اجتماعی ترماقلر گه بالهلرنینگ صورت یا کی ویدیوسینی جایلشتیریش کوپلب آته-آنهلر اوچون عادی حالگه ایلنگن. ایریملر بوندن ذوقلنسه، ایریملر ایسه مشهورلیک یا کی درآمد آرتیریشنی کوزلهیدی. بیراق، بو کبی ویدیو مضمونلرنینگ سلبی تامانلری هم بار.
انترنت گه یوکلنگن هر قندهی مضمون اوستیدن نظارت دییرلی یوقالهدی. بالهنینگ صورتی یا کی ویدیوسی کوچیریلیشی، فتومنتاج قیلینیشی، شنتاج (باج) یا کی تهدید واسطهسیگه ایلنیشی ممکن. عملیاتده اوسمیرلر سایبری تهدید، حقارت و مسخره سبب روحی باسیم آستیده قالیب، ایریم حاللرده جنایتگچه بارهدی. خصوصاً ۱۴-۱۵ یاشلی قیزلرنینگ صورتلری اویتلی فتومنتاج آرقهلی شنتاج قیلینیشی حالتلری اوچرهماقده. بو کبی باسیم اینگ ایهنچلی عاقبتلر گه – اوز جانیگه قصد قیلیشگچه آلیب باریشی ممکن.
بوندن تشقری، انترنتده آچیق ترقهلگن بالهلر تصویرلری جنسی مایللیککه ایگه شخصلر اوچون آسان اولجه گه ایلنیشی احتمالی یوقاری. یونیسف معلوماتلریگه کوره، دنیاده هر اوچینچی انترنت فایدهلنوچیسی باله حسابلنهدی. ساخته اکونتلر آرقهلی بالهلرنینگ ایشانچیگه کیریش، شخصی معلومات و تصویرلرنی قولگه کیریتیش گه قرهتیلگن نظافت حالتلری تاباره کوپهیماقده.
شونینگدیک، ییغیلهیاتگنی، قورقهیاتگنی یا کی اویلب تورگنی عکس ایتگن بالهلر صورتلرینی ترماققه جایلشتیریش هم کیلهجکده مسخره و حقارتلر گه سبب بولیشی ممکن. روانشناسلر بوندهی حالتلر بالهده اوزیگه ایشانچسیزلیک، اجتماعی یاپیقلیک و روحی توشکونلیکنی کوچهیتیریشینی قید ایتگن.
تلفون – زمان طلبی، اما فرزندنی ضررلی مضمون و غرضلی شخصلردن حمایه قیلیش بیرینچی نوبتده آته-آنهنینگ مسئولیتی دیر. بوگون لایک اوچون جایلنگن بیته صورت ایرته گه بالهنینگ بوتون حیاتیگه سایه سالیشی ممکن. انترنت اونیتیلمهیدی. باله ایسه حمایه گه محتاج.
عرب الفبا گه اوگیروچی: نصرتالله احدی
