بولسهده، سوو منبعلری کوچلنیشی و ایکینچیلیک یخشیلنیشی اوچون مناسب بیر امکانیت دیر. فاریاب ایکینچیلیک، سووغاریش و چاروهچیلیک همده سوو و انرژی ریاستلری مسئوللرینینگ اورغولشیچه، قیش موسومی یاغیشلری ییر آستی و سحطی سوو منبعلرینی تامینلنیشیده اساسی اورینگه ایگه بولیب و بو منبعلردن درست فایدهلنیش، اوتگن ییللردهگی قوروقچیلیک اثرلرینی کمهیتیره آلهدی.
فاریاب سوو و انرژی ریاستینینگ ییر آستی سوولر بولیمی مسئولی عبدالقدوس عزیزگه کوره، بو ولایت یاغینگرچیلیکلر کمهیگنی و کیتمه-کیت قوروقچیلیک سبب، جبرلنهدیگن دیر. اونینگ سلاموطندار گه ایتیشیچه: «فاریاب، یاغینگرچیلیکلر کمهیگنی و کیتمه-کیت قوروقچیلیک سبب، جبرلنهدیگن ولایت دیر. قیش موسومی یاغیشلری ییر آستی و سحطی منبعلری کوچلنیشیده جوده مهم دیر. بو بیلن بیرگه، کیچیک و بویوک توغانلر قوریلیشی، یامغیر سووی توپلهنیشی و اوسیملیک ساحهلری سقلهنیشی بو منبعلردن فایدهلنیش اوچون اساسی یوللردن دیر.»
شونینگدیک فاریاب ایکینچیلیک ریاستینینگ ایکینچیلیکنی رواجلنتیریش و ترقهتیش بوییچه عمومی مدیری نجیبالله میرزاییگه کوره، بو ولایتنینگ ایکینچیلیک ییرلریدن کوپ قطاری للمی بولیب و اوتگن ییلدهگی قوروقچیلیک دهقانلرنی تاثیرلنتیرگن. اونینگ کوپهیتیریشیچه: «فاریاب ولایتینینگ ییرلریدن کوپ قطاری للمی دیر. قیغو بیلن اوتگن قوروقچیلیکلر بو ولایت ایکینی و دهقانلرگه کوپ زیان ییتیشتیرگن. سونگی یاغینگرچیلیکلر ایکینچیلیک ییرلرگه تورلی ایجابی تاثیرلری بولیشی ممکن. بو تاثیرلر یاغیش میزانی و توری، توپراق وضعیتی و زراعتی محصولی توریگه تیگیشلی دیر. اوشبو یاغینگرچیلیکلر ییر آستی سوولرنی کوچلنتیرهدی، توپراق نملیگینی کوپهیتیرهدی، اوسیملیکلر اوسیشی مستحکملنیشیگه سبب بولهدی و اوسیملیک آفتلرینی کمهیتیرهدی.»
شوندهی بیرحالده، فاریاب یشاوچیلری و بو ولایت دهقانلری، سونگی یاغینگرچیلیکلردن خورسندلیک قیلیب و بو جریان، اولرنی قوروقچیلیک قیینچیلیکلریدن قوتقره آلیشی توغریسیده امیدوارلر. فاریاب ولایت خواجهسبزپوش تومنی یشاوچیلریدن و قوروقچیلیک طفیلی بو ولایت مرکزی میمنه شهریگه کوچ قیلگن جلالالدیننینگ ایتیشیچه: «نیچه ییل قوروقچیلیک سبب، ییرلریمدن اوزاق بولیب و شهرکه کیلدیم. حاضر بیر ریکشا بیلن تیریکچیلیک قیلهمن و تورت ته بالهم بار. باشقه بیران ایش هم یوق که قیلسم.»
بو کبی بیر وضعیت بیلن روپهره بولگن فاریاب ولایتی شیرینتگاب تومنیدهگی دهقانلردن عبدالحکیمنینگ ایتیشیچه: «ییریم بار؛ لیکن قوروقچیلیک اوچون اوشبو ییرگه ایشله آلمهیمن. اوزیم ایشسیز و اوغیللریمده هم ایشی یوق. اوتگن ییل هیچ بیر محصول قولگه کیلتیره آلمهدیم و بو ییل هم وضعیت شو رقم. دهقان ایدیم. کیتمه-کیت قوروقچیلیک برچه نرسهمیزنی قوییب شهرگه کیلدیک. عایلهده اوچ-تورت کیشی برچهمیز ایشسیزمیز.»
باشقه بیر تاماندن، میمنه شهری یشاوچیلریدن خالمحمد، قار یاغیشیدن خورسندلیک قیلیش یانیده اونینگ طفیلی قیینچیلیکلرنی هم بیان قیلهدی. «قار یخشی ایدی و یاغدی؛ لیکن آچلیک و سووسیزلیک هم کوپهیدی. اهالی نیمه قیلسین؟ اوزیم ایشسیز و تورت ته بالهم بار. انه شوو سونگی یاغینگرچیلیکلر کمبغل اهالینینگ قیینچیلیکلرینی کوپهیتیردی. لایلیک اویلر بوزیلدی و اویلر چکک قیلهدی. بولردن برچهسی ضرر دیر. ینه هم یاغینگرچیلیکلر بیراز یخشی دیر.»
ایتیش کیرهک که، سونگی کونلر فاریاب ده قار یاغیش قریب ۳۰ سانتیمترگه ییتیشدی. مذکور قیش موسومی یاغینگرچیلیکلری سوو منبعلری کوچلنیشی و ایکینچیلیک وضعیتی یخشیلنیشی اوچون مناسب امکانیت یرهتگن؛ لیکن اهالینینگ اقتصادی قیینچیلیکلریگه توجه بولمهی و منبعلرنینگ درست مدیریت بولمهگنی بیلن، بو امکانیتنینگ یالغیز وقتینچهلیک اثری بولیشی ممکن.
