خلقارا ساغلیقنی سقلش تشکیلاتینینگ گزارش بیریشیچه، قیزهمیققه قرشی ایملش کمپاینینینگ بیرینچی باسقیچی موفقیتلی شکلده یکونلنیب و بو دورده آلتی آیلیکدن ۱۰ یاشگچه بولگن سکیز میلیون ۹۰۰ مینگ باله واکسین بولگن.
مذکور تشکیلات، بوگون (۱۷-میزان، پنجشنبه)، بیر بیانیه ترقهتیب یازیشیچه، قیزهمیققه قرشی ایملش کمپاینی ۱۷ ولایتده عملگه آشیریلگن.
بیزلرنینگ فیسبوک صحیفهمیزگه باش اورینگ!
افغانستان ده ساغلیقنی سقلش تشکیلاتی نمایندهسی ادوین سالوادورنینگ ایتیشیچه، مذکور تشکیلات هیچ بیر بالهنینگ ایملش خذمتلریدن قالمسلیگی اوچون افغانستاننینگ ساغلیقنی سقلش سیستمیدن حمایت قیلیشگه متعهد دیر.
خلقارا ساغلیقنی سقلش تشکیلاتی نمایندهسینینگ ایتیشیچه: «قیزهمیق اولدیرهدیگن بیر کسللیک دیر؛ لیکن آلدینی آلیش ممکن و افغانستان کبی مملکتده بالهلردن کوپ قطاری خوف آستیده بولیب و واکسین قوتقرو چیزیغی دیر.»
افغانستان ده بیرلشگن ملتلر تشکیلاتینینگ بالهلرنی قوللب-قوتلش صندیغی (یونیسف) وکیلی تاجالدین اویواله، قیزهمیققه قرشی ایملش کمپاینینینگ بیرینچی دوری یکونلنیشینی آلدی آلینهدیگن کسللیکلر طفیلی بالهلر اولیمینینگ آلدینی آلیش توغریسیده اونملی آدیم دیگن. «افغانستان ده آلدی آلینهدیگن کسللیکلر طفیلی هیچ بیر بالهنینگ قربان بولمسلیگی کیرهک. ملی کمپایننینگ بیرینچی دورهسی اونملی آلدیم دیر.»
خلقارا ساغلیقنی سقلش تشکیلاتی گزارشیده کیلیشیچه، ۲۰۲۴-ییلده افغانستان ده توقیز مینگ ۳۰۰ قیزهمیق موردی گزارش بیریلیب و ۲۰۲۵-ییل آگست آییگچه، باشقه سکیز مینگ ۵۰۰ مورد ثبت بولگن. ترقهلیش سانی هم ۲۰۲۳-ییلده ۱۲۷ مورددن، ۲۰۲۴-ییلده ۴۳۰ موردگه آشیب و بو موردلردن قریب ۹۲ فایزی ۱۰ یاشنی تولدیرمهگن بالهلرگه تیگیشلی دیر.
بیزلرنینگ «ایکس» ترماغی ده هم تعقیب قیلینگ!
گزارشنینگ بیر بولیمیده کیلیشیچه: «مملکت بویلب واکسین کمپاینی باشلنیشیدن آلدین، بالهلردن یالغیز ۵۵ فایزی قیزهمیق واکسینی بیرینچی دوزهنی و ۴۴ فایزی ایسه ایکینچی دوزینی قولگه کیلتیرگنلر. واکسین بولینیشدهگی بو ایش، بالهلردن قطارینینگ کسللیک برابریده محافظه بولمهی قالیشی و کسللیکنینگ کینگهیشیگه سبب بولگن ایدی.»
قیزهمیق ویروسی و جدی بیر شکلده یوقمه بیر کسللیک بولیب، اونینگ علائملری ایسه ایسیتمه، یوتل، زکام، کوزلر و تیری یوزینینگ قیزهریشی دیر. اوشبو کسللیک حتا اولیمگه سبب بوله آلهدی.
